બિઝનેસ / એવો IPO, જેને સરકારની તિજોરી કરી નાખી છલોછલ, રોકાણકારોને પણ કરાવશે તગડી કમાણી!

ભારતની સૌથી મોટી અને સૌથી પહેલી ડિપોઝિટરી કંપની નેશનલ સિક્યુરિટીઝ ડિપોઝિટરી લિમિટેડ (NSDL) નો IPO હવે સબ્સ્ક્રિપ્શન માટે ખુલ્લો થઇ ગયો છે. કુલ ₹4,012 કરોડના આ IPO માટે રોકાણકારો 1 ઓગસ્ટ 2025 સુધીમાં અરજી કરી શકે છે. આ સંપૂર્ણ રીતે ઓફર ફોર સેલ (OFS) આધારિત IPO છે, એટલે કે તેમાં કોઈ નવા શેર જારી નહીં થાય અને કંપનીને સીધો કોઈ નાણા લાભ નહીં મળે. માત્ર હાલના શેરહોલ્ડર્સ પોતાનો હિસ્સો વેચી રહ્યાં છે.

આ IPO હેઠળ કુલ 5.01 કરોડ શેર વેચવામાં આવશે. કંપનીએ IPO માટે શેરની કિંમત ₹760 થી ₹800 વચ્ચે રાખી છે. ઇશ્યૂ ખુલતા પહેલા NSDLના શેર ગ્રે માર્કેટમાં લગભગ 16%ના પ્રીમિયમ સાથે ટ્રેડ થઇ રહ્યાં હતા, જેનાથી IPO માટે હાઈ ડિમાન્ડનો અંદાજ મળે છે. જો તમે આ IPO માટે અરજી કરવા માંગો છો તો તમારે ઓછામાં ઓછા 18 શેર માટે બિડ લગાવવી પડશે, અને તે પછી 18ના ગુણાંકમાં શેર ખરીદી શકાય.

ભારતની પહેલી ડિપોઝિટરી

NSDL ભારતની પહેલી ડિપોઝિટરી છે, જે ઇક્વિટી, ડેટ, મ્યુચ્યુઅલ ફંડ, REIT, InvIT, અને AIF જેવી અનેક પ્રકારની ફાઇનાન્સિયલ ઈન્સ્ટ્રુમેન્ટ્સ માટે ડિપોઝિટરી સર્વિસ આપે છે. NSDL BSE (બોમ્બે સ્ટોક એક્સચેન્જ) પર લિસ્ટ થશે અને આ IPOનું લિસ્ટિંગ 6 ઓગસ્ટે થવાની શક્યતા છે.

186 દેશોમાં ગ્રાહકો છે

NSDL પાસે વિશ્વના 186 દેશોમાં ક્લાઈન્ટ્સ છે અને તેનો ધંધો દર વર્ષે ટ્રાન્ઝેક્શન અને ઇશ્યૂઅર ચાર્જથી આવક ધરાવે છે. નાણાકીય વર્ષ 2025માં કંપનીએ ₹1,420 કરોડની આવક નોંધાવી હતી, જે ગયા વર્ષની તુલનાએ 12% વધુ છે. કંપનીનો નફો 25% વધીને ₹343 કરોડ થયો હતો અને EBITDA માર્જિન 34.71% રહ્યો છે. મોટાભાગના બ્રોકરેજ હાઉસીસે NSDLના IPOને લાંબા ગાળાના રોકાણ માટે અનુકૂળ ગણાવ્યો છે. જેમ કે આનંદ રાઠી અને કેનેરા બેંક સિક્યોરિટીઝે જણાવ્યુ છે કે NSDL પાસે ડિપોઝિટરી ઇકોસિસ્ટમમાં મજબૂત પોઝિશન છે અને તેની સેવા અને નાણાકીય સ્થિતિ બંને મજૂબત છે.

આ પણ વાંચો : GNG Electronics કંપનીના શેરોનું આજે ધમાકેદાર લિસ્ટિંગ, રોકાણકારો જોરદાર નફામાં

સરકાર માટે પણ સોનાની ખાણ

સરકાર માટે પણ આ IPO સોનાની ખાણ સમાન છે. કારણ કે NSDLમાં રોકાણ કરનારી SBI, IDBI બેંક, NSE અને HDFC બેંક જેવા મોટાં શેરધારકોને હવે આ IPOમાંથી ભારે નફો થવાનો અંદાજ છે. SBI પોતાના 40 લાખ શેર ₹2ના ભાવે ખરીદીને હવે ₹800 ના માર્કેટ ભાવે ₹320 કરોડ કમાઈ શકે છે, એટલે કે 39,900% નો રિટર્ન. તે જ રીતે IDBI બેંક 2.22 કરોડ શેર વેચી રહી છે અને તેનાં પર પણ લગભગ ₹1,776 કરોડનો નફો થશે. યુનિયન બેંક પણ ₹5.2 ના દરે લીધેલા શેર હવે ₹800 ના દરે વેચી 15,000%થી વધુ વળતર મેળવી શકે છે.

DISCLAIMER: બિઝનેસને લગતો આ આર્ટિકલ ન્યૂઝ આધારિત છે જેમાં રિસ્કનું પ્રમાણ વધુ હોય શકે છે, કોઈ પણ જગ્યાએ રોકાણ કે બિઝનેસને લગતો વહીવટ કરતી વખતે એક વખત માર્કેટ નિષ્ણાંતની સલાહ લેવી જરૂરી છે, vtvgujarati.com કોઈ પણ મુશ્કેલી માટે બંધનકર્તા રહેશે નહીં જેની ખાસ નોંધ લેવી.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ