વિશ્વ / ઈરાને હોર્મુઝમાં 3 ઓઈલ ટેન્કરો રોક્યા! મધ્ય પૂર્વમાં ફરી તણાવ, ક્રૂડ ઓઈલ પર નજર

પશ્ચિમ એશિયામાં અમેરિકા અને ઈરાન વચ્ચેનો સંઘર્ષ ફરી એકવાર ચર્ચાના કેન્દ્રમાં આવ્યો છે. યુદ્ધ અને શાંતિ વચ્ચે સતત બદલાતી પરિસ્થિતિ વચ્ચે બુધવારે સવારે ઈરાને હોર્મુઝ સ્ટ્રેટમાં ફરી આક્રમક વલણ અપનાવ્યાનો દાવો કર્યો છે. ઈરાનના રિવોલ્યુશનરી ગાર્ડ્સના જણાવ્યા અનુસાર, હોર્મુઝ સ્ટ્રેટમાં તેમની ચેતવણીને અવગણનારા ત્રણ તેલ ટેન્કરોને થોડા કલાકો પહેલા નિશાન બનાવીને રોકવામાં આવ્યા હતા. આ માહિતી ઈરાનના સરકારી ટેલિવિઝન દ્વારા જાહેર કરવામાં આવી હતી.

ઈરાનની આ કાર્યવાહી થોડા કલાકો અગાઉ આપવામાં આવેલી સત્તાવાર ચેતવણી બાદ સામે આવી છે. ઈરાને વિશ્વભરના દેશો અને આંતરરાષ્ટ્રીય શિપિંગ કંપનીઓને સ્પષ્ટ શબ્દોમાં ચેતવણી આપી હતી કે જો કોઈ દેશ અથવા કંપની અમેરિકા દ્વારા જપ્ત કરાયેલી ઈરાનની સંપત્તિનો ઉપયોગ કરશે, તો આવા દેશોના અથવા કંપનીઓના જહાજોને હોર્મુઝ સ્ટ્રેટમાંથી પસાર થવા દેવામાં આવશે નહીં. આ નિવેદન બાદ જ ઈરાને ત્રણ તેલ ટેન્કરોને રોક્યાનો દાવો કર્યો છે.

તાજેતરના નિર્ણયના જવાબમાં આપી

ઈરાનની ટોચની લશ્કરી કમાન્ડ સંસ્થા ખાતમ અલ-અંબિયાએ આ ચેતવણી અમેરિકા દ્વારા લેવામાં આવેલા તાજેતરના નિર્ણયના જવાબમાં આપી હતી. ઈરાનના જણાવ્યા મુજબ, અમેરિકાના રાષ્ટ્રપતિ ડોનાલ્ડ ટ્રમ્પે તાજેતરમાં જાહેરાત કરી હતી કે યુદ્ધ દરમિયાન નુકસાન પામેલા જહાજોને ઈરાનની જપ્ત કરાયેલી સંપત્તિમાંથી વળતર આપવામાં આવશે. આ નિવેદનને ઈરાને ગેરકાયદેસર ગણાવ્યું છે અને તેના વિરોધમાં કડક વલણ અપનાવ્યું છે.

મંગળવારે આ મુદ્દે સ્પષ્ટ પ્રતિક્રિયા આપી

ઈરાની લશ્કરી કમાન્ડના પ્રવક્તા ઈબ્રાહિમ ઝુલ્ફીકારીએ મંગળવારે આ મુદ્દે સ્પષ્ટ પ્રતિક્રિયા આપી હતી. તેમણે જણાવ્યું હતું કે અમેરિકી રાષ્ટ્રપતિએ અસુરક્ષિત હોર્મુઝ સ્ટ્રેટમાંથી પસાર થતાં જહાજોને ઈરાનની જપ્ત કરાયેલી સંપત્તિમાંથી વળતર આપવાની જાહેરાત કરી છે, પરંતુ ઈરાન આ નિર્ણયને કોઈપણ સંજોગોમાં સ્વીકારશે નહીં. તેમના જણાવ્યા મુજબ, આ પ્રકારની કાર્યવાહી આંતરરાષ્ટ્રીય કાયદાના વિરુદ્ધ છે.

આ નિર્ણયના ગંભીર પરિણામો આવી શકે

ઝુલ્ફીકારીએ વધુમાં જણાવ્યું હતું કે અમેરિકા દ્વારા લેવામાં આવેલા આ નિર્ણયના ગંભીર પરિણામો આવી શકે છે. તેમણે અમેરિકી રાષ્ટ્રપતિને સીધી ચેતવણી આપતાં કહ્યું કે ઈરાન આ ગેરકાયદેસર પગલાંનો યોગ્ય જવાબ આપશે. સાથે જ વિશ્વના તમામ દેશો અને શિપિંગ કંપનીઓને પણ સ્પષ્ટ સંદેશ આપવામાં આવ્યો કે જો તેઓ ઈરાનની જપ્ત કરાયેલી સંપત્તિનો કોઈપણ બહાના તરીકે ઉપયોગ કરશે, તો ઈરાનના સશસ્ત્ર દળો તેમના જહાજોને હોર્મુઝ સ્ટ્રેટમાંથી પસાર થવા દેશે નહીં.

આ પણ વાંચો : જાપાનમાં 7.1ની તીવ્રતાનો ભૂકંપ, 1 મીટર ઊંચી સુનામી લહેરોની ચેતવણીથી તંત્ર એલર્ટ

હોર્મુઝ સ્ટ્રેટ વૈશ્વિક તેલ વેપાર માટે અત્યંત મહત્વનો દરિયાઈ માર્ગ માનવામાં આવે છે. અહીં કોઈપણ પ્રકારનો તણાવ અથવા લશ્કરી કાર્યવાહી વૈશ્વિક શિપિંગ અને ઊર્જા પુરવઠા પર અસર કરી શકે છે. ઈરાનના આ દાવા બાદ પશ્ચિમ એશિયાની સ્થિતિ પર વિશ્વભરની નજર કેન્દ્રિત થઈ છે અને આગામી દિવસોમાં અમેરિકા તથા અન્ય દેશોની પ્રતિક્રિયા પર સૌની નજર રહેશે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ