હવામાન આગાહી / ગુજરાતમાં ઠંડી વચ્ચે વરસાદ, અંબાલાલ પટેલ અને હવામાન વિભાગે કરી મોટી આગાહી

Gujarat Weather News: રાજ્યમાં ગુલાબી ઠંડીનો અહેસાસ વધતો જઈ રહ્યો છે. વહેલી સવારે અને રાતના સમયે લોકો ઠંડીનો અહેસાસ થઈ રહ્યો છે. જ્યારે બપોરે હળવી ગરમી યથાવત્ રહી છે. હવામાન વિભાગના અનુસાર છેલ્લા 24 કલાકમાં સમગ્ર ગુજરાતમાં શુષ્ક વાતાવરણ રહ્યું હતું અને આવનાર સાત દિવસ પણ વરસાદની કોઈ શક્યતા નથી. પવનની દિશા ઉત્તરપૂર્વ-પૂર્વ તરફ હોવાને કારણે આગામી અઠવાડિયે લઘુત્તમ અને મહત્તમ તાપમાનમાં કોઈ મોટો ફેરફાર થવાની ધારણા નથી.

દક્ષિણ ભારત માટે ભારે વરસાદની ચેતવણી

ભારતીય હવામાન વિભાગે દક્ષિણ ભારતના અનેક ભાગોમાં ભારે વરસાદની આગાહી કરી છે. ખાસ કરીને તમિલનાડુ, પુડુચેરી અને કરાઈકલમાં ભારેથી અતિ ભારે વરસાદ પડી શકે છે. આંધ્રપ્રદેશ, કેરળ અને માહે સહિતના વિસ્તારોમાં છૂટાછવાયા વરસાદ સાથે વીજળી-પવનના ઝાપટાની શક્યતા પણ દર્શાવવામાં આવી છે. આ સાથે 18-19 નવેમ્બરના રોજ પશ્ચિમ મધ્યપ્રદેશના કેટલાક વિસ્તારોમાં ઠંડીની તીવ્રતા વધવાની ચેતવણી આપવામાં આવી છે, જેની પરોક્ષ અસર ઉત્તર-પશ્ચિમ ભારત પર પણ થઈ શકે છે.

અંબાલાલ પટેલની આગાહી: નવેમ્બર અંતે માવઠું અને હવામાનમાં ફેરફાર

હવામાન નિષ્ણાત અંબાલાલ પટેલે આગામી દિવસોમાં હવામાનમાં મોટા ફેરફારોની શક્યતા વ્યક્ત કરી છે. તેમના અનુસાર 26 નવેમ્બરથી ડિસેમ્બર શરૂઆત વચ્ચે બંગાળના ઉપસાગરમાં ચક્રવાતની પ્રક્રિયા શરૂ થઈ શકે છે. આ સિસ્ટમની અસર ગુજરાત સુધી પહોંચે તો દક્ષિણ ગુજરાતમાં માવઠું જોવા મળી શકે છે. ઉપરાંત 19 નવેમ્બરથી અરબ સાગરમાં નબળી દબાણની સિસ્ટમ ઊભી થવાની સંભાવનાઓ છે. જેના કારણે પવનની દિશા–પ્રવાહ બદલાઈને ભેજમાં વધારો થઈ શકે છે.

આ પણ વાંચો: શ્રી અમિત શાહ દ્વારા 'કો-ઓપ કુંભ 2025' નું ઉદ્દઘાટન

ડિસેમ્બરમાં કાતિલ ઠંડી, એકાદ-બે રાઉન્ડ વરસાદની સંભાવના

અંબાલાલ પટેલના અનુમાન મુજબ રાજ્યમાં 18 ડિસેમ્બર સુધી એકાદ-બે રાઉન્ડ વરસાદ પડી શકે છે. પશ્ચિમી વિક્ષેપ સક્રિય બનતા રાજયનું હવામાન ભેજવાળું અને અચાનક બદલાઈ શકે છે. જે ખેતી માટે મહત્વપૂર્ણ સાબિત થઈ શકે છે. તેમના કહેવા મુજબ 22 ડિસેમ્બર બાદ ‘કાતિલ ઠંડી’નું જોર વધશે અને ઉત્તર તરફથી આવતા પવનોના કારણે રાત્રિના તાપમાનમાં ભારે ઘટાડો થશે. ખાસ કરીને 27 ડિસેમ્બર આસપાસ અને પછી 11 જાન્યુઆરીએ રાજ્યના મોટા ભાગના જિલ્લામાં ‘હાડ-થીજાવતી’ ઠંડી પડવાની શક્યતા વ્યક્ત કરવામાં આવી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ