અમદાવાદ / ખાદ્યતેલના ભાવમાં ફરી ભડકો, ગૃહિણીનું ગણિત બગડ્યું, જાણો સિંગતેલ-કપાસિયાનો ભાવ

જન્માષ્ટમી સહિતના તહેવારોની ઉજવણી માટે ઘરોમાં મિષ્ટાન્ન અને ફરસાણની તૈયારીઓ શરૂ થાય તે પહેલાં જ ખાદ્યતેલના ભાવમાં ફરી તેજી આવી છે. શહેરના તેલબજારમાં સિંગતેલનો ડબો રૂ.૫૦ વધીને રૂ.૨૮૫૦થી રૂ.૨,૯૦૦એ પહોંચ્યો છે. કપાસિયા તેલમાં પણ રૂ.૫૦નો ઉછાળો નોંધાતાં ભાવ રૂ.૨,૭૯૫ અને પામોલિન રૂ.૨,૩૬૫ થયા છે. તહેવારોમાં તેલનો વપરાશ વધવાનો છે ત્યારે ભાવવધારાએ ખાસ કરીને મધ્યમ વર્ગના ઘરનું બજેટ ખોરવી નાખ્યું છે.

ગુજરાતમાં સારા વરસાદને કારણે મગફળીનું વાવેતર આશાસ્પદ હોવા છતાં નવી મગફળીની આવક મોડી થવાની શક્યતા છે. બજારના વેપારીઓના મતે નવી મોસમની નોંધપાત્ર આવક નવરાત્રી બાદ શરૂ થવાની સંભાવના હોવાથી હાલના સમયગાળામાં માલની ઉપલબ્ધતા અને ભાવ અંગેની અટકળો બજારમાં તેજીનું વાતાવરણ ઊભું કરી રહી છે.

આ પણ વાંચોઃ હવેથી ગિરનાર પર સિંહોથી યાત્રિકોને બચાવવા તૈનાત કરાશે 25 ટ્રેકર્સ

જન્માષ્ટમીના તહેવારમાં અનેક પ્રકારનાં ફરસાણ સહિત ગાંઠિયા જેવી સૌથી વધુ વપરાતી કે વેચાતી વાનગીઓમાં તેલનો વપરાશ સામાન્ય દિવસોની સરખામણીએ વધી જાય છે. પરિણામે ડબાદીઠ ભાવમાં થયેલો આ વધારો સીધો જ ઘરગથ્થુ ખર્ચ પર અસર કરશે. એક તરફ દૂધ, ઘી, શાકભાજી અને અન્ય જીવનજરૂરી ચીજોના ભાવમાં વધઘટ વચ્ચે હવે રસોડાનું સૌથી મહત્વનું ઘટક ગણાતું ખાદ્યતેલ પણ મોંઘું થતાં તહેવાર પહેલાં જ પરિવારોને વધારાનો ખર્ચ સહન કરવો પડશે. આગામી દિવસોમાં ભાવમાં વધુ ઉછાળો આવે છે કે નહીં તેના પર વેપારીઓ અને ગ્રાહકોની નજર છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ