- ધીરેન્દ્ર શાસ્ત્રીએ વિરોધીઓને આપ્યો પડકાર
- 'કોઈપણ ધર્મ કે પંથનો વ્યક્તિ આવીને સામનો કરી લે'
- કહ્યું એકને પકડશું તો 25ને કરન્ટ લાગી જશે
મધ્યપ્રદેશમાં બાગેશ્વરધામનાં ધીરેન્દ્ર શાસ્ત્રીએ પોતાના વિરોધીઓને ચેલેન્જ આપી છે. તેમણે કહ્યું કે 'અમે અમારા ગુરુજીનાં પ્રતાપ અને બાલાજી સરકારનાં બળ પર પ્રણ લઈને કહીએ છીએ કે કોઈપણ ધર્મ કે પંથનો વ્યક્તિ આવીને અમારો સામનો કરી લે. અમે તેને લલકારીએ છીએ. ચમત્કાર દેખાડનારાને અમે પકડશું પણ નહીં અને ભીનો કરી દેશું.! તેથી અમારી પ્રાર્થના છે કે અમારી સામે આવો તો એટલું જ પૂછજો જેટલું તમે સાંભળી શકો. પછી ન કહેતાં કે ગુરુજીએ અમારી પોલ ખોલી દીધી.'
'એક વ્યક્તિને પણ પકડશું તો 25ને કરન્ટ લાગી જશે'
શાસ્ત્રીએ કહ્યું કે અમારી પાસે તો કોઈ તાકાત નથી પરંતુ ગુરુનો પ્રતાપ અને પ્રસાદ મળ્યો છે. તેનાં પ્રણ લઈને કહીએ છીએ કે સનાતન ધર્મનાં સંતોને છોડીને કોઈપણ વ્યક્તિ અમારો સામનો કરી લે. અમે એક વ્યક્તિને પણ પકડશું તો 25ને કરન્ટ લાગી જશે. મોઢું દેખાડવા લાયક નહીં છોડીએ. મને અમારા બાલાજી પર અને સન્યાસી બાબા પર વિશ્વાસ છે.
સૂરતનાં હીરાનાં વેપારીએ શાસ્ત્રીને આપી હતી ચેલેન્જ
હાલમાં જ સૂરતનાં એક હીરાનાં વેપારી જનક બાવળિયાએ સોશિયલ મીડિયા પર એક વીડિયો અપલોડ કર્યો હતો. તેમાં તેણે કહ્યું હતું કે બાગેશ્વર ધામનાં ધીરેન્દ્ર શાસ્ત્રી ગુજરાત આવી રહ્યાં છે. તેમનો પહેલો કાર્યક્રમ સૂરતનાં લિંબાયત વિસ્તારમાં છે જ્યાં તેઓ તેમને મળવા ઈચ્છે છે. તેમણે શાસ્ત્રીને પડકારતાં કહ્યું કે જો તેઓ પોતાના દિવ્ય દરબારમાં સૌની સામે જણાવી દેશે કે તેમના હાથમાં રહેલા પેકેટમાં કેટલા હીરાઓ છે તો શાસ્ત્રીની દિવ્ય શક્તિઓનો તે સ્વીકાર કરી લેશે. સાથે જ તેમનાં ચરણોમાં 2 કરોડ હીરા અર્પિત કરશે. જો કે અત્રે ઉલ્લેખનીય છે કે થોડા સમયમાં જ વેપારીએ અંગત કારણોસર વિવાદનો અંત લાવવા સામેથી જણાવ્યું હતું.
