ટ્રેડ પોલિસી / ટ્રમ્પનો નવો ટેરિફ બોમ્બ, વિદેશી દવાઓ 100% ટેક્સ, મેટલ્સમાં રાહત

Trump Trade Policy: અમેરિકાના રાષ્ટ્રપતિ ડોનાલ્ડ ટ્રમ્પે ટ્રેડ પોલિસીમાં મોટો બદલાવ કરતા વિદેશી બ્રાન્ડેડ દવાઓ પર 100% સુધીનો ભારે ટેક્સ (ટેરિફ) લાદવાનો આદેશ આપ્યો છે. આ નિર્ણય ખાસ કરીને તે ફાર્માસ્યુટિકલ કંપનીઓને અસર કરશે. જે યુએસની બહાર દવાઓનું ઉત્પાદન કરે છે. ટ્રમ્પના આ પગલાથી કંપનીઓને અમેરિકન બજારમાં ટકી રહેવા માટે નવી વ્યૂહરચના બનાવવી પડશે. સરકારનું કહેવું છે કે આ નિર્ણયથી દેશની અંદર ઉત્પાદન વધશે અને સ્થાનિક ઉદ્યોગોને પ્રોત્સાહન મળશે.

કંપનીઓ માટે કડક શરતો અને ચેતવણી

ટ્રમ્પે સ્પષ્ટ સંદેશ આપ્યો છે કે વિદેશી ફાર્મા કંપનીઓએ પોતાની દવાઓના ભાવ ઘટાડવા પડશે અથવા તેમનું ઉત્પાદન અમેરિકામાં જ શરૂ કરવું પડશે. જો કંપનીઓ આ શરતોનું પાલન નહીં કરે તો તેમને ભારે ટેક્સ અને દંડનો સામનો કરવો પડશે. આ ઉપરાંત કંપનીઓને આ નવા નિયમો લાગુ કરવા માટે 120 થી 180 દિવસનો સમય આપવામાં આવ્યો છે. જે કંપનીઓ થોડું ઉત્પાદન અમેરિકામાં શિફ્ટ કરશે તેમને 20% ટેક્સના દર હેઠળ રાખવામાં આવશે. જ્યારે જાપાન, દક્ષિણ કોરિયા અને યુરોપિયન યુનિયન જેવા મિત્ર દેશો માટે આ મર્યાદા 15% નક્કી કરવામાં આવી છે.

સ્ટીલ અને એલ્યુમિનિયમ પર ટેક્સમાં રાહત

બીજી તરફ ટ્રમ્પ સરકારે મેટલ્સ ક્ષેત્રમાં રાહત આપી છે. સ્ટીલ, તાંબુ અને એલ્યુમિનિયમ પર લાગતો ટેક્સ પહેલા 50% હતો જેને ઘટાડીને હવે 25% કરવામાં આવ્યો છે. આ નિર્ણયથી અમેરિકાના ઘરઆંગણે ઉદ્યોગોને સસ્તો કાચો માલ મળશે. જે ઉત્પાદન ખર્ચ ઘટાડવામાં મદદરૂપ થશે. ખાસ કરીને મેન્યુફેક્ચરિંગ સેક્ટર માટે આ પગલું લાભદાયક માનવામાં આવે છે અને સ્ટીલ ઉદ્યોગે આ નિર્ણયનું સ્વાગત કર્યું છે.

આ પણ વાંચો: હોર્મુઝ સંકટ ઉકેલવા લંડનમાં 60 દેશોની હાઈ-લેવલ બેઠક, ભારતે રાખ્યો પોતાનો મત

નિર્ણય પાછળનું કારણ અને અસર

આ નવા ટેક્સ પાછળ એક મહત્વનું કારણ સુપ્રીમ કોર્ટનો જૂનો આદેશ પણ છે. ફેબ્રુઆરીમાં કોર્ટે ટ્રમ્પ સરકારના કેટલાક અગાઉના ટેક્સને ગેરકાયદેસર જાહેર કર્યા હતા. જેના કારણે સરકારને અંદાજે 166 અબજ ડોલરનું રિફંડ આપવું પડ્યું હતું. આ આર્થિક નુકસાનને પૂરૂં કરવા માટે આ નવી નીતિ લાવવામાં આવી છે. નિષ્ણાતો માને છે કે આ પગલાથી સ્થાનિક ઉદ્યોગોને ફાયદો થશે. પરંતુ દવાઓ પરના ભારે ટેક્સને કારણે સામાન્ય લોકો માટે આરોગ્ય સેવાઓ મોંઘી બની શકે છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ