પંચમહાલના શહેરા પંથકમાં ખેડૂતોને માથે હાથ દઈ રોવાનો વારો આવ્યો છે. બાજરીનું બિયારણ ખરાબ નીકળતા કેટલાય ખેડૂતોને લાખ્ખોનું નુક્શાન થયું છે. ખેડૂતોના આક્ષેપો છે કે બાજરીના બિયારણ માટે જાણીતી બ્રાન્ડનું ડુપ્લીકેટ બિયારણ તેમને પધરાવી દેવામાં આવ્યું છે.
Share
પંચમહાલનાં ખેડૂતોને પડતા પર પાટુ
બાજરીનું બિયારણ ખરાબ નીકળતા ખેડૂતોને નુકશાન
ડુપ્લીકેટ અને બિનગુણવત્તા યુક્ત બિયારણનો જથ્થો ખેડૂતને આપવામાં આવ્યો
ચોમાસુ નજીક આવી રહ્યું છે. ત્યારે ખેડૂતો હવે પોતાના ખેતરમાં વાવેતરની તૈયારીઓની સાથે સાથે બિયારણની ખરીદી પણ કરતા હોય છે. પરંતુ આ વખતે બિયારણની ખરીદી કરતા પહેલા ચેતજો !!!! કારણ કે માર્કેટમાં હવે ડુપ્લીકેટ અને બિનગુણવત્તા યુક્ત બિયારણનો જથ્થો વેચાઈ રહ્યો છે. આવા બિયારણના વાવેતર બાદ ત્રણ થી ચાર મહિના બાદ જ્યારે પાક તૈયાર થાય ત્યારે ખેડૂતને ભૂંડી રીતે છેતરાયા હોવાનો અહેસાસ થાય. ત્યારે બહુ મોડું થઈ ગયું હોય છે. આવું જ કઈક થયું છે પંચમહાલના શહેરા તાલુકાના બીલીથા અને આસપાસના ખેડૂતો સાથે થયું છે. આજ થી અંદાજિત પાંચેક મહિના પહેલા આ વિસ્તારના ખેડૂતોએ બાજરીના બિયારણમાં મોટું નામ ધરાવતી પાયોનિયર બ્રાન્ડનું 86M11 બિયારણ હોંશે હોંશે ખરીદીને પોતાના ખેતરમાં વાવ્યું હતું.
બાજરીના ડુંડાની જગ્યાએ કઈક વિચિત્ર કહી શકાય તેવો પાક જોવા મળ્યો
શહેરાના બીલીથા ગામના પુનમભાઈ માછીએ પણ ગત ફેબ્રુઆરી માસમાં બાલાસિનોરના શક્તિ પેસ્ટીસાઇઝ્ડ નામની એગ્રો દુકાન માંથી 6 પેકેટ પાયોનિયર બ્રાન્ડ નું 86M11 બાજરીનું બિયારણ રૂપિયા 3900 માં ખરીદી કર્યું હતું. જેના બાદ પોતાની 3 એકર જેટલી જમીનમાં વાવી તેની પાછળ પાણી મુકવા,ખાતર નાખવા સહિતનો ખર્ચ અને અંદાજિત 3 મહિનાની મહેનત કરી હતી. પૂનમભાઈને દુકાનદાર દ્વારા કહેવામાં આવ્યું હતું કે સારી બ્રાન્ડનું બિયારણ છે. એટલે વિધે 40 મણ બાજરીનો ઉતારો આવશે. મોટી આશાઓ સાથે બ્રાન્ડેડ બિયારણ થી કરેલ બાજરીની ખેતીનો પાક તૈયાર થતા જે પરિણામ આવ્યું તે જોઈ પુનમભાઈ સહિત આસપાસના ખેડૂતો પણ ચોંકી ઉઠ્યા હતાં. બાજરીના છોડ પર બાજરીના ડુંડાની જગ્યાએ કઈક વિચિત્ર કહી શકાય તેવો પાક જોવા મળ્યો હતો.
ખેડૂતને એક વિઘામાં અંદાજિત 70 હજારનું નુકસાન
પુનમભાઈ સહિત આસપાસના ઘણા ખેડૂતોને પાયોનિયર બ્રાન્ડ નું 86M11 બાજરીનું બિયારણ વિધે 20-25 હજારનો ફાયદો કરાવવા ની જગ્યા એક વિઘામાં અંદાજિત 70 હજારનું નુકસાન કરાવી ગયું હોવાના આક્ષેપો કરી રહ્યા છે. પુનમભાઈ એકલા ને જ 3 થી 4 લાખ નું નુકશાન થયું હોવાનું તેઓ જણાવી રહ્યા છે.઼
પુનમભાઈ માછી (ભોગ બનનાર, ખેડૂત)
દેવાના બોજ તળેલા દબાયેલા ખેડૂતો આત્મહત્યા કરવાની ચીમકી ઉચ્ચારી
ખરાબ કે ડુપ્લીકેટ બીયારણ નો ભોગ બનનાર એવા પુનમભાઈ સહિત તમામ ખેડૂતો આવા ખરાબ અને બિનગુણવત્તા યુક્ત બિયારણો વેચનાર સામે કડક કાર્યવાહીની માંગણી કરી રહ્યા છે. તો સાથે જ હાલ તેઓને જે નુકશાન થયું છે તેનું વળતર પણ તાત્કાલિક મળે તેવી માંગણી કરી રહ્યા છે. અને જો કોઈ પણ પગલા નહિ લેવાય તો દેવાના બોજ તળેલા દબાયેલા ખેડૂતો આત્મહત્યા કરવાની ચીમકી ઉચ્ચારી રહ્યા છે.
