આમ જનતાને રાહત / પનીર, ઘી, સાબુ, શેમ્પુથી માંડીને કાર અને એસી...આજથી સસ્તી થઈ આ ચીજો, નવો GST રેટ લાગુ

દેશમાં હવે સોંઘવારીનો પવન ફુંકાયો છે કારણ કે એક ઝાટકે ઘણી બધી વસ્તુઓ સસ્તી થઈ ગઈ છે. પહેલી વાર આટલી મોટી માત્રામાં ચીજવસ્તુઓ સસ્તી થઈ છે. આજથી એટલે કે 22 સપ્ટેમ્બરથી દેશમાં જીએસટીના નવા દર અમલી બન્યાં છે, હવેથી ફક્ત 5 અને 18 ટકા એમ બે જ સ્લેબમાં જીએસટી વસુલાશે જેને પરિણામે ખાવા-પીવાથી માંડીને મોજ-શૌખની ઘણી બધી વસ્તુઓ સસ્તી થઈ ગઈ છે. આટલી મોટી માત્રામાં ચીજવસ્તુઓ સસ્તી થવાને કારણે મિડલ ક્લાસને મોટી રાહત મળી છે.

કઈ વસ્તુઓના ભાવ ઘટશે?

1. સાબુ ​​અને શેમ્પૂ જેવી રોજિંદા ઉપયોગની વસ્તુઓ
2. ખોરાક અને પીણાં
3. ઇલેક્ટ્રોનિક સામાન
4. કાર
5. સિમેન્ટ
6. ટીવી અને એસી
7. 33 આવશ્યક દવાઓ, ખાસ કરીને કેન્સર અને ગંભીર બીમારીઓ માટે
8. 350cc સુધીની નાની કાર અને મોટરસાયકલ
9. આ ઉપરાંત બીજી નાની મોટી ઘણી વસ્તુઓના ભાવ ઘટશે.

કઈ ચીજ પર કેટલો ટેક્સ?

1. સિમેન્ટ પરનો ટેક્સ 28%થી ઘટાડીને 18% જેનાથી ઘર બનાવવાનો કે સમારકામનો ખર્ચ ઘટશે
2. ટીવી અને એસી જેવી વસ્તુઓ પરનો ટેક્સ 28%થી ઘટાડીને 18% જેનાથી તે સસ્તા થશે
3. 33 આવશ્યક દવાઓ પર કોઈ ટેક્સ નહીં જેમાં કેન્સર અને ગંભીર રોગોની દવાઓ સામેલ
4. 350 સીસી સુધીની નાની કાર અને મોટરસાયકલ પર હવે 28%ને બદલે 18% ટેક્સ
5. ઓટો પાર્ટ્સ અને થ્રી-વ્હીલર પરનો ટેક્સ પણ 28%થી ઘટાડીને 18% જેનાથી તે સસ્તા થશે.

લક્ઝરી ચીજો પર 40 ટકા ટેક્સ

જોકે સરકારે કેટલીક ચીજવસ્તુઓ પર 40 ટકા ટેક્સ લાગુ પાડ્યો છે જેમાં તમાકુ, પાન મસાલા, કાર્બોનેટેડ પીણાં અને વ્યક્તિગત ઉપયોગ માટે મોટી કાર અને વિમાન જેવી લક્ઝરી ચીજવસ્તુઓ સામેલ છે. અર્થાત આ બધી ચીજવસ્તુઓ પર 40 ટકા ટેક્સ વસૂલાશે.

જૂના સ્ટોક પર સુધારવી પડશે MRP

સરકારે કહ્યું છે કે જૂના સ્ટોક પર MRP વધારે હોવા છતાં, આ માલ નવા દરે ઉપલબ્ધ થશે. ગ્રાહકોને ઘટાડેલા GST દરનો લાભ આપવો પડશે. દરમિયાન, દવાઓ માટે, નેશનલ ફાર્માસ્યુટિકલ પ્રાઇસિંગ ઓથોરિટી (NPPA) એ 12 અને 13 સપ્ટેમ્બરના રોજના તેના આદેશોમાં કહ્યું છે કે દવાઓનું ઉત્પાદન અને વેચાણ કરતી બધી કંપનીઓએ દવાઓ, ફોર્મ્યુલેશન અને તબીબી ઉપકરણોની MRP અપડેટ કરવી પડશે. GSTમાં ફેરફાર પછી, સુધારેલી કિંમત સૂચિ ડીલરો, રિટેલર્સ, રાજ્ય દવા નિયંત્રકો અને સરકારને આપવી પડશે, જેથી તે ગ્રાહકોને બતાવી શકાય.

વધુ વાંચો : ભારત-પાક મેચ પહેલાં અભિષેક શર્મા-શુભમન ગિલ પર છોકરીનો આવ્યો વીડિયો કોલ, પડ્યો ધ્રાસકો પછી...

દુકાનદાર GST ઘટાડાનો લાભ ન ​​આપે તો શું કરવું?

જો કોઈ દુકાનદાર કિંમત ઘટાડાનો લાભ ગ્રાહકો સુધી ન પહોંચાડે, તો તમે ફરિયાદ કરી શકો છો. દોષિત દુકાનદારોને દંડ અથવા જેલની સજા પણ થઈ શકે છે. તમે નેશનલ કન્ઝ્યુમર હેલ્પલાઇન ૧૮૦૦-૧૧-૪૦૦૦ પર ફોન કરીને ફરિયાદ નોંધાવી શકો છો અથવા તમે CBIC ની GST હેલ્પલાઇન 1800-1200-232 પર પણ ફોન કરી શકો છો. તે ઉપરાંત તમે નેશનલ એન્ટી-પ્રોફિટિયરિંગ ઓથોરિટીની વેબસાઇટ પર પણ ફરિયાદ નોંધાવી શકો છો આ માટે તમારે બિલની નકલ, દુકાનદારનું નામ અને તેનું સરનામું આપવું પડશે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ