વિશ્વ / અમેરીકામાં ભારતીય મૂળના કાશ પટેલને ATFના કાર્યવાહક નિર્દેશક પદ પરથી હટાવાયા

America Kash Patel : અમેરિકથી ટેરિફ દરો વધવાના સમાચારની સાથે-સાથે અન્ય એક મોટા સમાચાર સામે આવ્યા છે. વાસ્તવમાં અમેરિકાના રાષ્ટ્રપતિ ડોનાલ્ડ ટ્રમ્પે શપથ લીધા પછી ભારતીય મૂળના કાશ પટેલ પર તેમની ટીમમાં મોટી જવાબદારી આવી. ટ્રમ્પ સત્તામાં આવતાની સાથે જ પટેલને FBIના ડિરેક્ટર તરીકે નિયુક્ત કર્યા. હવે સમાચાર સામે આવ્યા છે કે, તેમને બ્યુરો ઓફ આલ્કોહોલ, ટોબેકો, ફાયરઆર્મ્સ એન્ડ એક્સપ્લોઝિવ્સ (ATF) ના કાર્યકારી ડિરેક્ટર પદ પરથી દૂર કરવામાં આવ્યા છે. તેમના સ્થાને હવે આ પદ ડેનિયલ ડ્રિસ્કોલના હાથમાં રહેશે. અમેરિકન અધિકારીઓ દ્વારા આ વાતની પુષ્ટિ કરવામાં આવી છે.

કાશ પટેલે 24 ફેબ્રુઆરીના રોજ કાર્યકારી ATF નેતા તરીકે શપથ લીધા હતા. ત્રણ દિવસ પહેલા તેમણે FBI ડિરેક્ટર તરીકે શપથ લીધા હતા જે પદ તેઓ હજુ પણ ધરાવે છે. એક જ સમયે બે મુખ્ય ન્યાય વિભાગના એકમોનું નેતૃત્વ કરવા માટે એક જ વ્યક્તિની પસંદગી થાય તે અસામાન્ય હતું. પદ પરથી દૂર કર્યા પછી પણ પટેલ હજુ પણ વેબસાઇટ પર ATF ડિરેક્ટર તરીકે નોંધાયેલા હતા. મીડિયામાં સમાચાર આવ્યા પછી તેમાં ફેરફાર કરવામાં આવ્યો.

અધિકારીઓએ કાશ પટેલને હટાવવાની પુષ્ટિ કરી

ન્યાય વિભાગના એક અધિકારીએ પટેલને હટાવવાની પુષ્ટિ કરી અને કહ્યું કે, તેનો તેમના પ્રદર્શન સાથે કોઈ સંબંધ નથી. પટેલને ઔપચારિક રીતે ક્યારે તેમના પદ પરથી દૂર કરવામાં આવ્યા તે હજુ સ્પષ્ટ નથી. રાષ્ટ્રપતિ ડોનાલ્ડ ટ્રમ્પના બીજા કાર્યકાળમાં ઘણી ઉથલપાથલ જોવા મળી રહી છે, જેમાં મોટી સંખ્યામાં કર્મચારીઓને કાઢી મૂકવા અને ફરીથી નોકરી પર રાખવાનો સમાવેશ થાય છે. છેલ્લા 3 મહિનામાં ટ્રમ્પે 9 થી વધુ લશ્કરી અધિકારીઓને બરતરફ કર્યા છે.

વધુ વાંચો : ટેરિફ પર ટ્રમ્પનો યુ-ટર્ન, 90 દિવસ માટે આપી રાહત, પણ ચીન પર લગાવ્યો 125% ટેક્સ

ATF અને DEA ના વિલીનીકરણ માટેની તૈયારીઓ

આવા સમયે કાશ પટેલને પદ પરથી દૂર કરવામાં આવ્યા છે. જ્યારે યુએસ ડિપાર્ટમેન્ટ ઓફ જસ્ટિસ ડ્રગ એન્ફોર્સમેન્ટ એડમિનિસ્ટ્રેશન (DEA) અને બ્યુરો ઓફ આલ્કોહોલ, ટોબેકો, ફાયરઆર્મ્સ એન્ડ એક્સપ્લોઝિવ્સ (ATF) ના સંભવિત મર્જર પર વિચાર કરી રહ્યું છે. ખર્ચ ઘટાડવા માટે બંનેને મર્જ કરી શકાય છે. આવી સ્થિતિમાં, પટેલની રજા ઘણા પ્રશ્નો ઉભા કરી રહી છે.

શું તમે જાણો છો કોણ છે કાશ પટેલ ? અહીં ક્લિક કરો

હવે જાણો કોણ છે કાશ પટેલ ?

કાશ પટેલનું પૂરું નામ કશ્યપ પ્રમોદ પટેલ છે. કાશ પટેલનો પરિવાર મૂળ વડોદરાનો છે. કાશ પટેલના માતા-પિતા યુગાન્ડામાં રહેતા હતા. કાશના માતા-પિતા 1970ના દાયકામાં અમેરિકા આવ્યા હતા. કાશ પટેલનો જન્મ ન્યુ યોર્કના ગાર્ડન સિટીમાં થયો હતો. તેમણે પેસ યુનિવર્સિટીમાંથી કાયદાની ડિગ્રી મેળવી છે. 9 વર્ષ વકીલ તરીકે પ્રેક્ટિસ કર્યા પછી તેઓ યુએસ ડિપાર્ટમેન્ટ ઓફ જસ્ટિસમાં જોડાયા. 2017માં તેમને ગુપ્તચર બાબતો પર ગૃહ સંસદીય પસંદગી સમિતિના સભ્ય બનાવવામાં આવ્યા હતા. કાશ પટેલ રિપબ્લિકન પાર્ટી સાથે જોડાયેલા છે અને ટ્રમ્પના ખૂબ નજીકના માનવામાં આવે છે.

બધા જ સમાચાર અને અપડેટ્સ મેળવવા માટે પ્લે સ્ટોર/ એપ સ્ટોર પર જઈને અથવા આ લાઈન પર ક્લિક કરીને ડાઉનલોડ કરો અમારી લેટેસ્ટ એપ