છબરડો / BCA સેમેસ્ટર 5નું પેપર અચાનક કરવામાં આવ્યું રદ, 2200 વિદ્યાર્થીઓને ફરી આપવી પડશે પરીક્ષા

BCA Sem 5 Paper Cancelled : સૌરાષ્ટ્ર યુનિવર્સિટીમાં BCA સેમેસ્ટર-5ના વિદ્યાર્થીઓ માટે એક મોટી અપડેટ સામે આવી છે. વિગતો મુજબ ‘પ્રોગ્રામિંગ ઇન પાયથન’ વિષયનું થિયરી પેપર રદ કરવામાં આવ્યું છે અને હવે 22 નવેમ્બર ના રોજ ફરીથી આ પરીક્ષા લેવામાં આવશે. આ નિર્ણયથી કુલ 2200 વિદ્યાર્થીઓ પર સીધી અસર થશે.

શું છે સમગ્ર મામલો?

જામનગરની એચ.જે. દોશી કોલેજમાં લેવાયેલ ઇન્ટરનલ પરીક્ષાનું જ એ જ પેપર બાદમાં સૌરાષ્ટ્ર યુનિવર્સિટી દ્વારા લેવાયેલી ફાઇનલ પરીક્ષામાં આપવામાં આવ્યું હતું. વિદ્યાર્થીઓ તથા ABVPના કાર્યકર્તાઓ દ્વારા તેનો વિરોધ થવા પામ્યો હતો અને આ મુદ્દો ચર્ચામાં આવ્યો.

વિષયને ગંભીરતાથી લઈને યુનિવર્સિટીએ તપાસ હાથ ધરી હતી. તપાસમાં સ્પષ્ટ થયું કે, ઇન્ટરનલ પરીક્ષાનું અને ફાઇનલ પરીક્ષાનું બંને પેપર એકસરખું હતું. આ મોટો ગેરરીતિનો મુદ્દો સામે આવતા યુનિવર્સિટી પાસે પેપર રદ કરવાનો વિકલ્પ સિવાય બીજો રસ્તો ન રહ્યો.

યુનિવર્સિટીના નિર્ણયની સત્તાવાર જાહેરાત

સૌરાષ્ટ્ર યુનિવર્સિટીના ઇન્ચાર્જ પરીક્ષા નિયામક ડૉ. મનીષ શાહે આ અંગે સત્તાવાર પરિપત્ર જાહેર કર્યો છે. પરિપત્ર પ્રમાણે પેપર ફરીથી લઈ વિદ્યાર્થીઓને યોગ્ય અને સ્વચ્છ પરીક્ષા પ્રદાન કરાશે.

વિદ્યાર્થીઓ પર શું અસર?

• 2200 વિદ્યાર્થીઓને ફરી એકવાર ‘પ્રોગ્રામિંગ ઇન પાયથન’નું પેપર આપવું પડશે.
• 22 નવેમ્બરનું રિવાઈઝ્ડ પરીક્ષા શિડ્યૂલ જલદીથી તમામ કોલેજોમાં મોકલાશે.
• વિદ્યાર્થીઓને સલાહ આપવામાં આવી છે કે, તેઓ અપડેટ્સ માટે પોતાની કોલેજ અને યુનિવર્સિટીનો સંપર્કમાં રહે.

આ પણ વાંચો : દિલ્હી-મુંબઈ એક્સપ્રેસ હાઇવે પર ભીષણ અકસ્માતની ઘટના, બે ગુજરાતીઓના મોત

આ ઘટનાને લઈને થોડા દિવસો પહેલા ABVPના કાર્યકર્તાઓએ યુનિવર્સિટી સામે વિરોધ નોંધાવ્યો હતો. તેમના કહેવા મુજબ, આવી ભૂલો વિદ્યાર્થીઓના ભવિષ્ય સાથે રમવા જેવી છે અને જવાબદાર તંત્ર સામે પગલાં લેવાં જોઈએ. એક નાનકડી ગેરવહીવટી ભૂલને કારણે 2200 વિદ્યાર્થીઓને ફરી પરીક્ષા આપવાની જરૂર પડી છે. જોકે પારદર્શિતા અને ન્યાય માટે યુનિવર્સિટીના આ નિર્ણાયની પ્રશંસા પણ થઈ રહી છે. હવે તમામની નજર 22 નવેમ્બરના પુનઃપરીક્ષાના આયોજન પર છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ