BIG NEWS / ટેરિફ પર ટ્રમ્પનો યુ-ટર્ન, 90 દિવસ માટે આપી રાહત, પણ ચીન પર લગાવ્યો 125% ટેક્સ

અમેરિકા અને ચીન વચ્ચે ચાલી રહેલ વેપાર યુદ્ધ દિવસે દિવસે વધી રહ્યું છે. ચીને આજે અમેરિકા પર 84 ટકાનો બદલો લેવાનો ટેરિફ લાદ્યો છે. જે બાદ રાષ્ટ્રપતિ ડોનાલ્ડ ટ્રમ્પે ફરીથી ચીન સામે ટેરિફમાં વધારો કર્યો છે. ટ્રમ્પે ચીન સામે ટેરિફ વધારીને 125 ટકા કર્યો છે. જ્યારે 75 દેશો માટે ટેરિફ રાહતની પણ જાહેરાત કરવામાં આવી છે. ટ્રમ્પે X પર એક પોસ્ટ શેર કરીને આ માહિતી આપી. તેમણે ચીન પર વૈશ્વિક બજારો પ્રત્યે અનાદર દર્શાવવાનો આરોપ લગાવ્યો. ટ્રમ્પે ઘણા દેશો માટે ટેરિફ પર 90 દિવસનો ગ્રેસ પીરિયડ પણ જાહેર કર્યો.

ડોનાલ્ડ ટ્રમ્પે કહ્યું, ચીને જે રીતે વિશ્વ બજારોનું સન્માન કર્યું નથી તે જોતાં, હું અમેરિકા દ્વારા ચીન પર લાદવામાં આવી રહેલા ટેરિફને તાત્કાલિક અસરથી 125% સુધી વધારી રહ્યો છું. આશા છે કે ચીન ટૂંક સમયમાં સમજી જશે કે અમેરિકા અને અન્ય દેશો દ્વારા શોષણ હવે સ્વીકાર્ય કે ટકાઉ નથી. જોકે, ટ્રમ્પે એમ પણ કહ્યું કે અમેરિકા પ્રત્યે 75 થી વધુ દેશોના સકારાત્મક પ્રતિભાવને ધ્યાનમાં રાખીને, તેમણે 90 દિવસનો 'PAUSE' એટલે કે ગ્રેસ પીરિયડ જાહેર કર્યો છે. આ સમયગાળા દરમિયાન, અમેરિકા દ્વારા 'પારસ્પરિક ટેરિફ' ઘટાડીને 10% કરવામાં આવ્યો છે.

વધુ વાંચો : ટ્રમ્પના ટેરિફ એટેક પર જિનપિંગનો પલટવાર, ચીને અમેરિકા પર ઠોક્યો 84% વધારાનો ટેક્સ

ટ્રમ્પે કહ્યું કે આ દેશોએ યુએસ વાણિજ્ય વિભાગ, ટ્રેઝરી વિભાગ અને વેપાર પ્રતિનિધિઓનો સંપર્ક કર્યો છે અને વેપાર, ટેરિફ, ચલણની હેરફેર અને બિન-આર્થિક ટેરિફ જેવા મુદ્દાઓનો ઉકેલ શોધવાની ઇચ્છા વ્યક્ત કરી છે. ટ્રમ્પે એવો પણ દાવો કર્યો હતો કે આ દેશોએ અમેરિકા સામે કોઈ બદલાની કાર્યવાહી કરી નથી.

બધા જ સમાચાર અને અપડેટ્સ મેળવવા માટે પ્લે સ્ટોર/ એપ સ્ટોર પર જઈને અથવા આ લાઈન પર ક્લિક કરીને ડાઉનલોડ કરો અમારી લેટેસ્ટ એપ