Asian Games 2026 / કબડ્ડીમાં ટીમ ઈન્ડિયાએ જીત્યો ગોલ્ડ, ઈરાનને હરાવી વિદેશમાં ડંકો વગાડ્યો ભારતની દીકરીઓએ

એશિયન ગેમ્સ 2026ના સાતમા દિવસે ભારતીય મહિલા કબડ્ડી ટીમે શાનદાર પ્રદર્શન કરીને ગોલ્ડ મેડલ પોતાના નામે કર્યો. ફાઇનલમાં ભારતે ઈરાનને 37-34થી હરાવીને એશિયન ગેમ્સમાં મહિલા કબડ્ડીનો ખિતાબ ફરી પોતાના નામે કર્યો.ભારત અને ઈરાન વચ્ચે મહિલા કબડ્ડીની ફાઇનલ મેચ શરૂઆતથી જ રોમાંચક રહી હતી. ભારતીય ટીમે પ્રથમ હાફમાં શાનદાર રમત બતાવીને 22-16ની લીડ મેળવી હતી. બીજા હાફમાં ઈરાને જોરદાર વાપસી કરી અને મેચને વધુ રોમાંચક બનાવી હતી. જોકે ભારતે અંતિમ ક્ષણોમાં પોતાની લીડ જાળવી રાખીને 37-34થી મેચ જીતી લીધી.

ભારતે સતત બીજી વખત ટાઇટલ બચાવ્યું

આ જીત સાથે ભારતીય મહિલા કબડ્ડી ટીમે અગાઉના એશિયન ગેમ્સના ખિતાબનો બચાવ કર્યો છે. ભારતે હાંગઝોઉ એશિયન ગેમ્સમાં પણ મહિલા કબડ્ડીમાં ગોલ્ડ મેડલ જીત્યો હતો. આ વખતે પણ ટીમે શાનદાર અભિયાન બાદ ફાઇનલમાં ઈરાનને હરાવીને ગોલ્ડ પોતાના નામે કર્યો છે.

હાફટાઇમમાં ભારત 22-16થી આગળ

મેચના પહેલા હાફમાં ભારતે શરૂઆતથી જ ઈરાન પર દબાણ બનાવ્યું હતું. હાફટાઇમ સુધી ભારતીય ટીમ 22-16થી આગળ હતી. જોકે બીજા હાફમાં ઈરાનની ટીમે વાપસી કરી અને એક સમયે સ્કોરનો તફાવત માત્ર એક પોઇન્ટ સુધી આવી ગયો હતો. ત્યારબાદ ભારતીય ખેલાડીઓએ ફરી ગતિ પકડી અને અંત સુધી લીડ જાળવી રાખી.

37-34થી ભારતની જીત

ફાઇનલનો અંતિમ સ્કોર ભારતના પક્ષમાં 37-34 રહ્યો. એટલે કે ભારતે ઈરાનને 3 પોઇન્ટના અંતરથી હરાવ્યું. આ મુકાબલો અંત સુધી કાંટાની ટક્કર રહ્યો હતો અને ભારતીય ટીમે દબાણ વચ્ચે મહત્વના પોઇન્ટ મેળવીને ગોલ્ડ મેડલ પર કબજો કર્યો.

ભારતનો ત્રીજો ગોલ્ડ મેડલ

મહિલા કબડ્ડી ટીમનો આ ગોલ્ડ એશિયન ગેમ્સ 2026માં ભારતનો ત્રીજો ગોલ્ડ મેડલ બન્યો છે. અગાઉ ભારતીય મહિલા ક્રિકેટ ટીમે ગોલ્ડ મેડલ જીત્યો હતો અને શૂટિંગમાં કમલજીત તથા સુરુચિ સિંહની જોડી પણ ગોલ્ડ જીતી હતી. કબડ્ડીના ગોલ્ડ સાથે ભારતના મેડલ ખાતામાં વધુ એક સોનાનો મેડલ ઉમેરાયો છે.

આ પણ વાંચોઃ ગિલ ODI સિરીઝમાંથી આઉટ, તો કોણ બનશે કેપ્ટન? હવે માત્ર એક જ દિવસ બાકી

ભારતના ખેલાડીઓનો આજ પણ એક્શન

એશિયન ગેમ્સના સાતમા દિવસે કબડ્ડી ઉપરાંત ભારતના ખેલાડીઓ શૂટિંગ, એથ્લેટિક્સ, બોક્સિંગ, સ્ક્વૈશ, તીરંદાજી, હોકી અને બેડમિન્ટન સહિત અનેક રમતોમાં મેદાનમાં ઉતર્યા છે. મહિલા કબડ્ડી ટીમે ગોલ્ડ જીત્યા બાદ પુરુષ કબડ્ડી ટીમ પણ આજે ઈરાન સામે ગોલ્ડ મેડલ માટે રમવાની છે.

શૂટિંગમાં મેડલ ચૂકી ગયું ભારત

મહિલાઓની 50 મીટર રાઇફલ 3 પોઝિશનની વ્યક્તિગત સ્પર્ધામાં ભારતને મેડલ મળી શક્યો નથી. તિલોત્તમા સેન ચોથા સ્થાને રહી હતી, જ્યારે વિદરસા વિનોદ ફાઇનલમાં પાંચમા સ્થાને રહી હતી. આ સ્પર્ધામાં ભારતની મેડલની આશા પૂરી થઈ શકી નહોતી.

બોક્સિંગમાં જાદુમણિ સિંહ બહાર

બોક્સિંગમાં જાદુમણિ સિંહનો એશિયન ગેમ્સનો સફર પણ સમાપ્ત થયો છે. તેઓ બીજા રાઉન્ડમાં ઓલિમ્પિક મેડલ વિજેતા કાર્લો પાલામ સામે 0-3થી હારી ગયા હતા.

છઠ્ઠા દિવસે ભારતે 6 મેડલ જીત્યા હતા

એશિયન ગેમ્સના છઠ્ઠા દિવસે ભારતે એક ગોલ્ડ, બે સિલ્વર અને ત્રણ બ્રોન્ઝ સહિત કુલ છ મેડલ જીત્યા હતા. શૂટિંગમાં કમલજીત અને સુરુચિ સિંહે ગોલ્ડ જીત્યો હતો. પુરુષોની 50 મીટર રાઇફલ 3 પોઝિશન ટીમ ઇવેન્ટમાં ભારતને સિલ્વર મળ્યો હતો. એથ્લેટિક્સમાં ગુલવીર સિંહે સિલ્વર, જ્યારે મનપ્રીત કૌર અને બરાનિકા એલંગોવનએ બ્રોન્ઝ મેડલ જીત્યા હતા. ટેબલ ટેનિસની મિક્સ્ડ ડબલ્સમાં દીયા ચિતાલે અને માનુષ શાહે બ્રોન્ઝ મેડલ પોતાના નામે કર્યો હતો.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ