મોહનથાળ વિવાદ / 'અત્યારે તો મંદિર પ્રસાદ બનાવી રહી છે, અન્ય કોઈ એજન્સીને આ કામ નથી સોંપાયું પરંતુ...', બનાસકાંઠાના કલેક્ટરે જુઓ શું કહ્યું

• અંબાજી મંદિરના પ્રસાદ માટેના ઘીના સેમ્પલ ફેલ
• મંદિરની ટીમ દ્વારા જ મોહનથાળ બનાવવાનું કામ શરૂ 
• હાલમાં કોઈ એજન્સીને કામ નથી સોંપાયું: કલેક્ટર 

Ambaji Prasadi controversy: અંબાજી મંદિરમાં મોહનથાળના પ્રસાદને લઈને ફરી એકવાર વિવાદ સર્જાયો છે. અંબાજી ભાદરવી પૂનમના મેળા પહેલા ફૂડ વિભાગ દ્વારા મોહનથાળ બનાવવામાં ઉપયોગમાં આવતા ઘીના સેમ્પલ લેવામાં આવ્યા હતા. જે સેમ્પલ ફેલ થયા હતા. મોહનથાળ પ્રસાદનો મામલો ફરી એકવાર ગરમાતા મોહનથાળ બનાવતી કંપની મોહિની કેટરર્સનું ટેન્ડર રિન્યું કરાયું નથી. આજથી મોહનથાળનો પ્રસાદ અંબાજી મંદિર ટ્રસ્ટ દ્વારા જ બનાવવાનું કામ શરૂ કરાયું છે. અત્યાર સુધી મોહનથાળનો પ્રસાદ બનાવતા મોહિની કેટરર્સને પ્રસાદઘરથી દૂર રહેવાનો આદેશ આપવામાં આવ્યો છે. મોહનથાળ પ્રસાદ મુદ્દે બનાસકાંઠા કલેક્ટર વરૂણકુમાર બરનવાલનું નિવેદન પણ સામે આવ્યું છે.  તેઓએ જણાવ્યું છે કે, ભાદરવી પૂનમના મેળા દરમિયાન પ્રસાદની ક્વોલિટીમાં કોઈ કોમ્પ્રોમાઇઝ કરવામાં આવ્યું નથી. અમારા માણસો જ્યાં પ્રસાદ બનતો હતો, ત્યાં 24 કલાક હાજર જ હતા. 

મેળા દરમિયાન 2 લાખ કિલો પ્રસાદનું થયું વિતરણઃ કલેક્ટર
કલેક્ટરે જણાવ્યું કે, સેમ્પલનું રિઝલ્ટ 15 તારીખે આવ્યું હતું અને ભાદરવી પૂનમ 23 તારીખે હતી. ભાદરવી પૂનમના મેળા દરમિયાન ટોટલ બે લાખ કિલો મોહનથાળના પ્રસાદનું વિતરણ કરાયું હતું અને એ દરમિયાન કોઈ નવી એજન્સીને બોલાવીને આટલી મોટી વ્યવસ્થા કરવી એ કઠીન હતી. સાથે જ મંદિરે માતાજીના દર્શન કરવા આવતા ભક્તોને પણ પ્રસાદનો લાભ ન મળે એવી પરિસ્થિતિ હતી. એટલે અમે પ્રસાદ બનાવવા માટે એજન્સીના માણસો વાપર્યા હતા.  

'ક્વોલિટીમાં નથી કરાયું કોઈ કોમ્પ્રોમાઇઝ'
તેઓએ જણાવ્યું કે, પ્રસાદ બનાવવા માટે માલ-સામાનથી લઈને મોનિટરિંગની વ્યવસ્થા જિલ્લા વહીવટી તંત્ર દ્વારા કરવામાં આવી હતી. જે જગ્યા પ્રસાદ બનાવવામાં આવી રહ્યો હતો ત્યાં 24 કલાક અમારા માણસો જ હતા. જેથી પ્રસાદની ક્વોલિટીમાં કોઈ પણ પ્રકારનું કોમ્પ્રોમાઇઝ કરવામાં આવ્યું નથી. 

મોહિની કેટરર્સ સામે ફરિયાદ કરાઈઃ કલેક્ટર
કલેક્ટરે જણાવ્યું કે, મોહિની કેટરર્સને પ્રસાદઘરથી દૂર રહેવા આદેશ આપવામાં આવ્યો છે. તેનો કોન્ટ્રાક્ટ પણ રિન્યુ કરવામાં આવ્યો નથી.  મોહિની કેટરર્સ ઉપર FIR પણ કરી દેવામાં આવી છે.  હું ફરીથી દરેકને જણાવવા માગું છું કે મેળા દરમિયાન ભક્તોને બનાસ ડેરીના શુદ્ધ ઘીનો પ્રસાદ અપાયો છે. અત્યારે મંદિર દ્વારા જ પ્રસાદ બનાવવામાં આવી રહ્યો છે, અત્યારે નવી એજન્સીને કામ સોંપવાનો કોઈ વિચાર નથી.