દુર્ઘટના / વહેલી સવારે બાઇક-રિક્ષા વચ્ચે ટક્કર બાદ બંને વાહનોમાં ભયાનક આગ, મહિલા જીવતી ભૂંજાઈ, 4 ગંભીર

Bike Rickshaw Accident : અંકલેશ્વરથી વહેલી સવારે એક દુખદ અકસ્માતના સમાચાર સામે આવ્યા છે. વિગતો મુજબ અંકલેશ્વર-વાલિયા રોડ પર આવેલા કોસમડી ગામ પાસે આજે એટલે કે 12 ડિસેમ્બર અને શુક્રવારની સવારે એક દર્દનાક દુર્ઘટનામાં એક મહિનાનું કરૂણ મોત થયું છે. મળતી માહિતી પ્રમાણે આજે સવારે એક બાઇક અને રિક્ષા વચ્ચે થયેલી જોરદાર ટક્કરમાં બંને વાહનોમાં આગ ભભૂકી ઉઠી હતી. જોકે આ કાળમુખી આગમાં એક મહિલા જીવતી ભૂંજાઈ ગઈ હોવાનું પણ સામે આવ્યું છે. આ સાથે અન્ય ચાર લોકો ગંભીર રીતે દાઝી જતાં તેમને ત્વરિત સારવાર અર્થે નજીકની હોસ્પિટલમાં ખસેડવામાં આવ્યા હતા.

જોત જોતાંમાં મહિલા જીવતી ભૂંજાઈ

આ ઘટનાની પ્રાથમિક માહિતી પ્રમાણે આજે સવારે થયેલ કોસમડી પાસે બાઇક અને રિક્ષા અચાનક ટકરાયા હતાં. જોકે આ અકસ્માતમાં બાઇક અને રિક્ષા બંનેમાં આગ ભભૂકી ઉઠી હતી. આ તરફ એક કરુણ અને દુખદ ઘટના તો એ બની કે રિક્ષામાં સવાર એક મહિલાને બહાર નીકળવાનો મોકો પણ ન મળ્યો અને તે રિક્ષામાં જ જીવતી ભૂંજાઈ જતાં મોત થયું છે. આ તરફ આ ઘટનામાં ચારેક લોકો પણ આગને ઝપેટમાં આવતા ગંભીર રીતે ઇજાગ્રસ્ત થયા સારવાર અર્થે ખસેડાયા હતા.

આ પણ વાંચો : તળાવમાં નહાવા ગયેલ 7 કિશોરો પૈકી 3નું ડૂબી જતાં મોત, પરિજનો સહિત પંથકમાં શોક

સ્થાનિકોના મત મુજબ બાઇક અને રિક્ષાએ એકસાથે ટર્ન મારતા હોવાથી અકસ્માત થયો હતો. ઘટનાની માહિતી મળતા જ જીઆઇડીસી પોલીસ ઘટનાસ્થળે પહોંચી હતી. આ તરફ રિક્ષામાં જ જીવતી ભૂંજાઈ ગયેલ મહિલાનો મૃતદેહ કબજે લઈને વધુ તપાસ હાથ ધરી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ