સ્પોર્ટ્સ / ભારતની દીકરીનો વિશ્વમાં ડંકો! અનાહત સિંહે જીત્યો વર્લ્ડ જુનિયર સ્ક્વોશ ખિતાબ, રચ્યો નવો ઈતિહાસ

ભારતની 18 વર્ષની સ્ક્વોશ ખેલાડી અનાહત સિંહે વિશ્વ મંચ પર ઐતિહાસિક સિદ્ધિ મેળવી છે. કેનેડામાં યોજાયેલી વર્લ્ડ જુનિયર સ્ક્વોશ ચેમ્પિયનશિપ 2026માં તેણે ગર્લ્સ સિંગલ્સનો ખિતાબ જીતીને દેશનું ગૌરવ વધાર્યું છે. આ જીત સાથે અનાહત સિંહ વર્લ્ડ જુનિયર સ્ક્વોશ ચેમ્પિયન બનનારી પ્રથમ ભારતીય ખેલાડી બની છે. વર્ષોથી જે ખિતાબ ભારતના હાથથી દૂર રહ્યો હતો તે હવે અનાહતના શાનદાર પ્રદર્શનના કારણે ભારતના નામે નોંધાયો છે.

ઇતિહાસ રચનારી પ્રથમ ભારતીય ખેલાડી

કેનેડાના નાયાગ્રા-ઓન-ધ-લેકમાં યોજાયેલી ચેમ્પિયનશિપની ફાઇનલમાં અનાહત સિંહે ઈજિપ્તની બીજા ક્રમાંકિત રુકૈયા સેલેમને સીધી ત્રણ ગેમમાં હરાવી ખિતાબ પોતાના નામે કર્યો. તેણે 11-3, 11-7 અને 11-9ના સ્કોર સાથે એકતરફી જીત મેળવી હતી. આ સાથે તે વર્લ્ડ જુનિયર સ્ક્વોશ ચેમ્પિયન બનનારી પ્રથમ ભારતીય ખેલાડી બની ગઈ.

આખી ટૂર્નામેન્ટમાં રહ્યો દબદબો

અનાહતે માત્ર ફાઇનલમાં જ નહીં પરંતુ સમગ્ર ટૂર્નામેન્ટ દરમિયાન શાનદાર રમત બતાવી. તેણે કુલ છ મેચમાંથી માત્ર બે ગેમ ગુમાવી હતી. શરૂઆતની ત્રણેય મેચ તેણે એકપણ ગેમ ગુમાવ્યા વગર જીતી હતી. તેના આત્મવિશ્વાસ અને આક્રમક રમતના કારણે દરેક મુકાબલામાં તેણે પોતાનું પ્રભુત્વ જાળવી રાખ્યું.

ઈજિપ્તના દબદબાનો કર્યો અંત

વર્લ્ડ જુનિયર સ્ક્વોશમાં છેલ્લા 13 વર્ષથી ગર્લ્સ સિંગલ્સનો ખિતાબ સતત ઈજિપ્તની ખેલાડીઓ જીતી રહી હતી. અનાહત સિંહે આ લાંબા સમયથી ચાલતો દબદબો તોડી નવો ઈતિહાસ રચ્યો છે. 2010 પછી તે પ્રથમ બિન-ઈજિપ્તીય ખેલાડી બની છે જેણે આ પ્રતિષ્ઠિત ખિતાબ જીત્યો છે.

આ પણ વાંચોઃ આજે વરસી શકે છે ગોલ્ડ! કોમનવેલ્થ ગેમ્સમાં ભારતની 5 ગોલ્ડ મેડલ મેચ, પાકિસ્તાન સામે પણ જંગ

નોકઆઉટમાં ત્રણ ઈજિપ્તીય ખેલાડીઓને હરાવી

ક્વાર્ટર ફાઇનલથી લઈને ફાઇનલ સુધી અનાહતનો સામનો સતત ઈજિપ્તની ખેલાડીઓ સામે થયો. તેણે ક્વાર્ટર ફાઇનલમાં હબીબા રિઝ્કને 3-1થી હરાવી. ત્યારબાદ સેમિફાઇનલમાં બાર્બ સામેહને પણ 3-1થી પરાજય આપ્યો. ફાઇનલમાં રુકૈયા સેલેમ સામે સીધી જીત મેળવી તેણે પોતાની શ્રેષ્ઠતા સાબિત કરી.

ભારતીય સ્ક્વોશ માટે નવા યુગની શરૂઆત

અનાહત સિંહ છેલ્લા કેટલાક વર્ષોથી સતત આંતરરાષ્ટ્રીય સ્તરે સારું પ્રદર્શન કરી રહી છે. ગયા વર્ષે તેણે જુનિયર વર્લ્ડ ચેમ્પિયનશિપમાં બ્રોન્ઝ મેડલ જીતીને ભારત માટે 15 વર્ષનો ઈંતજાર પૂરો કર્યો હતો. હવે વિશ્વ ખિતાબ જીત્યા બાદ ભારતીય સ્ક્વોશને નવી ઓળખ મળી છે. માત્ર 18 વર્ષની ઉંમરે સિનિયર PSA રેન્કિંગમાં ટોચના ખેલાડીઓમાં સ્થાન મેળવનારી અનાહત હવે ભારત માટે ભવિષ્યની સૌથી મોટી આશા માનવામાં આવી રહી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ