અરુણાચલ / ભારતની 30 જગ્યાઓના નામ બદલી નાખ્યાં ચીને, માર્ગ-પહાડ-નદીઓ પોતાને નામે કરી

ભારતના પૂર્વોત્તર રાજ્ય  અરુણાચલ પ્રદેશને પચાવી પાડવાની દાનત રાખી રહેલા ચીને ફરી એક વાર ગુસ્તાખી કરી છે. અરુણાચલ પ્રદેશ પર પોતાનો દાવો રજૂ કરવાના તાજેતરના પ્રયાસો વચ્ચે ડ્રેગને અરુણાચલ પ્રદેશના 30 નવા નામોની યાદી જાહેર કરી છે આ નામો ચીની અક્ષરોમાં લખવામાં આવ્યા છે. આ નામ પર્વતો, નદીઓ અને સ્થળોને આપવામાં આવ્યા છે.

ચીને ભૌગોલિક નામોની ચોથી યાદી જાહેર કરી

ચીનના નાગરિક બાબતોના મંત્રાલયે જાંગનાનમાં પ્રમાણિત ભૌગોલિક નામોની ચોથી યાદી જાહેર કરી છે. ચીન અરુણાચલ પ્રદેશને 'જાંગનાન' કહે છે અને રાજ્યને દક્ષિણ તિબેટનો ભાગ હોવાનો દાવો કરે છે. મંત્રાલયની સત્તાવાર વેબસાઇટ પર આ વિસ્તાર માટે 30 વધારાના નામ પોસ્ટ કરવામાં આવ્યા હતા.

અરુણાચલમાં કયા કયાા નામ બદલાયાં 
ચીને અરુણાચલ પ્રદેશમાં જે 30 સ્થળોના નામ બદલ્યાં છે તેમાં 11 રહેણાંક વિસ્તારો, 12 ટેકરીઓ, ચાર નદીઓ, એક તળાવ, એક પાસ અને એક ખાલી જમીન છે. પીએમ નરેન્દ્ર મોદીએ હાલમાં જ અરુણાચલ પ્રદેશની મુલાકાત લીધી હતી અને આર્મી ટનલનું ઉદ્ઘાટન કર્યું હતું. ત્યાર બાદથી ચીન હચમચી ઉઠ્યું છે. તેઓ સતત અરુણાચલ પ્રદેશ વિશે નિવેદનો આપી રહ્યા છે. જો કે તેનો જડબાતોડ જવાબ આપતા ભારતીય વિદેશ મંત્રાલયે કહ્યું છે કે અરુણાચલ પ્રદેશ ભારતનું અભિન્ન અંગ છે અને રહેશે. આ પહેલા ભારતે અરૂણાચલ પ્રદેશમાં સ્થળોના નામ બદલવાના ચીનના પગલાને ફગાવી દીધો હતો. ભારતનું કહેવું છે કે રાજ્ય દેશનો અભિન્ન ભાગ છે અને "કાલ્પનિક" નામોનો ઉપયોગ કરવાથીઆ વાસ્તવિકતા બદલાશે નહીં.