અમદાવાદ / સરખેજ ભાજપ કોર્પોરેટરની પુત્રવધુએ આપઘાત કરતાં ચકચાર, પતિના દારુના વ્યસનથી કંટાળીને ભર્યું પગલું

• સરખેજમાં ભાજપના કોર્પોરેટરની પુત્રવધૂએ કર્યો આપઘાત
• પતિના વ્યસનની કુટેવથી કંટાળીને કર્યો આપઘાત
• 3 મહિનાના લગ્નજીવનનો કરૂણ અંત આવ્યો

અમદાવાદના સરખેજમાં ભાજપના કોર્પોરેટરની પુત્રવધુએ આપઘાત કર્યો છે. લગ્નના 3 માસમાં જ પરિણિતાએ ગળેફાંસો ખાઈને આપઘાત કર્યો છે. સુખી લગ્નજીવનના સપના જોઈને સાસરે ગયેલી યુવતીએ પતિના વ્યસનની લતથી કંટાળીને જીવનનો અંત કર્યો છે. સરખેજમાં રહેતા ભાજપના કોર્પોરેટર અરવિંદ પરમારના પુત્ર જય સાથે જાહ્નવીના લગ્ન થયા હતા. સાણંદમાં અર્બન હેલ્થ સેન્ટરમાં BAMS ડૉક્ટર તરીકે ફરજ બજાવતા જય પરમાર સાથે જાહ્નવીએ સુખી જીવનની શરૂઆત કરી હતી.

રંગીલા શોખથી પરિચિત થતા પત્નીને આઘાત લાગ્યો હતો
લગ્નના બીજા દિવસે જ પતિના દારૂ અને ગુટખાના રંગીલા શોખથી પરિચિત થતા પત્નીને આઘાત લાગ્યો હતો. આ વ્યસન લગ્ન જીવનમાં ઝઘડાનું મુખ્ય કારણ બન્યું હતું. ત્યાર બાદ અવાર નવાર જય પરમાર પત્ની જાહ્નવીને માનસિક અને શારીરિક ત્રાસ આપતો હતો. કંટાળીને પત્ની જાહ્વવીએ માત્ર 3 માસનો લગ્ન જીવનનો અંત લાવી આત્મહત્યા કરી હતી. 

પતિ-પત્ની વચ્ચે અવાર નવાર દારૂ પીવા બાબતે ઝઘડો થતો હતો
જાહ્નવી અને જય પરમારના સમાજના રીતરિવાજથી 30 જાન્યુઆરીના રોજ લગ્ન થયા હતા. લગ્ન પછી બન્ને પતિ પત્ની વચ્ચે અવાર નવાર દારૂ પીવા બાબતે ઝઘડો થતો હતો. જાહ્નવી રિસાઈને પિયર આવી ગઈ હતી. પરંતુ સામાજિક રીતે સમાધાન કરાવ્યુ હતું. 22 માર્ચના રોજ જય અને જાહ્નવી સારંગપુર ખાતે કષ્ટભંજન હનુમાન મંદિર દર્શન કરવા ગયા હતા. ત્યારે જાહનવીના સસરા અરવિંદ ભાઈએ પુત્રવધુને દીકરો દારૂ વધુ પીવે છે જેથી મંદિરે દારૂ બંધ કરવાની બાધા લેવા માટે ફોન કર્યો હતો. 

જાહ્નવીનો આપઘાત 
બન્ને પતિ-પત્ની વચ્ચે ઝઘડો થયો હતો. જય પરમાર ઉશ્કેરાઈ જઈને જાહ્નવીને માર પણ મારતો હતો. જેથી 26 માર્ચના રોજ પતિના માનસિક ત્રાસથી કંટાળીને જાહ્નવીએ આપઘાત કરી લીધો હતો. પોલીસે પતિ વિરુદ્ધ દૂષપેરણાનો ગુનો નોંધી તપાસ શરૂ કરી છે. સરખેજ પોલીસે જય પરમાર વિરુદ્ધ ગુનો નોંધતા આરોપી ફરાર થઇ ગયો હતો. જેથી પોલીસે જુદી જુદી ટીમો બનાવીને આરોપીની શોધખોળ શરૂ કરી છે.