વિશ્વ / અમેરિકા-ઈરાન વચ્ચે શાંતિ કરાર, મહિનાઓથી ચાલતો સંઘર્ષ આખરે સમાપ્ત

અમેરિકાના રાષ્ટ્રપતિ ડોનાલ્ડ ટ્રંપ અને ઈરાનના રાષ્ટ્રપતિ મસૂદ પેજેશ્કિયાને બુધવારે મહત્વપૂર્ણ સમજૂતી કરાર (MoU) પર હસ્તાક્ષર કરીને બંને દેશો વચ્ચે ચાલી રહેલા સંઘર્ષનો અંત લાવવાનો પ્રયાસ કર્યો છે. આ કરારને મોટી કૂટનીતિક સફળતા તરીકે જોવામાં આવી રહ્યો છે. બંને દેશોના અધિકારીઓના જણાવ્યા મુજબ, કરાર પર હસ્તાક્ષર થયા બાદ તે તરત જ અમલમાં આવ્યો છે. આ પગલાથી મધ્ય પૂર્વમાં સ્થિરતા વધવાની આશા વ્યક્ત કરવામાં આવી રહી છે.

અમેરિકા-ઈરાન વચ્ચે શાંતિ સમજૂતી

અમેરિકન અને ઈરાની અધિકારીઓના જણાવ્યા અનુસાર, ડોનાલ્ડ ટ્રંપ અને મસૂદ પેજેશ્કિયાને બુધવારે MoU પર સત્તાવાર હસ્તાક્ષર કર્યા હતા. આ સમજૂતીનો હેતુ છેલ્લા કેટલાક મહિનાઓથી ચાલી રહેલા વિવાદ અને સંઘર્ષને સમાપ્ત કરવાનો છે.અમેરિકી અધિકારીઓએ જણાવ્યું કે રાષ્ટ્રપતિ ટ્રંપે ફ્રાન્સના વર્સાયલ્સ પેલેસમાં ફ્રાન્સના રાષ્ટ્રપતિ ઇમેન્યુઅલ મેક્રોન સાથેના ડિનર દરમિયાન આ કરારની હાર્ડ કોપી પર પણ સહી કરી હતી. ત્યારબાદ સહી કરેલી નકલ ઈરાન તેમજ મધ્યસ્થતા કરનારા દેશોને મોકલવામાં આવી છે.

અગાઉ ઈલેક્ટ્રોનિક રીતે થયા હતા હસ્તાક્ષર

આ કરારની પ્રક્રિયા અગાઉથી શરૂ થઈ ગઈ હતી. રવિવારે અમેરિકાના ઉપ રાષ્ટ્રપતિ જેડી વેન્સ અને ઈરાનના મુખ્ય વાટાઘાટકાર મોહમ્મદ બાકેર ગાલિબાફે MoU પર ઈલેક્ટ્રોનિક રીતે હસ્તાક્ષર કર્યા હતા. ત્યારબાદ બંને દેશોના રાષ્ટ્રપતિઓએ તેને સત્તાવાર મંજૂરી આપી છે.

ચાર મહિનાથી ચાલતો સંઘર્ષ સમાપ્ત

અમેરિકી અધિકારીઓના જણાવ્યા મુજબ, MoU પર હસ્તાક્ષર થતાં બંને દેશો વચ્ચે લગભગ ચાર મહિનાથી ચાલતો સંઘર્ષ હવે સમાપ્ત માનવામાં આવી રહ્યો છે. આ કરારથી બંને દેશો વચ્ચેના સંબંધોમાં સુધારો થવાની શક્યતા છે.

આ પણ વાંચોઃ PM મોદી પર ટિપ્પણી મલ્લિકાર્જુન ખડગેને પડી ભારે: રાજ્યસભામાં વિશેષાધિકાર ભંગની નોટિસ

જિનેવામાં વાટાઘાટો હજુ પણ પ્રસ્તાવિત

જોકે શાંતિ કરાર પર હસ્તાક્ષર થઈ ચૂક્યા છે, તેમ છતાં શુક્રવારે સ્વિટ્ઝરલેન્ડના જિનેવામાં બંને દેશોના પ્રતિનિધિમંડળોની બેઠક યોજાવાની યોજના હજુ યથાવત છે. ઈરાની અધિકારીઓએ સ્પષ્ટ કર્યું છે કે આ બેઠકનો હેતુ નવા કરાર પર સહી કરવાનો નથી પરંતુ ભવિષ્યની પ્રક્રિયા અને સંબંધિત મુદ્દાઓ પર ચર્ચા કરવાનો છે.હાલમાં આ બેઠક ખરેખર યોજાશે કે નહીં તે અંગેનો અંતિમ નિર્ણય આગામી થોડા કલાકોમાં લેવામાં આવી શકે છે. બંને દેશોની આગામી કાર્યવાહી પર હવે વિશ્વની નજર છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ