જોબ સેક્ટર / કર્મચારીઓ પર લટકતી તલવાર ટાણે આ કંપનીએ આપી ખુશખબર, એકસાથે આટલાં લોકોને મળશે રૂ. 3.5 લાખનું બોનસ

• કંપનીએ પોતાના કર્મચારીઓને બોનસ આપવાની જાહેરાત કરી
• આ કંપની હવે ત્રીજી સૌથી મોટી લક્ઝરી ફેશન બ્રાન્ડ છે
• કંપનીના નફામાં પણ ગયા વર્ષની સરખામણીએ વધારો થયો છે

એક બાજુ વૈશ્વિક મંદી અને કંપનીઓને થઈ રહેલા નુકસાનને કારણે છટણી થઈ રહી છે. બીજી તરફ એક કંપનીએ પોતાના કર્મચારીઓને બોનસ આપવાની જાહેરાત કરી છે. આ બોનસની રકમ હજાર, 10 હજાર રૂપિયા નહી પરંતુ 3.5 લાખ રૂપિયા છે અને આ બોનસ વર્ષના અંતમાં કંપની તરફથી કર્મચારીઓને આપવામાં આવશે. 19,700 કર્મચારીઓમાંથી દરેકને 3.5 લાખ રૂપિયાનું બોનસ આપવામાં આવશે.

ફ્રાન્સની લક્ઝરી ડિઝાઈનિંગ ફર્મે કહ્યું કે ફેબ્રુઆરીના અંતમાં 4,000 યુરો અથવા 3 લાખ 50 હજાર રુપિયા કંપનીને થયેલા નફા પર ભેટ તરીકે આપવામાં આવશે. ગયા વર્ષની તુલનામાં આ વર્ષે કંપનીનું વેચાણ અને કમાણી ઝડપથી વધી છે, જે કારણે કંપની કર્મચારીઓને બોનસ આપી રહી છે.

કેટલી વધી રેવન્યૂ

પેરિસની હેર્મેસ કંપનીના 17 ફેબ્રુઆરીએ આવેલા ચોથા ક્વાર્ટરના રિપોર્ટ મુજબ, ગયા વર્ષની સરખામણીમાં 23 ટકા રેવન્યૂમાં વધારો થયો છે. લૂઈ વુઈટન અને ચેનલ બાદ લેધર બનાવવાના મામલામાં આ કંપનીનો રેન્ક વધ્યો છે અને આ કંપની હવે ત્રીજી સૌથી મોટી લક્ઝરી ફેશન બ્રાન્ડ છે. લેધર મેન્યૂપેકચરિંગના મામલે કંપનીએ 29 ટકા વધુ રેવન્યૂ મેળવી છે, જે 1 લાખ કરોડ રૂપિયા સુધી પહોંચી ગઈ છે. કંપનીના નફામાં પણ ગયા વર્ષની સરખામણીએ વધારો થયો છે.

દર વર્ષે ભરતી અને બોનસ આપશે કંપની 

હેર્મેસ કંપની એક ફેશન ડિઝાઇનિંગ કંપની છે, જે ફ્રાન્સના પેરિસમાં છે. 1837 થી આ કંપની કાર્યરત છે અને તેના સારા ઉત્પાદનો અને સારી સામગ્રી માટે જાણીતી છે. કંપનીના CEO એક્સેલ ડુમાસે જણાવ્યું હતું કે કંપની દર વર્ષે કર્મચારીઓની ભરતી કરવાનું અને બોનસ આપવાનું ચાલુ રાખશે. વર્ષ 2022 દરમિયાન કંપનીએ 2,100 લોકોને નોકરીઓ આપી હતી.

વર્ષ 2023માં કર્મચારીઓની મોટી સંખ્યામાં થઈ છટણી

આ વર્ષની શરૂઆતથી જ આઈટી સેક્ટરની કંપનીઓએ કર્મચારીઓની સંખ્યામાં ઝડપથી ઘટાડો કર્યો છે. ફેસબુકની પેરેન્ટ કંપની મેટા, ટ્વિટર, એમેઝોન, માઇક્રોસોફ્ટ અને ઘણી સ્ટાર્ટઅપ કંપનીઓએ હજારો કર્મચારીઓની સંખ્યા ઘટાડી દિધી છે. કેટલીક કંપનીઓ બીજા રાઉન્ડમાં કર્મચારીઓની છટણી કરવાની તૈયારી કરી રહી છે.