ભરતી / AMCમાં સહાયક સિનિયર ક્લાર્ક બનવાનો મોકો, જાણો કોણ કરી શકશે અરજી

AMC Recruitment 2026 : અમદાવાદમાં રહેતા અને સરકારી ક્ષેત્રમાં સ્થિર અને સારી નોકરીની રાહ જોઈ રહેલા ઉમેદવારો માટે એક મહત્વપૂર્ણ તક સામે આવી છે. વાસ્તવમાં અમદાવાદ મ્યુનિસિપલ કોર્પોરેશન (AMC) દ્વારા સહાયક સિનિયર ક્લાર્ક (Assistant Senior Clerk)ની ભરતી માટે સત્તાવાર જાહેરાત બહાર પાડવામાં આવી છે. આ ભરતી અંતર્ગત કુલ 250 જગ્યાઓ ભરવામાં આવશે અને લાયક ઉમેદવારો પાસેથી ઓનલાઈન અરજીઓ મંગાવવામાં આવી છે. આ ભરતી ખાસ કરીને એવા ઉમેદવારો માટે ઉપયોગી સાબિત થઈ શકે છે જેઓ ગ્રેજ્યુએશન પૂર્ણ કરી ચૂક્યા છે અને સરકારી નોકરીમાં પોતાનું કારકિર્દી બનાવવાનું ઈચ્છે છે. ચાલો ભરતી સંબંધિત તમામ મહત્વપૂર્ણ વિગતો જાણીએ.

ભરતીની મુખ્ય વિગતો

અમદાવાદ મહાનગરપાલિકા દ્વારા બહાર પાડવામાં આવેલી ભરતીમાં સહાયક સિનિયર ક્લાર્કની કુલ 250 જગ્યાઓ માટે ઉમેદવારોની પસંદગી કરવામાં આવશે. ઓનલાઈન અરજી કરવાની પ્રક્રિયા શરૂ થઈ ગઈ છે અને અરજી કરવાની છેલ્લી તારીખ 7 જુલાઈ 2026 નક્કી કરવામાં આવી છે.

સંસ્થા: અમદાવાદ મ્યુનિસિપલ કોર્પોરેશન (AMC)

• પોસ્ટનું નામ: સહાયક સિનિયર ક્લાર્ક
• કુલ જગ્યાઓ: 250
• અરજી પ્રક્રિયા: ઓનલાઈન
• છેલ્લી તારીખ: 7 જુલાઈ 2026

કેટેગરી મુજબ જગ્યાઓનું વિતરણ

ભરતીમાં વિવિધ અનામત વર્ગો માટે અલગ-અલગ જગ્યાઓ ફાળવવામાં આવી છે.

• જનરલ વર્ગ – 105 જગ્યાઓ
• અનુસૂચિત જાતિ (SC) – 15 જગ્યાઓ
• અનુસૂચિત જનજાતિ (ST) – 37 જગ્યાઓ
• SEBC – 68 જગ્યાઓ
• EWS – 25 જગ્યાઓ

આ રીતે કુલ 250 જગ્યાઓ પર ભરતી કરવામાં આવશે.

શૈક્ષણિક લાયકાત શું છે?

આ પોસ્ટ માટે અરજી કરવા ઈચ્છતા ઉમેદવારોએ સરકાર માન્ય યુનિવર્સિટી અથવા સંસ્થામાંથી બેચલર ડિગ્રી (Graduation) પૂર્ણ કરેલી હોવી આવશ્યક છે. કોઈપણ વિષયમાં સ્નાતક થયેલા ઉમેદવારો ભરતી માટે અરજી કરી શકે છે, જો તેઓ અન્ય જરૂરી માપદંડો પૂર્ણ કરતા હોય.

અનુભવની આવશ્યકતા

આ ભરતીમાં માત્ર શૈક્ષણિક લાયકાત પૂરતી નથી, પરંતુ ઉમેદવાર પાસે વહીવટી ક્ષેત્રનો અનુભવ પણ હોવો જરૂરી છે. ઉમેદવારે સરકારી કચેરી, સ્થાનિક સ્વરાજ્ય સંસ્થા, સરકારી ઉપક્રમ, અર્ધસરકારી સંસ્થા, બોર્ડ, નિગમ અથવા મ્યુનિસિપલ કોર્પોરેશનમાં ઓછામાં ઓછા ત્રણ વર્ષનો વહીવટી કેડરનો અનુભવ મેળવેલો હોવો જોઈએ. આ અનુભવ સંયુક્ત અથવા અલગ-અલગ સંસ્થાઓમાં મેળવેલો હોઈ શકે છે.

વય મર્યાદા

આ ભરતી માટે ઉમેદવારની ન્યૂનતમ ઉંમર 18 વર્ષ અને મહત્તમ ઉંમર 38 વર્ષ નક્કી કરવામાં આવી છે. તેમજ હાલમાં અમદાવાદ મ્યુનિસિપલ કોર્પોરેશનમાં ફરજ બજાવતા કર્મચારીઓને નિયમો મુજબ વય મર્યાદામાં છૂટછાટ આપવામાં આવશે.

કેટલો મળશે પગાર?

સહાયક સિનિયર ક્લાર્ક તરીકે પસંદગી પામનારા ઉમેદવારોને શરૂઆતના ત્રણ વર્ષ માટે દર મહિને ₹26,000 નો ફિક્સ પગાર આપવામાં આવશે. ત્રણ વર્ષનો સમયગાળો પૂર્ણ થયા બાદ કામગીરીના મૂલ્યાંકનના આધારે ઉમેદવારને લેવલ-4 પે મેટ્રિક્સ મુજબ ₹25,500 થી ₹81,100 સુધીનો પગાર મળવાની સંભાવના રહેશે. ઉપરાંત સરકારના નિયમો અનુસાર વિવિધ ભથ્થાં અને અન્ય લાભો પણ આપવામાં આવશે.

અહીં ક્લિક કરી જાણો ભરતીની તમામ વિગત : AMC Assistant Senior Clerk Bharti 2026

ઓનલાઈન અરજી કેવી રીતે કરવી?

અરજી કરવા માટે ઉમેદવારોએ અમદાવાદ મ્યુનિસિપલ કોર્પોરેશનની સત્તાવાર વેબસાઇટની મુલાકાત લેવી પડશે.

આ પણ વાંચો : આગામી 24 કલાકમાં વરસાદ બોલાવશે રમઝટ, ગુજરાતમાં ભારે વરસાદની આગાહી

અરજી પ્રક્રિયાના મુખ્ય પગલાં:

• AMCની સત્તાવાર વેબસાઇટ પર જવું.
• "Public Information" વિભાગમાં જવું.
• "Recruitment and Result" વિકલ્પ પર ક્લિક કરવું.
• હાલમાં ચાલતી ભરતીની યાદીમાંથી Assistant Senior Clerk ભરતી પસંદ કરવી.
• "Apply" બટન પર ક્લિક કરીને અરજી ફોર્મ ખોલવું.
• માંગવામાં આવેલી તમામ વિગતો યોગ્ય રીતે ભરવી.
• જરૂરી દસ્તાવેજો અપલોડ કરવા.
• ફોર્મ સબમિટ કર્યા બાદ તેની પ્રિન્ટ અથવા PDF કોપી સાચવી રાખવી.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ