કાર્યવાહી / ₹ 43,00,000 નહીં ભરનાર 81 ગ્રાહકોના કનેક્શન કટ, પોલીસને સાથે રાખી VGL ટીમ એક્શનમાં

વડોદરા: ગેસ બિલની લાંબા સમયથી બાકી રકમ નહીં ભરનારા ગ્રાહકો સામે વડોદરા ગેસ લિમિટેડ (VGL) દ્વારા કડક કાર્યવાહી હાથ ધરવામાં આવી છે. છેલ્લા ત્રણ દિવસથી શહેરના વિવિધ વિસ્તારોમાં VGLની ટીમે પોલીસ બંદોબસ્ત સાથે બાકીદારો સામે કાર્યવાહી શરૂ કરી છે.

81 ગ્રાહકોના ગેસ કનેક્શન કાપી નાખવામાં આવ્યા

મચ્છીપીઠ, સલાટવાડા, કોઠી, નાગરવાડા સહિતના વિસ્તારોમાં VGLની ટીમે સપાટો બોલાવી ગેસ બિલની બાકી રકમ વસૂલવા માટે કાર્યવાહી કરી હતી. આ દરમિયાન બિલ નહીં ભરનારા 81 ગ્રાહકોના ગેસ કનેક્શન કાપી નાખવામાં આવ્યા હતા.

43 લાખ રૂપિયાની ગેસ બિલની બાકી રકમ વસૂલવાની હતી

VGLના જણાવ્યા અનુસાર, આ ગ્રાહકો પાસેથી કુલ આશરે 43 લાખ રૂપિયાની ગેસ બિલની બાકી રકમ વસૂલવાની હતી. બાકી બિલની વસૂલાત માટે ટીમ દ્વારા સ્થળ પર જ ગ્રાહકોને બિલ ભરવા માટે સમજાવવામાં આવ્યા હતા અને ચુકવણી નહીં કરનારાઓ સામે કનેક્શન કાપવાની કાર્યવાહી કરવામાં આવી હતી.

56 ગ્રાહકોએ બાકી બિલની રકમ ભરપાઈ કરી

બીજી તરફ, કાર્યવાહી દરમિયાન 56 ગ્રાહકોએ બાકી બિલની કુલ રૂ. 6.34 લાખની રકમ ભરપાઈ કરી હતી. જેના પગલે તેમના બાકી બિલની વસૂલાત થઈ હતી.

આ પણ વાંચોઃ આખરે MSUમાં અશ્લીલ હરકત કરનાર સ્ટુડન્ટ્સે માંગી માફી, કહ્યું “I am sorry...”

VGLની ટીમે પોલીસને સાથે રાખીને હાથ ધરેલી આ કાર્યવાહીના પગલે બાકીદારોમાં ફફડાટ ફેલાયો હતો. કંપની દ્વારા સ્પષ્ટ કરવામાં આવ્યું છે કે બાકી ગેસ બિલની સમયસર ચુકવણી નહીં કરનાર ગ્રાહકો સામે આગામી દિવસોમાં પણ આવી કડક કાર્યવાહી ચાલુ રાખવામાં આવી શકે છે. VGLની આ કાર્યવાહીનો મુખ્ય હેતુ બાકી બિલની વસૂલાત સાથે ગ્રાહકોને સમયસર ગેસ બિલ ભરવા માટે જાગૃત કરવાનો હોવાનું માનવામાં આવે છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ