વર્લ્ડ / US-ઈરાન તણાવ ઘટતાં ક્રૂડ ઓઈલ સસ્તું! એક જ દિવસમાં ભાવમાં મોટો ઘટાડો, પેટ્રોલ-ડીઝલના ભાવ ઘટશે ?

અમેરિકાએ ઈરાન સામેના હવાઈ હુમલાઓ હાલ માટે સ્થગિત રાખવાનો નિર્ણય લેતા બજારમાં કૂટનીતિક ઉકેલની આશા વધી છે. તેના કારણે આંતરરાષ્ટ્રીય બજારમાં ક્રૂડ ઓઈલના ભાવ તૂટ્યા છે. જોકે નિષ્ણાતોનું માનવું છે કે માત્ર ક્રૂડ સસ્તું થવાથી ભારતમાં તરત જ પેટ્રોલ અને ડીઝલના ભાવ ઘટી જશે એવું માનવું યોગ્ય નથી.

એક જ દિવસમાં ક્રૂડ ઓઈલમાં મોટો ઘટાડો

સોમવારે બ્રેન્ટ ક્રૂડનો ભાવ 8.7 ટકા ઘટીને પ્રતિ બેરલ 88.36 ડોલર પર પહોંચી ગયો હતો. આ છેલ્લા એક અઠવાડિયાનો સૌથી નીચું સ્તર માનવામાં આવે છે. બીજી તરફ અમેરિકન વેસ્ટ ટેક્સાસ ઇન્ટરમિડિયેટ (WTI) ક્રૂડ પણ 7.5 ટકા ઘટીને પ્રતિ બેરલ 82.61 ડોલર પર આવી ગયો. થોડા દિવસ પહેલાં જ બ્રેન્ટ ક્રૂડ 100 ડોલર પ્રતિ બેરલની નજીક પહોંચી ગયો હતો.

અમેરિકા-ઈરાન વચ્ચે કૂટનીતિને મળ્યું પ્રાધાન્ય

અમેરિકાના રાષ્ટ્રપતિ ડોનાલ્ડ ટ્રમ્પે ઈરાન સામેની હવાઈ કાર્યવાહી હાલ માટે રોકી કૂટનીતિક પ્રયાસોને વધુ સમય આપવાનો નિર્ણય કર્યો છે. અમેરિકી અધિકારીઓના જણાવ્યા મુજબ બંને દેશો વચ્ચે વાતચીત આગળ વધી રહી છે અને કોઈ સમજૂતી થવાની સંભાવના પણ વ્યક્ત કરવામાં આવી છે. જોકે ટ્રમ્પે એ પણ સ્પષ્ટ કર્યું છે કે જો કૂટનીતિક પ્રયાસો નિષ્ફળ જશે તો અમેરિકા ફરી કડક સૈન્ય કાર્યવાહી કરશે.

હોર્મુઝ રૂટ ખુલવાની આશાએ બજારને રાહત

ઈરાન સાથેના તણાવને કારણે હોર્મુઝ જળમાર્ગ પરથી ઓઈલ સપ્લાય પર ગંભીર અસર પડી હતી. આ માર્ગ વિશ્વના સૌથી મહત્વપૂર્ણ ઓઈલ ટ્રાન્સપોર્ટ રૂટ્સમાંનો એક છે. હવે તણાવ ઘટતાં શિપિંગ ફરી સામાન્ય થવાની આશા ઉભી થઈ છે. તેના કારણે વૈશ્વિક બજારમાં સપ્લાય સુધરશે તેવી અપેક્ષા સાથે ક્રૂડ ઓઈલના ભાવમાં ઘટાડો નોંધાયો છે.

આ પણ વાંચોઃ બેંક ઓફ બરોડાનો 1TB ડેટા લીક થયો? જોખમમાં ગ્રાહકોનો આધાર, ખાતા અને લોનનો ડેટા

હજુ પણ અનેક જોખમો યથાવત

ભલે ક્રૂડના ભાવમાં ઘટાડો થયો હોય પરંતુ વૈશ્વિક સપ્લાય ચેઇન પર હજુ પણ અનેક પડકારો છે. યમનના હૂતી બળવાખોરોએ સાઉદી અરેબિયાની ઓઈલ સપ્લાય લાઈનને નિશાન બનાવ્યાનો દાવો કર્યો છે. બીજી તરફ રશિયાના બ્લેક સી ઓઈલ ટર્મિનલ પર થયેલા ડ્રોન હુમલાથી કઝાકિસ્તાનના ઓઈલ ઉત્પાદન પર પણ અસર પડી હતી. જોકે બાદમાં ઓઈલ લોડિંગ ફરી શરૂ કરવામાં આવ્યું હતું.

ભારતમાં પેટ્રોલ-ડીઝલ સસ્તું થશે?

ભારતમાં પેટ્રોલ અને ડીઝલના ભાવ માત્ર આંતરરાષ્ટ્રીય ક્રૂડ ઓઈલ પર આધારિત નથી. તેમાં રૂપિયા-ડોલર વિનિમય દર, કેન્દ્ર અને રાજ્ય સરકારના ટેક્સ, રિફાઇનિંગ ખર્ચ અને ઓઈલ માર્કેટિંગ કંપનીઓની કિંમતી નીતિ પણ મહત્વની ભૂમિકા ભજવે છે. તેથી ક્રૂડ ઓઈલ સસ્તું થતાં તરત જ પેટ્રોલ અને ડીઝલના ભાવમાં ઘટાડો થશે તેની કોઈ ખાતરી નથી.

આગામી દિવસોમાં શું રહેશે નજર?

હાલ બજારની નજર અમેરિકા અને ઈરાન વચ્ચેની આગળની વાતચીત પર રહેશે. જો બંને દેશો વચ્ચે સમજૂતી થાય અને હોર્મુઝ જળમાર્ગ પર સપ્લાય સંપૂર્ણપણે સામાન્ય બને તો ક્રૂડ ઓઈલના ભાવમાં વધુ ઘટાડો શક્ય છે. પરંતુ જો ફરીથી તણાવ વધશે તો ઓઈલ માર્કેટમાં ફરી ભારે ઉથલપાથલ જોવા મળી શકે છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ