- નવી CNCD પોલિસીના અમલ માટે તંત્ર મક્કમ
- ઢોરને પકડવાની કામગીરી પૂરજોશમાં ચાલી રહી છે
- પશુપાલકોની બાઈકર્સ ગેંગ ભારે ઉપદ્રવ મચાવે
અમદાવાદમાં મ્યુનિસિપલ કોર્પોરેશનના સત્તાધિશો દ્વારા અમદાવાદમાં 1 સપ્ટેમ્બરથી નવી ઢોર નિયંત્રણ નીતિ અમલમાં મુકાઈ છે. જે અંતર્ગત હવે રોજનાં 100થી વધુ રખડતાં ઢોરને પકડીને બહેરામપુરા ખાતેના ઢોર વાડે પૂરવામાં આવી રહ્યાં છે. ઢોર ત્રાસ અંકુશ નિવારણ વિભાગની ઢોર પકડવાની કામગીરીમાં એક મહિનામાં 1400થી વધુ પશુઓ પકડવામાં આવ્યાં છે. તંત્ર દ્વારા આ કામગીરીને વધુ કડક રીતે હાથ ધરવાની તૈયારી પણ જોરશોરથી ચાલુ છે. મ્યુનિસિપલ કોર્પોરેશનના ઉચ્ચસ્તરેથી નવી સીએનસીડી પોલિસીની અમલવારી માટે વધુ મક્કમતાથી ઝુંબેશ હાથ ધરવાની તાકીદ સંબંધિત વિભાગોને કરવામાં આવી છે. જે અંતર્ગત હવે તંત્ર આ કામગીરીની વીડિયોગ્રાફી પણ કરશે. ઉચ્ચસ્તરેથી અપાયેલા આદેશ મુજબ વીડિયોગ્રાફીના આધારે ઢોર પકડવાની કામગીરીમાં અવરોધરૂપ બનતાં તત્ત્વોને ઓળખી કઢાશે અને તેમની વિરુદ્ધ કાયદાકીય પગલાં લેવાશે. નવી ઢોર નિયંત્રણ પોલિસીમાં હવે તંત્ર દ્વારા પકડાયેલા ઢોરને છોડાવવા માટે આકરા નિયમો ઘડાયા છે. ઢોર ત્રાસ અંકુશ નિવારણ વિભાગને હેલ્થ વિભાગ સહિતના અન્ય વિભાગનો સ્ટાફ તાકીદના ધોરણે ફાળવવામાં આવ્યો છે. આ કામગીરી કરવા માટે ખાનગી મજૂરોની સંખ્યા પણ વધારી દેવાઈ છે. અત્યારે તો હાઈકોર્ટના નિર્દેશ મુજબ તંત્ર દરરોજના 100થી વધુ ઢોર પકડવાની કામગીરીમાં જોતરાઈ ગયું છે.
ઢોરને પકડવાની કામગીરી પૂરજોશમાં
શહેરમાંથી પકડાયેલાં ઢોરને ઢોર ડબામાં પૂરીને જો પશુપાલકો તેને છોડાવવા ન આવે તો સરકાર માન્ય ગૌશાળા અને પાંજરાપોળમાં મોકલી દેવામાં આવે છે. તંત્ર દ્વારા શહેરના સાત ઝોનના વિવિધ વિસ્તારો જેમ કે મેમ્કો, ભાર્ગવ રોડ, કુબેરનગર, બાપુનગર, નારોલ, શાહવાડી, દાણીલીમડા, વાંદરવડ તળાવ, વટવા, જામફળવાડી, વસ્ત્રાલ, ધીરજ હાઉસિંગ, ભાઈપુરા, વિરાટનગર, નિકોલ, અમરાઈવાડી, રામાપીરનો ટેકરો, રાણીપ, મોટેરા, ચાંદખેડા, નહેરુનગર, ભાવસાર હોસ્ટેલ, આઈઓસી રોડ, મેઘાણીનગર, ઘી કાંટા, ઘાટલોડિયા, ગોતા, સરખેજ, ઠક્કરનગર, નરોડા-દહેગામ રોડ, ખોખરા રોડ, પ્રીતમપુરા, રામોલ, એક્સપ્રેસ હાઈવે, ઓઢવ, મેમનગર, ચાંદલોડિયા જેવા વિસ્તારોમાંથી રખડતાં મુકાયેલાં ઢોરને પકડવાની કામગીરી પૂરજોશમાં ચાલી રહી છે.
.jpg)
બાઈકર્સ ગેંગ પર કાર્યવાહી કરાશે
ગઈ કાલે તંત્રએ 124થી વધુ ઢોરને ઝબ્બે કર્યાં હતાં તેમજ 2570 કિલો ઘાસચારો પણ જપ્ત કર્યો હતો. આ કામગીરી દરમિયાન અનેક વિસ્તારોમાં પશુપાલકોની બાઈકર્સ ગેંગ ભારે ઉપદ્રવ મચાવે છે. પશુપાલકોએ સોશિયલ મીડિયામાં વિવિધ પ્રકારનાં ગ્રૂપ્સની રચના કરી છે અને આ ગ્રૂપ્સમાં સામેલ સભ્યોને અગાઉથી ઢોર પકડવાની પાર્ટીના મામલે જાણકારી અપાઈ જાય છે. એટલે જો ઓઢવમાં ઢોર પકડવાની પાર્ટી રવાના થઈ હોય તો પશુપાલકો સોશિયલ મીડિયા મારફતે આની માહિતી રામોલના સ્થાનિક સભ્યોને આપી દે છે અને તે વખતે સ્થાનિક પશુપાલકો બાઈક લઈને ઢોર પકડવાની પાર્ટી આવે તે પહેલાં રખડતાં ઢોરને આજુબાજુની નાની ગલીમાં સગેવગે કરી દે છે. પશુપાલકોની આ બાઈક પર ફરતી ગેંગ બાઈકર્સ ગેંગ તરીકે પણ ઓળકાય છે. અમુક વિસ્તારોમાં બાઈકર્સ ગેંગ ઢોર પકડવાની પાર્ટી પર હુમલા પણ કરતી આવી છે. ઉચ્ચસ્તરેથી ઢોર પકડવાની પાર્ટી સહિતના વિભાગોને એવો આદેશ અપાયો છે કે ઢોર પકડતી વખતે તેની કામગીરીની વીડિયોગ્રાફી કરાવવી. બાઈકર્સ ગેંગના ઉપદ્રવ પર વીડિયોગ્રાફીના આધારે પોલીસ કામગીરી સહિતનાં કડક પગલાં લેવામાં આવશે.
