નેશનલ / દિલ્હીમાં AQI વધતાં 50% સ્ટાફને Work From Home, સ્કૂલો હાઇબ્રિડ મોડમાં, પ્રદૂષણના સ્તર પ્રમાણે લાગુ થશે નવા GRAP નિયમો

દિલ્હી-NCRમાં શિયાળો શરૂ થતાં જ હવાની ગુણવત્તા ખરાબ થવાની ચિંતા વધી છે. પ્રદૂષણ વધે ત્યારે AQIના સ્તર પ્રમાણે નવા GRAP નિયમો હેઠળ WFH અને સ્કૂલોમાં હાઇબ્રિડ મોડ જેવા પગલાં લાગુ થઈ શકે છે.નવા GRAPનો હેતુ પ્રદૂષણ ગંભીર બન્યા પછી અચાનક પગલાં લેવાને બદલે AQIના અલગ-અલગ સ્તરે અગાઉથી નક્કી કરાયેલા ઉપાયો તબક્કાવાર લાગુ કરવાનો છે. એટલે કે દિલ્હીમાં હવાની ગુણવત્તા જેટલી ખરાબ થશે, તેટલી વધુ કડકાઈ લાગુ થશે.

AQI 201થી 300 હોય ત્યારે સ્ટેજ-1

AQI 201થી 300 વચ્ચે હોય ત્યારે હવાની ગુણવત્તા 'ખરાબ' શ્રેણીમાં ગણાશે. આ સ્થિતિમાં પ્રદૂષણને કાબૂમાં લેવા માટે શરૂઆતના સ્તરના પ્રતિબંધો લાગુ થશે.

AQI 301થી 400 હોય ત્યારે સ્ટેજ-2

AQI 301થી 400 વચ્ચે પહોંચે ત્યારે હવાની ગુણવત્તા 'ખૂબ ખરાબ' ગણાશે. સ્ટેજ-1ની સરખામણીએ વધુ કડક પગલાં લેવામાં આવશે. વાહનો, ધૂળ અને બાંધકામની પ્રવૃત્તિઓ પર વધારાના પ્રતિબંધો લાગુ કરવામાં આવશે.

AQI 401થી 450 હોય ત્યારે સ્ટેજ-3

AQI 401થી 450 વચ્ચે પહોંચે ત્યારે હવા 'ગંભીર' શ્રેણીમાં ગણાશે. આ તબક્કામાં બાંધકામ સહિત પ્રદૂષણ ફેલાવતી પ્રવૃત્તિઓ પર વધુ કડક પ્રતિબંધો લાગુ થશે.

AQI 450થી ઉપર જાય ત્યારે સ્ટેજ-4

AQI 450થી ઉપર પહોંચે ત્યારે 'ગંભીર પ્લસ' સ્થિતિ ગણાશે. આ દરમિયાન દિલ્હી-NCRમાં GRAP હેઠળ સૌથી વધુ પ્રતિબંધો લાગુ થશે.

GRAPમાં કુલ 48 એક્શન પોઈન્ટ

CAQMના સુધારેલા GRAPમાં કુલ 48 એક્શન પોઈન્ટ રાખવામાં આવ્યા છે. તેમાં સ્ટેજ-1માં 25, સ્ટેજ-2માં 8, સ્ટેજ-3માં 10 અને સ્ટેજ-4માં 5 પ્રકારની કાર્યવાહી સામેલ છે. દરેક સ્ટેજ માટે સામાન્ય લોકો માટે Citizen Charter પણ આપવામાં આવ્યું છે, જેમાં પ્રદૂષણના અલગ-અલગ સ્તરે શું કરવું અને કઈ બાબતોથી બચવું તેની માહિતી આપવામાં આવી છે.

પ્રદૂષણ વધશે તો પાર્કિંગ ફી વધી શકે

પ્રદૂષણ વધે ત્યારે ખાનગી વાહનોનો ઉપયોગ ઘટાડવા માટે પાર્કિંગ ફી વધારવાની જોગવાઈ પણ GRAPમાં છે. ગંભીર તબક્કામાં રજિસ્ટર્ડ પાર્કિંગ સ્થળો પર પાર્કિંગ ચાર્જ વધારી શકાય છે. તેનો હેતુ લોકોને ખાનગી વાહનોની જગ્યાએ જાહેર પરિવહનનો ઉપયોગ કરવા પ્રોત્સાહિત કરવાનો છે.

સ્કૂલોમાં હાઇબ્રિડ અભ્યાસનો વિકલ્પ

પ્રદૂષણની સ્થિતિ ગંભીર બનશે ત્યારે દિલ્હી ઉપરાંત ગુરુગ્રામ, ફરીદાબાદ, ગાઝિયાબાદ અને ગૌતમ બુદ્ધ નગરમાં ધોરણ 5 સુધીના બાળકો માટે હાઇબ્રિડ અભ્યાસનો વિકલ્પ લાગુ થઈ શકે છે. એટલે બાળકો જરૂરિયાત મુજબ સ્કૂલમાં જઈને અથવા ઓનલાઇન અભ્યાસ કરી શકશે.જો AQI 450ને પાર જાય અને સ્ટેજ-4 લાગુ થાય તો ધોરણ 6થી 9 અને ધોરણ 11ના વિદ્યાર્થીઓ માટે પણ હાઇબ્રિડ ક્લાસનો વિકલ્પ લાગુ થઈ શકે છે.

ઓફિસમાં 50% સ્ટાફ, બાકીના Work From Home

પ્રદૂષણની સ્થિતિ અત્યંત ગંભીર બનશે ત્યારે સરકારી, મ્યુનિસિપલ કોર્પોરેશન અને ખાનગી ઓફિસોમાં 50 ટકા કર્મચારીઓ સાથે કામ ચલાવવાનો નિર્ણય લેવામાં આવી શકે છે. બાકીના કર્મચારીઓને Work From Home આપવામાં આવી શકે છે. તેનો હેતુ રસ્તા પર ખાનગી અને કોમર્શિયલ વાહનોની સંખ્યા ઘટાડવાનો છે.

આ પણ વાંચોઃ લગ્નમાં ભેટ તરીકે મળ્યું 10 લાખ રોકડા ભરેલું કવર, ઉડી ગયા દુલ્હાના હોશ, સુહાગરાતે જ ચિંતા

AQI 450 પાર થતાં ટ્રકો પર કડક પ્રતિબંધ

સ્ટેજ-4માં દિલ્હી શહેરમાં ટ્રકોની એન્ટ્રી પર કડક રોક લાગશે. નિર્ધારિત કેટેગરીના સ્વચ્છ ઇંધણવાળા અને BS-6 ધોરણવાળા વાહનોને જ મંજૂરી આપવામાં આવશે. BS-4 અને તેનાથી જૂના ડીઝલવાળા ભારે માલવાહક વાહનો પર પણ કડક કાર્યવાહી થશે. બાંધકામ અને તોડફોડના કામો પર સ્ટેજ-3 કરતાં પણ વધુ પ્રતિબંધો લાગશે.

સ્ટેજ-3માં જરૂરી જાહેર કામોને રાહત

સુધારેલા GRAPમાં સ્ટેજ-3 દરમિયાન કેટલાક જરૂરી જાહેર કામોને રાહત આપવામાં આવી છે. રસ્તાના ખાડા પૂરવા અને જરૂરી મરામત જેવા કામો નક્કી કરાયેલા નિયમો અને પ્રદૂષણ નિયંત્રણના પગલાં સાથે ચાલુ રાખી શકાશે.

નવેમ્બર-ડિસેમ્બરના રમતગમતના કાર્યક્રમો પર પણ નજર

CAQMએ 10 સપ્ટેમ્બરે જાહેર કરેલી એડવાઇઝરીનો પણ ઉલ્લેખ કર્યો છે. તેમાં NCRમાં નવેમ્બર અને ડિસેમ્બર દરમિયાન યોજાનારી ફિઝિકલ સ્પોર્ટ્સ ટુર્નામેન્ટની તારીખો હવાની ગુણવત્તાને ધ્યાનમાં રાખીને બદલવાની સલાહ આપવામાં આવી હતી. ખાસ કરીને સ્કૂલના બાળકોના સ્વાસ્થ્યને ધ્યાનમાં રાખીને રમતગમતના કાર્યક્રમોની તારીખ નક્કી કરતી વખતે પ્રદૂષણની સ્થિતિ પર નજર રાખવા જણાવાયું છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ