કામની વાત / ભાડુઆત ઘર ખાલી કરવાની ના પાડે છે, તો ટેન્શન છોડો, તમારી પાસે છે આ સુપરપાવર

શહેરોમાં અનેક લોકો ભાડે મકાન આપતા હોય છે. જેમાં અમુક કિસ્સામાં એવું પણ બનતું હોય છે કે, ભાડુઆતે ખોટી જાણકારી આપીને મકાન લીધું હોય અને પછી ભાડું પણ ન આપે તથા ઘર ખાલી કરવાની પણ આનાકાની કરે. જો તમે પણ આવા મકાનના માલિક હોય તો તમારે સાવધાન થઈ જવું જોઈએ નહીં તો તમારી અમુક ભૂલ તમને ભારે પડી શકે છે. આવો જાણીએ તે નિયમો વિશે જેનું પાલન કરીને તમારા ઘરને સુરક્ષિત રાખી શકો છો.

• ભાડુઆતના ડોક્યુમેન્ટ વેરિફિકેશન જરૂરી

જો તમે મકાનમાલિક છો અને તમારું ઘર ભાડે આપવા જઈ રહ્યા હોવ તો કેટલીક મહત્વપૂર્ણ બાબતો ધ્યાનમાં રાખવી ખૂબ જ જરૂરી છે. જેમાં સૌ પહેલા કોઈપણ વ્યક્તિને ભાડે મકાન આપતા પહેલા તેના ડોક્યુમેન્ટ વેરિફિકેશન કરાવો. એના માટે સ્થાનિક પોલીસ સ્ટેશનને ભાડુઆત વિશે માહિતી આપવી જરૂરી છે. એનાથી ખાતરી થઈ શકે છે કે ભાડુઆતનો કોઈ ગુનાહિત રેકોર્ડ નથી. આ સિવાય મકાનમાલિકે એ પણ જાણવું જોઈએ કે તેના અધિકારો શું છે જેથી તે કાયદેસર રીતે સુરક્ષિત રહી શકે. જો કોઈ ભાડુઆત ખોટી માહિતી આપીને ઘર લે છે તો મકાનમાલિક તેને ઘરમાંથી કાઢી મૂકી શકે છે. આવા કિસ્સાઓમાં મકાનમાલિક કલમ 318 BNS હેઠળ કાનૂની કાર્યવાહી પણ કરી શકે છે. આ કલમ છેતરપિંડી સાથે સંબંધિત છે અને તેમાં ખોટી માહિતી આપવી, નકલી દસ્તાવેજો બનાવવા અથવા ખોટી ઓળખ આપવા જેવા ગુનાઓનો સમાવેશ થાય છે.

• ભાડા કરારમાં આ શરતો શામેલ હોવી જરૂરી

ભાડા પર ઘર આપતા પહેલા ભાડા કરાર કરવો ખૂબ જ જરૂરી છે. ભાડા કરારમાં સ્પષ્ટપણે લખેલું હોવું જોઈએ કે જો ભાડુઆત કોઈ ગેરકાયદેસર પ્રવૃત્તિ કરે તો તેને તાત્કાલિક ઘર ખાલી કરવું પડશે. આ સિવાય મકાનમાલિકે એ પણ સુનિશ્ચિત કરવું જોઈએ કે ભાડા કરારમાં ભાડાની ચુકવણીની તારીખ, વીજળી અને પાણીના બિલની ચુકવણી અને ઘરની જાળવણી સંબંધિત શરતોનો સ્પષ્ટ ઉલ્લેખ હોય. જો ભાડૂઆત આ શરતોનું પાલન ન કરે તો મકાનમાલિક તેને ઘરમાંથી નીકાળી શકે છે. મકાનમાલિકે એ પણ સુનિશ્ચિત કરવું જોઈએ કે ભાડુઆત સમયસર ભાડું ચૂકવે અને ઘરની યોગ્ય કાળજી રાખે. જો કોઈ ભાડુઆત લાંબા સમય સુધી ભાડું ચૂકવતો ન હોય કે પછી ઘરમાં કોઈ ગેરકાયદેસર પ્રવૃત્તિ કરે તો મકાનમાલિક તેને કાનૂની નોટિસ આપીને નીકાળી શકે છે.

વધુ વાંચો : ઓફિસમાં બોસના ગુસ્સાથી જો બચવું હોય તો તાત્કાલિક છોડી દો આ 5 આદતો, નહીં તો નોકરીમાંથી હાથ ધોઈ બેસશો

• ભાડુઆત ઘર ખાલી કરવાનો ઇનકાર કરે તો

મકાનમાલિકે ભાડા કરારને મજબૂત બનાવવો જોઈએ જેથી ભવિષ્યમાં કોઈ વિવાદ થાય તો કોઈ સમસ્યાનો સામનો ન કરવો પડે. અમુક વખત ભાડૂઆતો ઘર ખાલી કરવાનો ઇનકાર કરે અથવા જાણી જોઈને ભાડું ન ચૂકવે તો મકાનમાલિકને આર્થિક નુકસાન થાય છે. આવી સ્થિતિથી બચવા માટે ઘર ખાલી કરવા માટેની શરતો ભાડા કરારમાં પહેલેથી જ લખેલી હોવી જરૂરી છે. જો ભાડૂઆત આ નિયમોનું પાલન ન કરે તો મકાનમાલિક તેને કાનૂની નોટિસ મોકલી શકે છે અને જો જરૂરી હોય તો કોર્ટમાં કેસ પણ દાખલ કરી શકે છે. આમ ઘરમાલિકે પોતાના અધિકારોથી વાકેફ હોવું જરૂરી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ