ધરતીકંપે ધરા ગજવી / હવે ઇરાનમાં આવ્યો ભૂકંપ, રિક્ટર સ્કેલ પર 6ની તીવ્રતા, જાપાનમાં તો 20 લાખ ઘરોમાં વીજળી ગુલ

• જાપાન બાદ ઇરાનમાં પણ ભૂકંપથી ધરા ધ્રુજી ઉઠી
• ઇરાનમાં 6 રિક્ટર સ્કેલ પર ભૂકંપની તીવ્રતા નોંધાઇ
• બુધવારે રાત્રે ભારતમાં પણ ભૂકંપના આંચકા અનુભવાયા

જાપાન બાદ હવે ગુરુવારનાં રોજ વહેલી સવારે દક્ષિણ ઈરાનમાં પણ ભૂકંપના આંચકા અનુભવાયા હતાં. આ ભૂકંપની તીવ્રતા 6 રિક્ટર સ્કેલ પર માપવામાં આવી. ભૂકંપનું કેન્દ્ર પૃથ્વીથી 10 કિલોમીટરની ઊંડાઈએ હતું. જો કે ઈરાનમાં હજુ સુધી કોઈ જાનહાનિના અહેવાલ સામે નથી આવ્યાં. આ પહેલાં બુધવારે જાપાનમાં ભૂકંપના જોરદાર આંચકા અનુભવાયા હતાં. તેમની તીવ્રતા 7.1 માપવામાં આવી હતી.

જાપાનમાં આવેલા ભૂકંપના કારણે 20 લાખ ઘરોમાં વીજળી ગુલ

મીડિયા રિપોર્ટના જણાવ્યાં અનુસાર, જાપાનમાં બુધવારે રાત્રિના 8:06 કલાકે 7.1ની તીવ્રતાનો ભૂકંપ આવ્યો હતો. જે ટોક્યોથી 297 કિમી દૂર હતું. ટોક્યો ઈલેક્ટ્રિક પાવર કંપનીના હવાલાથી કહેવામાં આવ્યું કે, જાપાનમાં આવેલા આ ભૂકંપના કારણે દેશના અંદાજે 20 લાખ ઘરોમાં વીજળી ગુલ થઈ ગઈ છે. ભૂકંપના આંચકા એટલાં જોરદાર હતાં કે બાદમાં સુનામીનું એલર્ટ પણ જાહેર કરી દેવાયું.

અત્યાર સુધીમાં 4 લોકોનાં મોત થયાં છે તો 90થી વધુ લોકો ઘાયલ

જાપાનમાં આવેલા આ ભૂકંપના કારણે અત્યાર સુધીમાં 4 લોકોનાં મોત થયાં છે તો 90થી વધુ લોકો ઘાયલ હોવાનું સામે આવ્યું છે. આ ભૂકંપના કારણે જાપાનના શિરોઈશીમાં બુલેટ ટ્રેન પણ પાટા પરથી ઉતરી ગઈ હતી. 2011ની દુર્ઘટનાને 11 વર્ષ પૂર્ણ થયાના થોડા દિવસો બાદ આ ભૂકંપ આવ્યો. પેસિફિક સુનામી વોર્નિંગ સેન્ટરે જણાવ્યું કે, હવે સુનામીનો ખતરો નથી. જો કે, જાપાનના હવામાન વિભાગે ઓછા જોખમની ચેતવણી જાહેર કરી છે. ટોક્યો સહિત પૂર્વ જાપાનમાં પણ આ જોરદાર ભૂકંપના આંચકા અનુભવાયા હતાં.

ભારતમાં પણ અનુભવાયા ભૂકંપના આંચકા

એ સિવાય બુધવારે રાત્રે ભારતમાં પણ ભૂકંપના આંચકા અનુભવાયા હતાં. ભારતમાં ભૂકંપના આંચકા જમ્મુ-કાશ્મીરના શ્રીનગરથી 119 કિમી ઉત્તરમાં રાત્રે લગભગ 9:40 વાગ્યે લોકોએ અનુભવ્યા હતાં. જેની 4.2ની તીવ્રતા નોંધાઇ હતી. જો કે જાનમાલને કોઇ પણ પ્રકારનું નુકસાન થયા અંગેની માહિતી સામે નથી આવી.