- મેચમાં કેપ્ટન મહેન્દ્ર સિંહ ધોની અંત સુધી ક્રિઝ પર રહ્યો હતો
- ધોનીએ પોતાની શાનદાર ઇનિંગ્સથી ફરી એકવાર પ્રશંસકોનું દિલ જીતી લીધું
- ધોની રાજસ્થાન રોયલ્સ સામે રમાયેલી ઇનિંગ્સ દરમિયાન ઇજાગ્રસ્ત હતો
IPL 2023માં 17મી મેચ ચેન્નાઈ સુપર કિંગ્સ અને રાજસ્થાન રોયલ્સ વચ્ચે બુધવારે રમાઈ હતી અને આ રોમાંચક મેચમાં રાજસ્થાનનો 3 રને વિજય થયો હતો. જણાવી દઈએ કે રનનો પીછો કરવા ઉતરેલી ચેન્નાઈ સુપર કિંગ્સનો કેપ્ટન મહેન્દ્ર સિંહ ધોની અંત સુધી ક્રિઝ પર રહ્યો હતો એ છતાં પણ ધોની પોતાની ટીમને જીત અપાવી શક્યો ન હતો. જો કે એ મેચમાં ધોનીએ પોતાની શાનદાર ઇનિંગ્સથી ફરી એકવાર પ્રશંસકોનું દિલ જીતી લીધું હતું.
હાલ હવે એક વીડિયો સામે આવ્યો છે જેમાં ધોની રાજસ્થાન રોયલ્સ સામે રમાયેલી ઇનિંગ્સ દરમિયાન ઇજાગ્રસ્ત હતો એ દર્શાવી રહ્યો છે અને હાલ એ વિડીયો સોશિયલ મીડિયા પર ખૂબ જ વાયરલ થઈ રહ્યો છે.
જણાવી દઈએ કે ચેન્નાઈ સુપર કિંગ્સે તેના ઓફિશિયલ સોશિયલ મીડિયા એકાઉન્ટ પરથી એક વીડિયો શેર કર્યો છે, જેમાં ધોની ડ્રેસિંગ રૂમ તરફ જતો જોવા મળી રહ્યો છે. આ વિડીયો પોસ્ટ કરતાં ચેન્નાઈએ ટ્વીટ કરીને લખ્યું, “એક યોદ્ધા. એક અનુભવી. એક ચેમ્પિયન - ધ વન એન્ડ ઓન્લી! ધોનીનો આ વિડિયો જોયા તેના ફેન્સ ખૂબ જ નિરાશ દેખાયા હતા કારણ કે ધોની ઘૂંટણમાં દુખાવો હોવા છતાં એ ટીમ માટે રમ્યો અને તેને જીતની નજીક પંહોચાડી હતી.
નોંધનીય છે કે રાજસ્થાન રોયલ્સ સામે રમાયેલી મેચમાં એમએસ ધોનીએ રનનો પીછો કરતા 17 બોલમાં અણનમ 32 રન બનાવ્યા હતા. તેની ઇનિંગમાં 1 ફોર અને 3 સિક્સ સામેલ હતી. એ મેચમાં ચેન્નાઈને છેલ્લી ઓવરમાં જીતવા માટે 21 રનની જરૂર હતી.છેલ્લા બોલ પર 5 રનની જરૂર હતી અને મહેન્દ્ર સિંહ ધોની સ્ટ્રાઈક પર હતો. સંદીપે ધોનીને સચોટ યોર્કર નાખ્યું, જેના પર ચેન્નાઈનો કેપ્ટન માત્ર એક રન લઈ શક્યો હતો.
ચેન્નાઈ સુપર કિંગ્સના મુખ્ય કોચ સ્ટીફન ફ્લેમિંગએ જણાવ્યું કે બંને ઘૂંટણની ઈજાથી પીડિત છે. 'ધોની ઘૂંટણની ઈજાથી પરેશાન છે અને તમે તેમને જોઈને પણ આ અનુભવી શકો છો. ધોનીની ફિટનેસ હંમેશા શાનદાર રહી છે અને તે ખૂબ જ પ્રોફેશનલ પણ છે. એવામાં હાલ અમે તેમની ઈજા પર નજર રાખી રહ્યા છીએ. તે એક શાનદાર ખેલાડી છે.' જો કે કોચે ધોનીની ઈજા વિશે વધુ જણાવ્યું નથી સાથે જ એવું પણ જણાવ્યું નથી કે તે આગામી મેચમાં રમશે કે નહીં પણ અચાનક ધોનીના ઘૂટણની ઇજા વિશે વાત કરીને હવે આ વાત ચાહકોના મનમાં ઘર કરી ગઈ છે.
