ઇલેક્શન 2022 / ગુજરાતમાં આ દ્રશ્યો ભાજપનું ટેન્શન વધારશે, બે મહત્વપૂર્ણ બેઠક પર નારાજ લોકોએ જુઓ શું કર્યું

• બે મહત્વપૂર્ણ બેઠક પર નારાજ લોકોએ ઉમેદવારનો કર્યો વિરોધ 
• અમદાવાદના અમરાઇવાડી વિસ્તારમાં ભાજપ ઉમેદવારનો વિરોધ
• ધારી વિધાનસભા બેઠકમાં જે.વી.કાકડિયા સામે રોષ

ગુજરાત વિધાનસભા ચૂંટણીના મતદાનને હવે ગણતરીના દિવસો બાકીર રહ્યાં છે ત્યારે તમામ પક્ષના ઉમેદવારોએ જનતાને રિઝવવા જોરશોરથી પ્રચાર-પ્રસાર શરૂ કરી દીધો છે. આ દરમિયાન અનેક ઉમેદવારોનો સ્થાનિકોના વિરોધનો પણ સામનો કરવો પડી રહ્યો છે. ત્યારે અમરેલીની ધારી વિધાનસભા બેઠકના ભાજપના ઉમેદવાર જે.વી.કાકડિયા અને અમદાવાદના અમરાઈવાડી વિસ્તારમાં પણ ભાજપના ઉમેદવાર ડો.હસમુખ પટેલને  લોકરોષનો ભોગ બનવાનો વારો આવ્યો હોવાનું સામે આવ્યુ છે. 

ધારીમાં જે.વી.કાકડિયાનો સ્થાનિકોએ વિરોધ કર્યો 
ધારી વિધાનસભા બેઠકમાં ભાજપના ઉમેદવાર જે.વી.કાકડિયાનો સ્થાનિકોએ વિરોધ કર્યો હતો. સ્થાનિકોએ રસ્તો બનાવવા માટે રજૂઆત કરી છે. જે.વી.કાકડીયાનો સભામાં ધારી બેઠકના ગામડાઓમાં સ્થાનિકો દ્વારા વિરોધ કરાયો હતો. રોડ રસ્તાઓના મુદ્દાઓને લઈને સભામાં લોકો આકરા પાણીએ થયા હતા. એટલુ જ નહિ ગામડાઓના રોડ રસ્તાઓ સુધારો પછી મત માંગવાની વાત કહી હતી. બીજી બાજુ ખાતર અને ગેસ સિલિન્ડરના ભાવો વધતા હોવાનો સ્થાનીકોમાં રોષ ઉઠ્યો હતો.

 
અમદાવાદમાં ભાજપ ઉમેદવારનો વિરોધ
બીજી બાજુ અમદાવાદના અમરાઈવાડી વિસ્તારમાં પણ ભાજપના ઉમેદવાર ડો.હસમુખ પટેલનો સ્થાનિકોએ વિરોધ કર્યો હતો. હાટકેશ્વર સર્કલ વિસ્તારમાં શીતલનગર, બળિયાનગર અને અંબિકાનગરમાં વિરોધ કરાયો હતો. પ્રાથમિક સુવિધાના અભાવે સ્થાનિકોમાં રોષનો જ્વાળા ભભૂકયો હતો. અને આથી ડોર ટૂ ડોર પ્રચાર દરમિયાન ભાજપના કાર્યકરો અને ઉમેદવારનો સ્થાનિકોએ વિરોધ કર્યો હતો. આપને જણાવી દઈએ કે, છેલ્લા ઘણા વર્ષોથી અમરાઇવાડી વિસ્તારમાં ભાજપની પકડ છે.