કહેર / બ્રિટનના સ્વાસ્થ્ય મંત્રી પણ કોરોના વાયરસની ચપેટમાં, પીએમ બોરિસ જોન્સન પર પણ મંડરાયો ખતરો

• બ્રિટનમાં અત્યાર સુધી 373 લોકો કોરોનાથી સંક્રમિત થયા અને 6 લોકોનાં મોત નીપજ્યાં 
• શુક્રવારે નદીન ડોરિસે કોરોના સામેના કાયદા પર હસ્તાક્ષર કર્યા હતા 
• આરોગ્ય મંત્રી હજારો લોકોના સંપર્કમાં આવ્યા છે, પીએમ બોરિસની સાથે પણ મુલાકાત કરી હતી 

ડોરિસ બ્રિટનના પહેલા નેતા છે કે જેમને COVID-19 નું સંક્રમણ થયું છે. સ્વાસ્થ્ય વિભાગના અધિકારીઓ હવે તે કોરોના વાયરસના સંપર્કમાં ક્યાં અને કેવી રીતે આવ્યા તે જાણવાના પ્રયત્ન કરી રહ્યા છે.

બ્રિટિશ સાંસદ અને આરોગ્ય વિભાગના મંત્રી નદીન ડોરિસ કોરોનાથી સંક્રમિત થયા છે. કન્ઝર્વેટિવ સાંસદ નદિને મંગળવારે જાહેર કરેલા એક નિવેદનમાં કહ્યું છે કે, 'હું પુષ્ટિ કરું છું કે મારા કોરોના પર કરવામાં આવેલા ટેસ્ટમાં હું પોઝિટિવ આવી છું અને હું ઘરમાં બધા થી અલગ જ રહું છું.' આરોગ્ય વિભાગના અધિકારીઓ હવે જાણવાનો પ્રયાસ કરી રહ્યા છે કે તેઓ કોરોના વાયરસના સંપર્કમાં કેવી રીતે આવ્યા.

પીએમ બોરિસ જોન્સન સાથે પણ કરી ચુક્યા છે મુલાકાત 

ડોરિસ એ યુકેના પહેલા નેતા છે કે જેઓ  COVID-19 થી સંક્રમિત થયા છે કોરોના સામે લડવાની કાયદાકીય જોગવાઈઓ ઘડવામાં તેઓએ ખુબ મદદ કરી છે, આ સાથે જ ચિંતામાં વધારો થયો છે કે જે લોકોએ આ દરમિયાન મુલાકાત લીધી હતી તે લોકો સુધી પણ કોરોના પહોંચ્યો ન હોય. એક અહેવાલ મુજબ છેલ્લા કેટલાક દિવસોમાં તે વડાપ્રધાન બોરિસ જોન્સન સહિત હજારો લોકોના સંપર્કમાં આવી છે.

બ્રિટનમાં 6 લોકોનાં નીપજ્યાં છે મોત

નદીને કહ્યું, 'હું  NHS સ્ટાફનો આભાર માનું છું, જેમણે મને સલાહ અને સહયોગ આપ્યો છે.' માનવામાં આવે છે કે નદીનમાં કોરોનાની પુષ્ટિ થયા બાદ સંસદને મુલતવી રાખવામાં આવી છે. યુકેમાં અત્યાર સુધી 373 લોકો કોરોનાથી સંક્રમિત થયા છે, જ્યારે 6 લોકોનાં મોત નીપજ્યાં છે.

નદીન ડોરિસે એક ટ્વીટમાં જણાવ્યું કે તેમને પોતાની ચિંતા નથી પરંતુ તેમના માતા જે 84 વર્ષના અને આ પરિસ્થિતિમાં તેમની સાથે રહે છે તેમની ચિંતા છે. તેમની માતાને પણ ખાંસીની શરૂઆત થતા હવે તેમનો પણ ટેસ્ટ કરવામાં આવશે. ડોરિસે લોકોને સતત હાથ ધોતા રહેવાની સલાહ પણ આપી.