તપાસ / હિંમતનગરમાં કૌટુંબિક ઝઘડાએ લીધો ખૂની વળાંક, એકની હત્યા, એક ગંભીર

સાબરકાંઠા જિલ્લાના હિંમતનગર તાલુકાના કઠવાડિયા ગામમાં કૌટુંબિક ઝઘડો ખૂની અથડામણમાં ફેરવાતા એક વ્યક્તિનું મોત નીપજ્યું છે, જ્યારે અન્ય એક વ્યક્તિ ગંભીર રીતે ઘાયલ થયો છે. ઘટનાથી સમગ્ર વિસ્તારમાં ચકચાર મચી ગઈ છે.

મળતી માહિતી મુજબ ખેતરના રસ્તાને લઈને પરિવારજનો વચ્ચે લાંબા સમયથી વિવાદ ચાલતો હતો. આ મુદ્દે ફરીથી ઉગ્ર બોલાચાલી થતાં ઝઘડો મારામારીમાં ફેરવાયો હતો. દરમિયાન કેટલાક લોકોએ ઘાતક હથિયારો વડે હુમલો કર્યો હતો.

એક વ્યક્તિનું મોત એક સારવાર હેઠળ

હુમલામાં ધર્મેન્દ્રસિંહ ઝાલા નામના વ્યક્તિને ગંભીર ઇજાઓ પહોંચતાં તેમનું ઘટનાસ્થળે જ મોત થયું હોવાનું જાણવા મળે છે. સાથે જ અન્ય એક વ્યક્તિને ગંભીર હાલતમાં સારવાર માટે હોસ્પિટલમાં ખસેડવામાં આવ્યો છે.

પોલીસ ઘટના સ્થળે પહોંચી

ઘટનાની જાણ થતાં જ પોલીસ તાત્કાલિક ઘટનાસ્થળે પહોંચી હતી અને તપાસ શરૂ કરી છે. પ્રાથમિક માહિતી મુજબ હુમલા બાદ આરોપીઓ ફરાર થઈ ગયા હોવાનું સામે આવ્યું છે.

આ પણ વાંચોઃ આંતરજ્ઞાતિય લગ્નના વિવાદ બાદ ઘરે પરત ફરી સિંગર કિંજલ રબારી, વીડિયો કરી આપી સ્પષ્ટતા

પોલીસે આરોપીઓને ઝડપી પાડવા ચક્રોગતિમાન કર્યા

હિંમતનગર પોલીસ દ્વારા ફરાર આરોપીઓની શોધખોળ હાથ ધરવામાં આવી છે અને સમગ્ર મામલે વધુ તપાસ ચાલુ છે. પોલીસે જણાવ્યું છે કે આરોપીઓને ઝડપવા માટે ખાસ ટીમો બનાવવામાં આવી છે. આ ઘટના બાદ ગામમાં તણાવપૂર્ણ વાતાવરણ સર્જાયું છે અને કાયદો-વ્યવસ્થા જાળવવા માટે પોલીસ બંદોબસ્ત પણ વધારવામાં આવ્યો છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ