શ્રાવણ મહિનો નજીક આવી રહ્યો છે ત્યારે શિવભક્તો પણ ભોલેનાથ પ્રત્યેનો પોતાનો પ્રેમ અલગ અલગ રીતે પ્રદર્શિત કરતા હોય છે. ત્યારે સુરતના 4 યુવકોએ આવું જ કંઈક સાહસ ખેડ્યું છે. દેવાધિદેવ મહાદેવના અલગ અલગ રૂપ અને અલૌકિક શક્તિનું વર્ણન શિવતાંડવ સ્ત્રોતમમાં કરવામાં આવ્યું છે. ત્યારે સુરતના 4 યુવાનોએ શિવભક્તિ દર્શાવવા પોતાની કલા દ્વારા વીડિયો બનાવીને શિવતાંડવ કર્યુ. યુવાનોએ વિશ્વના સૌથી ઉંચા શિવમંદિર પર વીડિયો શૂટ કર્યો. ઉત્તરાખંડના રુદ્રપ્રયાગ જિલ્લામાં બરફના પહાડોની વચ્ચે તુંગનાથ મહાદેવનું શિવમંદિર આવેલું છે. 12 હજાર 73 ફૂટની ઉંચાઈએ 5 હજાર વર્ષ જૂનું પ્રાચિન શિવાલય પાંચ કેદારમાં તૃતિય કેદાર તરીકે ઓળખાય છે. ધાર્મિક રીતે આ શિવાલયનું મહત્વ તો છે જ ત્યારે આ ચારેય યુવાનોએ અહીં માઈનસ 15 ડિગ્રી તાપમાનમાં 10 દિવસ વિતાવ્યા. અને મંદિર પરિસરની આસપાસના નયનરમ્ય દ્રશ્યો કેમેરામાં કંડાર્યા. જેમાં જય વર્મા, સ્વપ્નિલ નેગી, દિવ્યેશ યાદવ અને ધ્રુવીક ગલાણીએ શિવતાંડવ કરીને ભગવાન ભોળેનાથ માટે પોતાનો ભાવ દર્શાવ્યો.