હવામાન / ગુજરાતીઓને કાળઝાળ ગરમીથી રાહત નહીં, તાપમાનનો પારો જશે 44 ડિગ્રીને પાર, પરેશ ગોસ્વામીની આગાહી

સમગ્ર રાજ્યમાં અત્યારે કાળઝાળ ગરમી પડી રહી છે, ત્યારે હવામાન નિષ્ણાંત પરેશ ગોસ્વામીએ હજુ પણ રાજ્યમાં ગરમીના પ્રમાણમાં વધારો થવાની આગાહી કરી છે. પરેશ ગોસ્વામીની આગાહી અનુસાર આગામી 3 દિવસ રાજ્યમાં તાપમાનમાં વધારો થઈ શકે છે. 2થી 4 મે સુધી રાજ્યમાં 41થી 44 ડિગ્રી સુધી તાપમાન નોંધાઈ શકે છે

'મે મહિનામાં ગરમી રેકોર્ડ તોડશે'

રાજકોટ, અમરેલી, કચ્છ, અમદાવાદ, નડિયાદ, કપડવંજ, હિંમતનગર, ઈડર અને ખેડબ્રહ્મામાં 44 ડિગ્રીથી વધુ તાપમાન રહેવાની સંભાવના છે. સાથે જ પરેશ ગોસ્વામીએ રાજ્યમાં મતદાનના દિવસે એટલે કે 7 મેએ પણ આકરી ગરમી પડવાની આગાહી કરવા સાથે મે મહિનામાં ગરમી રેકોર્ડ તોડશે તેવી આગાહી કરી છે.

વાંચવા જેવું: ગુજરાત ATSને મળી સફળતા, દરિયાઈ જળ સીમામાંથી મળેલા ડ્રગ્સ કેસમાં વધુ 3 આરોપીની કરી ધરપકડ

ગરમી વધવાની પરેશ ગોસ્વામીની આગાહી

પરેશ ગોસ્વામીએ કહ્યું કે, ચાલુ વર્ષમાં ઉનાળામાં સામાન્ય કરતા ગરમીમાં 2 ડિગ્રીનો વધારો જોવા મળી રહ્યો છે. આ વર્ષે અલનીનોની અસર જોવા મળતા તાપમાન ઉંચું જોવા મળી રહ્યો છે. તેમણે કહ્યું કે, 2024નો એપ્રિલ મહિના છેલ્લા 80 વર્ષમાં જોઈએ તો સૌથી વધુ ગરમ રહ્યો છે. સાથો સાથ આવનાર દિવસોમાં પણ ગરમીથી રાહત મળે તેવી શક્યતાઓ જોવા મળતી નથી.