કાર્યવાહીની માંગ / 'શાહુકારનું દેવું ચુકવવા 5 કિડની વેચવી છે', કલેક્ટર કચેરીમાં લાગેલા પોસ્ટરથી હડકંપ, જાણો મામલો

• નાંદેડ કલેક્ટ કચેરી બહાર લગાવવામાં આવેલ પોસ્ટરથી હડકંપ
• પોસ્ટરમાં દેવું ચૂકવવા પાંચ કિડની વેચવાનું લખ્યું હતું
• મુદખેડ પોલીસે મહિલાનું નિવેદન નોંધી તપાસ શરૂ કરી

 વ્યાજખોર પાસેથી લીધેલી લોન ચુકવવા માટે કિડની વેચવાના પોસ્ટરને લઈને હોબાળો થયો હતો. નાંદેડ કલેક્ટર કચેરીની બહાર લોન ચૂકવવા માટે કિડની વેચતા પોસ્ટરો જોવા મળ્યા હતા.જ્યારે પોલીસે તપાસ કરી તો જાણવા મળ્યું કે આ પોસ્ટર એક મહિલા દ્વારા લગાવવામાં આવ્યા હતા. પોસ્ટરમાં એક મોબાઈલ નંબર પણ લખવામાં આવ્યો હતો. જેના આધારે પોલીસ મહિલા સુધી પહોંચવામાં સફળ રહી હતી. આ પોસ્ટર સત્યભામા કુંચલવાર નામની મહિલાએ લગાવ્યું છે.મહિલાનું કહેવું છે કે તેણે વ્યાજખોર પાસેથી લોન ચૂકવવા માટે તેની કિડની વેચવાનું પોસ્ટર લગાવ્યું હતું. હાલ તો મુદખેડ પોલીસે મહિલાનું નિવેદન નોંધી તપાસ શરૂ કરી છે.

તેના પતિની સારવાર માટે લોન લેવામાં આવી હતી
મળતી માહિતી મુજબ નાંદેડના મુદખેડ તાલુકાની સત્યભામા કુંચલવારના પતિ બાલાજી કુંચલવારને સાપ કરડ્યો હતો. તેમની સારવાર માટે સત્યભામાએ શાહુકારો પાસેથી વ્યાજ પર બે લાખ રૂપિયા લીધા હતા. જે બાદ મહિલા દ્વારા ઘણી વખત વ્યાજની ચૂકવણી પણ કરવામાં આવી હતી. મહિલા વ્યાજખોરોને સમયસર પૈસા ન ચૂકવી શકતા વ્યાજખોરો દ્વારા તેનાં પતિને ખૂબ જ ખરાબ રીતે માર માર્યો હતો. 

ઈચ્છામૃત્યુની માંગ કરી 
સત્યભામાના પુત્ર સિદ્ધાંત અને પુત્રી સૃષ્ટિએ 3 જુલાઈ 2021 ના રોજ કલેક્ટર અને પોલીસ અધિક્ષકને પત્ર લખ્યો હતો.પત્રમાં તેઓએ માંગ કરી હતી કે વ્યાજખોરો સામે પગલા લેવામાં આવે અથવા ઈચ્છામૃત્યુની મંજૂરી આપવામાં આવે. પરંતું પોલીસ દ્વારા કોઈ કાર્યવાહી કરવામાં આવી ન હતી. જેના કારણે કુંચલવાર પરિવાર કંટાળીને ગામ છોડી જતો રહ્યો હતો. 

ઘટનાઓ જણાવતા બાળકોની આંખમાં આંસુ આવી ગયા હતા
પરિવાર છેલ્લા અઢી વર્ષથી મુંબઈમાં રહેતો હતો. ત્યારે ચાર દિવસ પહેલા તેણે નાંદેડમાં કલેક્ટર ઓફિસની બહાર એક પોસ્ટર લગાવ્યું હતું. જેમાં લખ્યું હતું કે કિડની વેચવાની છે.  જે બાદ મીડિયા અને પોલીસે પરિવારનો સંપર્ક કર્યો. ત્યારબાદ પરિવાર નાંદેડ પરત આવ્યો હતો. આ પરિવાર સાથે બનેલી ઘટનાઓ જણાવતા આ છોકરા-છોકરીઓની આંખોમાં આંસુ આવી ગયા હતા.