ગીર સોમનાથ / 8 સિંહોએ વાછરડાનો શિકાર કરી ઉજાણી કરી, ભાગવાને બદલે ગાય મૃત બચ્ચાને વ્હાલ કરતી રહી

ગીરના જંગલની સરહદે આવેલાં ગામોમાં વન્યજીવો અને પાલતું પશુઓ વચ્ચેના સંઘર્ષની ઘટનાઓ અવારનવાર બનતી હોય છે, પરંતુ કોડીનાર તાલુકાના સિંધાજ ગામે કુદરતનો એક એવો નજારો જોવા મળ્યો, જેણે માનવીય સંવેદનાઓને હચમચાવી દીધી છે. અહીં આઠ સિંહના પરિવારે એક વાછરડાનો શિકાર કર્યો હતો, પરંતુ આ લોહિયાળ ખેલ વચ્ચે એક ગાયે પોતાના મૃત્યુનો ભય છોડીને માતૃત્વની જે મિસાલ પેશ કરી છે, એ જોઈને પથ્થર હૃદયના માનવીની આંખો પણ ભીની થઈ ગઈ છે.

ગીર વિસ્તારના જંગલોની આસપાસ માનવ અને વન્યજીવન વચ્ચેના સંઘર્ષના કિસ્સાઓ અવારનવાર સામે આવતા રહે છે, પરંતુ સિંધાજ ગામમાં બનેલી આ ઘટના સંઘર્ષથી આગળ વધી માનવ હૃદયને સ્પર્શી જાય એવી બની ગઈ છે. પોતાના વાછરડાની રક્ષા માટે એક ગાય સિંહોના પરિવાર સામે અડગ રીતે ઉભી રહી, જેમાં માતૃત્વની અપરંપાર હિંમત અને નિસ્વાર્થ પ્રેમ સ્પષ્ટ દેખાઈ આવ્યો. જીવના જોખમની પરવા કર્યા વિના સંતાન માટે લડી પડેલી ગાયનું આ દ્રશ્ય મૌન રહીને પણ ઘણું કહી જાય છે અને માતા–સંતાનના અતૂટ સંબંધની શક્તિને ઉજાગર કરે છે.

ગત 9 ફેબ્રુઆરીની રાત્રે સિંધાજ ગામમાં ખોરાકની શોધમાં આઠ સિંહોનો એક પરિવાર આવી ચઢ્યો હતો. ગામની શેરીઓમાં લટાર મારતા સિંહોએ એક વાછરડાને પોતાનું નિશાન બનાવી તેનું મારણ કર્યું હતું. ઘટનાક્રમ દરમિયાન બે શક્તિશાળી સિંહો વાછરડાના દેહને ફાડી રહ્યા હતા, ત્યારે ત્યાં હાજર વાછરડાની માતા ગાય ભાગી ન જઈને પોતાના સંતાનની પાસે અડીખમ ઊભી રહી હતી. સામાન્ય રીતે સિંહને જોઈને પાલતું પશુઓ જીવ બચાવવા ભાગી જાય છે, પરંતુ આ ઘટનામાં માતૃત્વનો પ્રેમ મૃત્યુના ભય કરતાં પણ ભારે પડ્યો હતો.

આ પણ વાંચોઃ 'સમાજની માફી માંગી લઉં એમાં નાના બાપનો નથી થઈ જવાનો' સિંગર ગબ્બર ઠાકોર નરમ પડ્યાં

વન વિભાગે અપીલ કરી

ઘટનાની જાણ વન વિભાગની ટીમને થતા વન વિભાગની ટીમ સિંધાજ ગામે પહોંચી હતી. તેમજ ટ્રેકરો દ્વારા હાલ સિંહ પરિવાર પર સતત નજર રાખી રહ્યા છે. તેમજ વન વિભાગે ગ્રામજનોને અપીલ કરી છે કે, રાત્રિના સમયે ઘરની બહાર એકલા ન નીકળવું. તેમજ સિંહોની પજવણી ન કરવી કે તેમને જોવા માટે ભીડ ન કરવી. તેમજ પશુઓના રહેઠાણ સુરક્ષિત રાખવાં.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ