સાવધાન / DL એક્સપાયર થઈ ગયું છે? ઘરે બેઠા આ રીતે કરો રિન્યુઅલ, 1 વર્ષની બેદરકારી લાઈસન્સ કરી શકે છે રદ!

જો તમે વાહન ચલાવો છો, તો ડ્રાઈવિંગ લાઈસન્સ (DL) તમારા માટે સૌથી મહત્વનો દસ્તાવેજ છે. ઘણીવાર લોકો લાઈસન્સ એક્સપાયર થયા પછી પણ તેને રિન્યુ કરાવવામાં આળસ કરે છે, પરંતુ આ બેદરકારી ભારે પડી શકે છે. મોટર વાહન નિયમો અનુસાર, વેલિડ લાઈસન્સ વગર ગાડી ચલાવવી એ ગુનો છે. જો તમારું લાઈસન્સ એક્સપાયર થઈ ગયું હોય અને તમે લાંબા સમય સુધી તેને રિન્યુ ન કરાવો, તો તમારું લાઈસન્સ રદ પણ થઈ શકે છે.

DL ની વેલિડિટી કેટલા સમયની હોય છે?

સામાન્ય રીતે ડ્રાઈવિંગ લાઈસન્સ શરૂઆતમાં 20 વર્ષ અથવા વ્યક્તિની 40 વર્ષની ઉંમર થાય ત્યાં સુધી માન્ય ગણાય છે. ત્યારબાદ તેને દર 10 વર્ષે રિન્યુ કરાવવું પડે છે. જો તમારી ઉંમર 50 વર્ષ વટાવી ગઈ હોય, તો લાઈસન્સની માન્યતા ઘટીને માત્ર 5 વર્ષની થઈ જાય છે. જો લાઈસન્સ એક્સપાયર થઈ જાય, તો સરકાર 30 દિવસનો 'ગ્રેસ પીરિયડ' આપે છે, જેમાં કોઈ વધારાના દંડ વગર રિન્યુઅલ કરાવી શકાય છે. જો આ સમય વીતી જાય, તો વધારાની ફી ચૂકવવી પડે છે.

એક વર્ષથી વધુ વિલંબ થશે તો શું થશે?

સૌથી મહત્વનો નિયમ એ છે કે જો લાઈસન્સ એક્સપાયર થયાને 1 વર્ષથી વધુ સમય થઈ ગયો હોય, તો મુશ્કેલી વધી શકે છે. આવી સ્થિતિમાં તમારું લાઈસન્સ રદ થઈ શકે છે અને તમારે ફરીથી નવું લાઈસન્સ કઢાવવાની આખી પ્રક્રિયા (લર્નિંગથી લઈને પાકા લાઈસન્સ સુધી) ફરીથી કરવી પડી શકે છે. એટલું જ નહીં, તમારે ફરીથી ડ્રાઈવિંગ ટેસ્ટ પણ આપવો પડી શકે છે.

ઓનલાઈન રિન્યુ કરવાની સરળ રીત

• હવે લાઈસન્સ રિન્યુ કરાવવાની પ્રક્રિયા સંપૂર્ણ ડિજિટલ થઈ ગઈ છે:
• સડક પરિવહન મંત્રાલયની સત્તાવાર વેબસાઈટ પર જાઓ.
• 'Driving License Related Services' વિકલ્પ પસંદ કરો.
• તમારું રાજ્ય પસંદ કરો.
• DL નંબર અને જન્મ તારીખ નાખતા જ તમારી જૂની વિગતો સ્ક્રીન પર દેખાશે.
• 'Renewal' વિકલ્પ પસંદ કરી જરૂરી ડોક્યુમેન્ટ્સ અપલોડ કરો.
• ઓનલાઈન ફી ભરો અને રસીદ સાચવી રાખો.

આ પણ વાંચોઃ ''જ્યારે મારો પૂરો શો આવશે ત્યારે...'', રોહિત શર્મા કરવા જઇ રહ્યાં છે ટીવી ડેબ્યૂ

કયા ડોક્યુમેન્ટ્સની જરૂર પડશે?

રિન્યુઅલ માટે જૂનું ડ્રાઈવિંગ લાઈસન્સ, ઓળખ પત્ર (જેમ કે આધાર કાર્ડ), એડ્રેસ પ્રૂફ, પાસપોર્ટ સાઈઝ ફોટો અને ડિજિટલ સિગ્નેચરની જરૂર પડશે. જો તમારી ઉંમર 40 વર્ષથી વધુ હોય, તો તમારે મેડિકલ સર્ટિફિકેટ (ફોર્મ 1-એ) પણ જમા કરાવવું પડશે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ