ઘરફોડ ચોરી / લંકેશનું પાત્ર ભજવનાર સ્વ.અરવિંદ ત્રિવેદીના ઘરમાં ચોરી, રામ ભગવાનનો મુગટ અને પાદુકા લઈ ગયા તસ્કરો

• સ્વ.અરવિંદ ત્રિવેદીના ઘરમાં ચોરી
• સદાતપુરા પાસેના અન્નપૂર્ણા મકાનમાં ચોરી
• ચાંદીનો મુગટ અને પાદુકાની કરી ચોરી

સાબરકાંઠાના ઈડર તાલુકાના સદાતપુરા ખાતે રહેતા અને રામાનંદ સાગર રામાયણમાં લંકેશનું પાત્ર ભજવનાર સ્વ.અરવિંદ ત્રિવેદીના ઘરમાં કેટલાક અજાણ્યા શખ્સો દ્વારા રાત્રીના સમયે ઘુસી લંકેશના અન્નપૂર્ણા નામના બંધ મકાનમાં ગત રાત્રીએ ચોરો હાથફેરો કરી પલાયન થઈ ગયા હતા. ત્યારે મકાનમાં ચોરી થયાની જાણ ઈડર પોલીસને થતા પોલીસે સ્થળ પર પહોંચી આગળની તપાસ હાથ ધરી હતી.

પોલીસ ડોગ સ્કોર્ડ તેમજ એફ.એસ.એલ.ની મદદની પગેરૂ શોધવાની તજવીજ હાથ ધરી
ઈડરના સદાતપુરા પાસે આવેલ સ્વ. અરવિંદ ત્રિવેદીના બંધ મકાનમાં ગત રાત્રીના સુમારે ચોરોએ ઘરનાં દરવાજાનું તાળું તોડી ઘરમાં પ્રવેશ કરી ધરમાં  મંદિરમાં રહેલ શ્રી રામ ભગવાનની મૂર્તિનાં ચાંદીના મુગટ અને પાદૂકાની ચોરી કરી ચોરો પલાયન થઈ ગયા હતા. મકાનમાં ચોરી થયાની જાણ પોલીસને કરાતા  પોલીસ તાત્કાલીક ઘટના સ્થળે દોડી આવી તપાસના ચક્રોગતિમાન કર્યા છે. મકાનમાં ચોરી થયાની જાણ ઈડર પોલીસને થતા ઈડર પોલીસે ડોગ સ્કોર્ડ, એફ.એસ.એલ. સહિતની ટીમોએ ચોરીનુ પગેરૂ શોધવાની તજવીજ હાથ ધરી હતી. 

એક મહિના પહેલા સાબરકાંઠામાં 24 કલાકમાં કુલ ત્રણ ચોરીના બનાવ બન્યા હતા
અત્રે ઉલ્લેખનીય છે કે એક મહિના પહેલા પણ સાબરકાંઠામાં 24 કલાકમાં ત્રણ ચોરીના બનાવો બનવા પામ્યા હતા. જેમાં હિંમતનગરમાં બે બંધ મકાનને તસ્કરોએ નિશાન બનાવી સોના-ચાંદીનાં દાગીના લઈ તસ્કરો ફરાર થઈ ગયા હતા. જ્યારે ઈડરના આર્સોડિયા ગામે આવેલ અન્ય એક બનાવમાં તસ્કરોએ મંદિરને નિશાન બનાવી મંદિરમાંથી પતરાની પેટીમાં મુકેલ પૈસા, ચાંદીનું છત્તર સહિતનો મુદ્દામાલ ચોરી કરી પલાયન થઈ ગયા હતા.