ગુજરાતનું ગૌરવ / 'દીવની દીકરી', બ્રિટનમાં ચૂંટણી જીતી, સામાન્ય ચૂંટણીમાં વગાડ્યો ડંકો

આ વખતે યુકેની ચૂંટણીમાં ભારતીયોની ધાક જોવા મળી છે. ભારતીય મૂળના 26 સાંસદો સંસદમાં ચૂંટાયા છે. કન્ઝર્વેટિવ પાર્ટી (ટોરી) ભલે ચૂંટણી હારી ગઈ હોય પરંતુ તેના ભારતીય મૂળના નવા ચૂંટાયેલા સાંસદ શિવાની રાજાની ચર્ચા ચારે તરફ થઈ રહી છે. આ વખતે તેઓ લેસ્ટર ઈસ્ટ સીટ પરથી ચૂંટણી જીત્યા છે. શિવાનીએ લંડનના ભૂતપૂર્વ ડેપ્યુટી મેયર રાજેશ અગ્રવાલને હરાવ્યા હતા.

શિવાની રાજનો પરિવાર દીવનો

લેસ્ટર ઈસ્ટની સીટ પર લેબર પાર્ટીની મજબૂત પકડ હોવાનું માનવામાં આવતું હતું. આ સીટ 37 વર્ષમાં પ્રથમ વખત ટોરીઓએ કબજે કરી છે. શિવાની રાજાને લેસ્ટર ઈસ્ટમાં 14526 વોટ મળ્યા છે. તેઓ રાજેશ અગ્રવાલ સામે 4 હજારથી વધુ મતોથી જીત્યા હતા. શિવાની રાજા મૂળ ગુજરાતી છે. તેમના પરિવારના સભ્યો દીવમાં રહેતા હતા. ચૂંટણી દરમિયાન શિવાની બ્રિટનમાં રહેતા ભારતીય ઈમિગ્રન્ટ્સ સાથે સતત જોડાયેલી રહી, જેનાથી તેમને ફાયદો પણ થયો. હાલમાં જ ચૂંટણી પ્રચાર દરમિયાન શિવાનીએ શિવ કથા પણ સાંભળી હતી અને ગરબા પણ રમ્યાં હતા. તેમણે ભારતમાં રહેતા બ્રિટિશ મતદારોને પણ પ્રભાવિત કર્યા અને તેમને ઓનલાઈન મતદાન કરવા અપીલ કરી. શિવાની રાજાએ ખાસ કરીને દીવ અને ગુજરાતમાં રહેતા બ્રિટનના લોકોનો સંપર્ક સાધ્યો હતો.

કોણ છે શિવાની રાજા

શિવાનીના માતા-પિતા 70ના દાયકામાં કેન્યાથી લેસ્ટર આવ્યા હતા. તેણીએ ડી મોન્ટફોર્ટ યુનિવર્સિટીમાંથી તેનું શિક્ષણ પૂર્ણ કર્યું અને ફાર્માસ્યુટિકલ અને કોસ્મેટિક સાયન્સમાં સ્નાતક થયા. આ પછી તેણે ઘણી કોસ્મેટિક બ્રાન્ડ્સ સાથે પણ કામ કર્યું.

લેબર પાર્ટીને મળી 412 સીટ

આ વખતે ચૂંટણીમાં લેબર પાર્ટીને 412 સીટો મળી છે જ્યારે ટોરીને માત્ર 121 સીટ જ મળી છે. આ પછી ઋષિ સુનકે ટોરી ચીફ અને વડાપ્રધાન પદ પરથી રાજીનામું આપી દીધું હતું.

વધુ વાંચો : બ્રિટનની ચૂંટણીમાં લેબર પાર્ટીની પ્રચંડ જીત, અંતે ઋષિ સુનકે હાર સ્વીકારી, સ્ટાર્મરને પાઠવ્યા અભિનંદન

2022માં લેસ્ટરમાં ભારત-પાક મેચમાં અથડામણ થઈ હતી

લેસ્ટર એ જ શહેર છે જ્યાં 2022માં ક્રિકેટ મેચ દરમિયાન ભારતીયો અને પાકિસ્તાનીઓ વચ્ચે અથડામણ થઈ હતી. આ વખતે ચૂંટણી પ્રચાર દરમિયાન એવું જોવા મળ્યું હતું કે કીર સ્ટારમેરે પણ ભારતીયો અને હિંદુઓને આકર્ષવાનો પ્રયાસ કર્યો હતો.