Video / રાધનપુર ચોકડી અકસ્માતમાં નવો વળાંક, યુવકે પોતે જ ટ્રક નીચે પડતું મૂકતા શરીરના ટુકડેટુકડા

Mehsana Accident Case : મહેસાણાની રાધનપુર ચોકડી પાસે 18 ફેબ્રુઆરી બુધવારે રાત્રે લગભગ 10 વાગ્યે બનેલી યુવકના મોતની ઘટના અંગે ચોંકાવનારો ખુલાસો થયો છે. શરૂઆતમાં જે બનાવને ટ્રેલરની ટક્કરથી થયેલો અકસ્માત માનવામાં આવતો હતો તપાસ પછી તે હકીકતમાં આત્મહત્યા હોવાનું પોલીસ તપાસમાં સામે આવ્યું છે. ઘટનામાં ઉત્તર પ્રદેશના બદાયુ જિલ્લાનો રહેવાસી સત્યપાલ બાબુરામ નામના યુવકનું ઘટનાસ્થળે જ કમકમાટીભર્યું મોત થયું હતું. પહેલા નજરે આ બનાવ સામાન્ય માર્ગ અકસ્માત લાગતો હતો પરંતુ બાદમાં સામે આવેલા CCTV ફૂટેજે સમગ્ર ઘટનાનો નજરીયો બદલી નાખ્યો છે.

CCTV ફૂટેજમાં ચોંકાવનારી હકીકત

B ડિવિઝન પોલીસે બનાવ પછી તરત જ આસપાસના CCTV કેમેરાની તપાસ શરૂ કરી હતી. ટ્રેલરચાલકની શોધખોળ અને ઘટનાની સાચી હકીકત જાણવા માટે ફૂટેજ ઝીણવટભરી રીતે જોવામાં આવ્યા હતા. CCTVમાં સ્પષ્ટ દેખાય છે કે સત્યપાલ રોડ વચ્ચે બેફિકરીથી ચાલતો હતો. તે સમયે રસ્તા પર બે નાની ટ્રક અને એક ટ્રેલર પસાર થઈ રહ્યા હતા. ટ્રેલર નજીક આવતાં જ સત્યપાલ દોડીને ટ્રેલરના પાછળના ટાયર નીચે જઈને સૂઈ ગયો હતો. ટાયર તેના ઉપર ફરી વળતાં અને અંદાજે 5 ફૂટ જેટલો રસ્તા પર ઢસડાતા તેના શરીરના કમરના અને પેટના ભાગનો છૂંદો થઈ ગયો હતો. આ દૃશ્યો જોઈ પોલીસ પણ આશ્ચર્યચકિત થઈ ગઈ હતી. સ્પષ્ટ પુરાવા મળતાં હવે પોલીસએ આ કેસને અકસ્માત નહીં પરંતુ આત્મહત્યાનો ગણાવ્યો છે.

શરૂઆતમાં અકસ્માત માનવામાં આવ્યો હતો

ઘટના બન્યા બાદ પ્રાથમિક તપાસમાં એવું લાગતું હતું કે ટ્રેલરની ટક્કરથી યુવકનું મોત થયું છે. સત્યપાલ રાધનપુર ચોકડી પાસેથી પસાર થઈ રહ્યો હતો ત્યારે ટ્રેલરના ટાયર નીચે કચડાઈ જવાથી તેનું મોત થયું હતું. ઘટનાની જાણ થતાં જ બી ડિવિઝન પોલીસ સ્થળ પર પહોંચી તપાસ હાથ ધરી હતી. મૃતકની ઓળખ CCTV અને અન્ય વિગતોના આધારે કરવામાં આવી હતી. શરૂઆતમાં ટ્રેલરચાલક સામે કાર્યવાહી કરવાની તૈયારી હતી પરંતુ ફૂટેજ સામે આવતા સમગ્ર મામલે નવો વળાંક લીધો હતો.

આ પણ વાંચો: વધુ એક પીજી અમદાવાદમાં સીલ, અત્યાર સુધીમાં કુલ 32 PG વિરૂદ્ધ તંત્રએ કરી કાર્યવાહી

આપઘાત પાછળનું કારણ હજુ અકબંધ

સત્યપાલના મોતના સમાચાર મળતાં જ તેનો પરિવાર મહેસાણા દોડી આવ્યો હતો. પરિવારજનોએ જણાવ્યું હતું કે સત્યપાલ ઘરેથી કામધંધા માટે બહાર જઈ રહ્યો છું એમ કહીને નીકળ્યો હતો. તેણે આવું કઠોર પગલું શા માટે ભર્યું તે અંગે હજુ સુધી કોઈ સ્પષ્ટ કારણ સામે આવ્યું નથી. પરિવાર પણ આ ઘટનાથી આઘાતમાં છે. પોલીસ હાલ વધુ તપાસ કરી રહી છે. પરંતુ CCTV ફૂટેજે સ્પષ્ટ કરી દીધું છે કે આ બનાવ અકસ્માત નહીં પરંતુ આત્મહત્યા છે. આ ઘટનાએ સમગ્ર વિસ્તારમાં ચકચાર મચાવી છે અને લોકોમાં પણ અનેક પ્રશ્નો ઊભા કર્યા છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ