ગુજરાત / હવે વાયબ્રન્ટ નવરાત્રી મહોત્સવમાં ગરબા રમવા રૂપિયા આપવા પડશે? જાણો ચાર્જ

દર વર્ષે નવરાત્રી આવે એટલે અમદાવાદના GMDC ગ્રાઉન્ડનું નામ ગરબા રસિકોના મનમાં સૌથી પહેલા આવે છે. અહીં યોજાતી વાઇબ્રન્ટ નવરાત્રીમાં અત્યાર સુધી ખેલૈયાઓ અને દર્શકો માટે પ્રવેશ સંપૂર્ણપણે ફ્રી રાખવામાં આવતો હતો. પરંતુ આ વખતે ગરબાના તાલે ઝૂમવા પહોંચતા પહેલા જ ખેલૈયાઓને એક મોટો નિર્ણય ધ્યાનમાં રાખવો પડશે. કારણ કે આ વર્ષે GMDC ગ્રાઉન્ડ પર વાઇબ્રન્ટ નવરાત્રીમાં એન્ટ્રી ફ્રી નહીં રહે અને પ્રવેશ માટે ટિકિટ લેવી પડશે. તંત્ર દ્વારા આ વર્ષે સશુલ્ક ટિકિટ વ્યવસ્થા લાગુ કરવામાં આવી છે.

અમદાવાદ શહેરના પ્રતિષ્ઠિત GMDC ગ્રાઉન્ડ ખાતે રાજ્ય સરકાર દ્વારા દર વર્ષે ભવ્ય વાઇબ્રન્ટ નવરાત્રી મહોત્સવનું આયોજન કરવામાં આવે છે. આ કાર્યક્રમમાં મોટી સંખ્યામાં લોકો ગરબા રમવા અને ગરબાની મજા માણવા માટે પહોંચે છે. અત્યાર સુધી અહીં પ્રવેશ માટે કોઈ ફી લેવામાં આવતી નહોતી. જોકે, આ વર્ષે તંત્ર દ્વારા પ્રવેશ માટે અલગ-અલગ ઝોન પ્રમાણે ટિકિટના દર નક્કી કરવામાં આવ્યા છે. જેના કારણે નવરાત્રી પહેલા જ ગરબા રસિકોમાં આ નિર્ણય ચર્ચાનો વિષય બન્યો છે.

'સેલિબ્રેશન ઝોન' બનાવવામાં આવ્યો

નવી ટિકિટિંગ વ્યવસ્થા પ્રમાણે GMDC ગ્રાઉન્ડ ખાતે સામાન્ય ગરબા રસિકો માટે 'સેલિબ્રેશન ઝોન' બનાવવામાં આવ્યો છે. આ ઝોનમાં પ્રવેશ માટે ટિકિટનો દર ₹100થી શરૂ થશે. એટલે કે અત્યાર સુધી મફતમાં વાઇબ્રન્ટ નવરાત્રીનો આનંદ માણતા લોકોને હવે સામાન્ય પ્રવેશ માટે પણ ટિકિટ લેવી પડશે. બીજી તરફ ખાસ સુવિધાઓ ધરાવતા 'પ્રીમિયમ ઝોન' માટે ટિકિટના અલગ દર નક્કી કરવામાં આવ્યા છે. પ્રીમિયમ ઝોનમાં પ્રવેશ માટે ગરબા શોખીનોએ ₹200થી લઈને ₹1,200 સુધીની ટિકિટ ખરીદવી પડશે.

ઓનલાઇન ટિકિટ બુકિંગ પણ શરૂ કરી દેવામાં આવ્યું

આ નિર્ણય સાથે વાઇબ્રન્ટ નવરાત્રી માટેનું ઓનલાઇન ટિકિટ બુકિંગ પણ શરૂ કરી દેવામાં આવ્યું છે. રાજ્ય પ્રવાસન વિભાગ અને આયોજકો દ્વારા ટિકિટની વ્યવસ્થા કરવામાં આવી છે. એટલે હવે GMDC ગ્રાઉન્ડ પર ગરબા રમવા કે કાર્યક્રમમાં હાજરી આપવા ઇચ્છતા લોકોને અગાઉથી ટિકિટ બુક કરાવવી પડશે. ખાસ કરીને પ્રીમિયમ ઝોનમાં જવા ઇચ્છતા લોકોએ પોતાની પસંદગી પ્રમાણે ટિકિટ લેવાની રહેશે.

GMDC ગ્રાઉન્ડ પર વાઇબ્રન્ટ નવરાત્રી મહોત્સવનો પ્રારંભ થવાનો

ઉલ્લેખનીય છે કે 12 ઓક્ટોબરથી GMDC ગ્રાઉન્ડ પર વાઇબ્રન્ટ નવરાત્રી મહોત્સવનો પ્રારંભ થવાનો છે. દર વર્ષની જેમ આ વખતે પણ અહીં નવરાત્રીનો ઝાકઝમાળ જોવા મળશે. જોકે, ફ્રી પ્રવેશની જગ્યાએ ટિકિટ વ્યવસ્થા લાગુ કરવાનો નિર્ણય સૌથી મોટો ફેરફાર છે. અતિશય ભીડને નિયંત્રિત કરવા, સમગ્ર આયોજનમાં વ્યવસ્થા જાળવવા અને ગરબા રસિકોને વધુ સારી તથા ઉત્કૃષ્ટ પાયાની સગવડો પૂરી પાડવાના ઉદ્દેશ્યથી આ ફી દાખલ કરવામાં આવી હોવાનું ચર્ચાઈ રહ્યું છે.

રસિકોમાં મિશ્ર પ્રતિસાદ જોવા મળી

જોકે, આ નિર્ણયને લઈને ગરબા રસિકોમાં મિશ્ર પ્રતિસાદ જોવા મળી રહ્યો છે. એક તરફ સારી વ્યવસ્થા અને સુવિધાઓ માટે ફી લેવામાં આવે તે વાતને કેટલાક લોકો યોગ્ય માની રહ્યા છે, તો બીજી તરફ દર વર્ષે પરિવાર સાથે નિઃશુલ્ક નવરાત્રી માણતા હજારો લોકો માટે આ નવી ટિકિટ વ્યવસ્થા વધારાનો આર્થિક બોજ બની શકે છે. ખાસ કરીને પરિવારના અનેક સભ્યો સાથે ગરબા રમવા આવતા લોકો માટે કુલ ટિકિટ ખર્ચ વધી શકે છે.

આ પણ વાંચો : અમદાવાદમાં 2038ની એશિયન ગેમ્સ માટે ભારત-ગુજરાત સરકારનો OCA સમક્ષ સત્તાવાર દાવો, સ્પોર્ટ્સ એન્ક્લેવ બનશે આયોજનનું મુખ્ય કેન્દ્ર

આમ, અમદાવાદના GMDC ગ્રાઉન્ડની વાઇબ્રન્ટ નવરાત્રી આ વખતે અનેક રીતે ખાસ રહેવાની છે. એક તરફ 12 ઓક્ટોબરથી ભવ્ય ગરબા મહોત્સવ શરૂ થશે, તો બીજી તરફ વર્ષોથી ચાલતી ફ્રી એન્ટ્રીની વ્યવસ્થા હવે બદલાઈ ગઈ છે. સેલિબ્રેશન ઝોન માટે ₹100થી અને પ્રીમિયમ ઝોન માટે ₹200થી ₹1,200 સુધીની ટિકિટ નક્કી કરવામાં આવી છે. હવે જોવાનું એ રહેશે કે ટિકિટ સાથેની નવી વ્યવસ્થા ગરબા રસિકોને કેટલી પસંદ પડે છે અને આ વર્ષે GMDCની વાઇબ્રન્ટ નવરાત્રીમાં ખેલૈયાઓનો કેવો પ્રતિસાદ જોવા મળે છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ