તમારા કામનું / RBIની નવી પહેલ, હવે બેંક એકાઉન્ટ બદલવું બનશે મોબાઇલ નંબર બદલવા જેટલું સરળ

RBI Payments Vision 2028: RBI ભારતીય રિઝર્વ બેન્ક એક મોટા પ્લાન પર કામ કરી રહયું છે અને આ અંતર્ગત હવે કસ્ટમરને મોબાઈલ નેટવર્કની જેમ બેન્ક એકાઉન્ટ ટ્રાન્સફર કરવું એકદમ સરળ બની જશે. ભારતીય રિઝર્વ બેંક ગ્રાહકોને વધુ સુવિધા આપવા નવી યોજનાઓ પર કામ કરી રહી છે. આ પહેલથી બેંકિંગ સેવાઓ વધુ સરળ અને સુરક્ષિત બનવાની આશા છે.

એકાઉન્ટ સ્વિચ કરવું બનશે સહેલું

RBI “Payments Vision 2028” હેઠળ એક નવી વ્યવસ્થા તૈયાર કરી રહી છે. જેમાં ગ્રાહકો પોતાના બેંક ખાતાને એક બેંકમાંથી બીજી બેંકમાં સરળતાથી ટ્રાન્સફર કરી શકશે. આ પ્રક્રિયા મોબાઇલ નેટવર્ક બદલવા જેવી સરળ બનશે. એટલે કે ગ્રાહકોને નવું એકાઉન્ટ ખોલવાની જરૂર નહીં પડે અને તેમનો એકાઉન્ટ નંબર પણ બદલાશે નહીં. આ નવી સિસ્ટમથી ગ્રાહકોને મોટી રાહત મળશે અને બેંક બદલવાની પ્રક્રિયા સરળ બની જશે.

PaSS સિસ્ટમથી તમામ પેમેન્ટ્સ એક જ જગ્યાએ

RBI “Payment Switching Service (PaSS)” નામની નવી સિસ્ટમ વિકસાવી રહી છે. આ એક કેન્દ્રીય હબ તરીકે કામ કરશે. એટલે કે જ્યાં ગ્રાહકો તેમના તમામ પેમેન્ટ્સ એક જ પ્લેટફોર્મ પર જોઈ અને મેનેજ કરી શકશે. આ સિસ્ટમથી ગ્રાહકો તેમના એકાઉન્ટને સરળતાથી બીજી બેંકમાં ટ્રાન્સફર કરી શકશે અને નવી સેવાઓ પણ મેળવી શકશે. આ મોડલ બિલકુલ મોબાઇલ નંબર પોર્ટેબિલિટી જેવું રહેશે. જેમાં નંબર બદલ્યા વગર સેવા પ્રોવાઇડર બદલી શકાય છે.

હાલની મુશ્કેલ પ્રક્રિયા અને નવી રાહત

હાલમાં બેંક એકાઉન્ટ બદલવાની પ્રક્રિયા ઘણી જટિલ છે. એકવાર એકાઉન્ટ પગાર, સબસિડી, EMI અને વીમા જેવી સેવાઓ સાથે જોડાઈ જાય પછી તેને બીજી બેંકમાં ટ્રાન્સફર કરવું મુશ્કેલ બની જાય છે. આ કારણે ઘણા લોકો બેંક બદલવાનું ટાળે છે. નવી PaSS સિસ્ટમ લાગુ થયા પછી આ સમસ્યા દૂર થશે અને ગ્રાહકોને વધુ લવચીકતા મળશે.

આ પણ વાંચો: ટ્રમ્પનો નવો ટેરિફ બોમ્બ, વિદેશી દવાઓ 100% ટેક્સ, મેટલ્સમાં રાહત

આંતરરાષ્ટ્રીય પેમેન્ટ અને સુરક્ષા પર ફોકસ

RBI માત્ર દેશની અંદર જ નહીં પરંતુ આંતરરાષ્ટ્રીય લેવલ પર પણ સુધારા લાવવા કામ કરી રહી છે. સરહદ પારના પેમેન્ટ્સને વધુ ઝડપી, સસ્તા અને પારદર્શક બનાવવા માટે નવા નિયમો અને ટેક્નોલોજી વિકસાવવામાં આવી રહી છે. સાથે જ ડિજિટલ ચલણ (CBDC)નો ઉપયોગ વધારવાનો પણ વિચાર છે. છેતરપિંડી અટકાવવા માટે ચેક સિસ્ટમમાં સુધારા અને ઈ-ચેક લાવવાની તૈયારી ચાલી રહી છે. ઉપરાંત ગ્રાહકોને કોઈપણ ડિજિટલ પેમેન્ટ મોડને ચાલુ કે બંધ કરવાની સુવિધા પણ આપવામાં આવશે. જેનાથી સુરક્ષા વધુ મજબૂત બનશે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ