કચ્છ / કચ્છમાં મધરાતે ભૂકંપનો આંચકો, બેલા નજીક કેન્દ્રબિંદુ નોંધાયું

કચ્છ જિલ્લામાં મંગળવારની મોડી રાત્રે ભૂકંપનો હળવો આંચકો અનુભવાતા કેટલાક વિસ્તારોમાં લોકોમાં ક્ષણિક ચિંતા ફેલાઈ હતી. ભૂકંપની તીવ્રતા રિક્ટર સ્કેલ પર 3.4 નોંધાઈ હોવાનું પ્રાથમિક માહિતીમાં સામે આવ્યું છે. ભૂકંપનું કેન્દ્રબિંદુ બેલા વિસ્તારની આસપાસ નોંધાયું હતું.

ભૂકંપના આંચકા બાદ અનેક લોકો ઊંઘમાંથી જાગી ગયા હતા. જોકે ભૂકંપની તીવ્રતા ઓછી હોવાથી કોઈ જાનહાનિ કે મિલકતને નુકસાન થયાની માહિતી પ્રાપ્ત થઈ નથી.

ભૂકંપવિજ્ઞાન સંબંધિત સંસ્થાઓ દ્વારા મળતી માહિતી અનુસાર કચ્છ વિસ્તાર ભૂકંપની દૃષ્ટિએ અત્યંત સંવેદનશીલ ઝોનમાં આવે છે. આ કારણે અહીં સમયાંતરે નાના અને મધ્યમ તીવ્રતાના ભૂકંપના આંચકા નોંધાતા રહે છે.

બેલા નજીક 54 કિલોમીટર ઉત્તર ઉત્તરપૂર્વ વિસ્તારમાં રાત્રે 10 વાગ્યા 27 મિનિટે ભૂકંપનો આંચકો અનુભવાયો હતો જેની પુષ્ટિ ઇન્સ્ટિટ્યૂટ ઓફ સિસ્મોલોજિકલ રિસર્ચ ગાંધીનગર દ્વારા કરવામાં આવી છે. ભૂકંપ બાદ કોઈ પણ પ્રકારની ગંભીર પરિસ્થિતિ સર્જાઈ ન હોવાના અહેવાલો સામે આવ્યા છે..

કચ્છ કેમ છે ભૂકંપ માટે સંવેદનશીલ?

કચ્છ પ્રદેશ ભારતના સૌથી વધુ ભૂકંપપ્રવણ વિસ્તારોમાંનો એક ગણાય છે. વર્ષ 2001ના વિનાશક ભૂકંપ બાદ આ વિસ્તાર સતત સિસ્મિક મોનિટરિંગ હેઠળ રાખવામાં આવેલ છે. નિષ્ણાંતોના મતે અહીં પૃથ્વીના આંતરિક સ્તરોમાં સક્રિય ભૂગર્ભીય હલચલને કારણે સમયાંતરે ભૂકંપના આંચકા અનુભવાતા રહે છે.