માસિક ધર્મ, પીરિયડ્સ, ટાઈમમાં છું... આ સમસ્યાને જેમને થાય છે તે મહિલાઓ સહન તો કરે જ છે પરંતુ આવા શબ્દો સાંભળતાની સાથે આજે પણ સમાજમાં કેટલાંયના મોં મચકોડાઈ જાય છે. પીરિયડ્સમાં હોય ત્યારે યુવતીઓ અને મહિલાઓને ઘણી એવી પરિસ્થિતિઓનો સામનો કરવો પડતો હોય છે જ્યાં અમુક સમયે તેમના આત્મસન્માનને પણ ઠેસ પહોંચે છે. આવી જ પરિસ્થિતિઓનો સામનો કરતી એક સામાન્ય યુવતી હતી અદિતી ગુપ્તા. પોતાના પોસ્ટ ગ્રેજ્યુએશન સમયે પોતાના ઍક્ટિવિટી પાર્ટનર તુહિન પોલ સાથે પીરિયડ્સ સાથે થોડી વાતો થઈ. આ દરમ્યાન ખ્યાલ આવ્યો કે આ વિશેની મોટાભાગની જાણકારી તેના કરતા વધારે તુહિનને છે. અદિતીને અહેસાસ થયો કે જો આ જાણકારીઓ પહેલેથી ખબર હોત તો પરિસ્થિતિનો સામનો સરળતાથી કરી શકી હોત. તેને વિચાર આવ્યો કે પોતાની જેમ અન્ય કેટલાંયને પીરિયડ્સની સંપૂર્ણ જાણકારી નહીં હોવાથી વધુ મૂંઝવણ અને પીડા થતી હશે. બસ, અહીંથી જ પોતાના પ્રોજેક્ટ MenstruPediaનો જન્મ થયો. પીરિયડ્સની તમામ ગેરમાન્યતાઓને વૈજ્ઞાનિક ઢબે ખોટી સાબિત કરી અને એક એવી કૉમિકની શરૂઆત કરી જેનાથી બાળકીઓ, યુવતીઓ અને મહિલાઓ સહિત પુરુષોએ પણ હોંશે હોંશે સ્વીકારી. આ કૉમિક ગુજરાતી સહિત 16 ભાષાઓમાં ઉપલબ્ધ છે. અદિતી ગુપ્તાનું નામ ફોર્બ્સમાં 30 અંડર 30ની યાદીમાં પણ નામ આવી ચૂક્યું છે. ત્યારે ઍક્ટિવિટી પાર્ટનરમાંથી લાઈફ પાર્ટનર બનેલા અદિતી ગુપ્તા અને તુહિન પોલને સલામ છે આવા વિષય પર કામ કરવા બદલ...