Lok Sabha Election 2024 : લોકસભા ચૂંટણી પહેલા દરેક રાજકીય પક્ષો હરકતમાં આવી ગયા છે. આ દરમિયાન તમને પણ સરકાર તરફથી વોટ્સએપ પર મેસેજ આવ્યો હશે? સરકાર 'વિકાસ ભારત સંપર્ક' નામના વોટ્સએપ એકાઉન્ટ દ્વારા લોકોના મોબાઈલ ફોન પર મેસેજ મોકલીને ફીડબેક માંગી રહી છે. જોકે હવે આ મેસેજને લઈને રાજકીય વિવાદ પણ શરૂ થઈ ગયો છે. કોંગ્રેસનું કહેવું છે કે, ચૂંટણીની જાહેરાત બાદ પણ ભાજપ પોતાના પ્રચાર માટે સરકારી મશીનરીનો ઉપયોગ કરી રહી છે. તમને જણાવી દઈએ કે, સરકાર દ્વારા મોકલવામાં આવેલા આ મેસેજમાં વડાપ્રધાન મોદીનો એક પત્ર પણ જોડવામાં આવ્યો છે. વિપક્ષનું કહેવું છે કે સરકારી ડેટાબેઝનો ઉપયોગ કરીને રાજકીય પ્રચાર કરવામાં આવી રહ્યો છે.
કોંગ્રેસના કેરળ યુનિટે સોશિયલ મીડિયા પ્લેટફોર્મ X પર વ્હોટ્સએપની પેરેન્ટ કંપની મેટાને ટેગ કર્યું અને કહ્યું કે, વિકાસ ભારત સંપર્ક નામના વેરિફાઈડ બિઝનેસ એકાઉન્ટમાંથી લોકોને મેસેજ મોકલવામાં આવી રહ્યા છે. કેરળ કોંગ્રેસે કહ્યું, આ મેસેજમાં લોકો પાસેથી ફીડબેક માંગવામાં આવ્યો છે. જોકે તેની સાથે જોડાયેલ PM મોદીનો પત્ર રાજકીય પ્રચાર સિવાય બીજું કંઈ નથી. કોંગ્રેસે કહ્યું કે, PM મોદી આના દ્વારા પોતાની પાર્ટીનો પ્રચાર કરી રહ્યા છે અને સરકારી ડેટાબેઝનો ઉપયોગ કરવામાં આવી રહ્યો છે. આવી સ્થિતિમાં વોટ્સએપનો રાજકારણ માટે પણ દુરુપયોગ થઈ રહ્યો છે.
કેરળ કોંગ્રેસે સરકારની નીતિનો સ્ક્રીનશોટ પણ શેર કર્યો છે. તે કહે છે કે કંપની કોઈપણ રાજકીય પક્ષ, રાજકારણી, રાજકીય ઉમેદવાર અથવા રાજકીય પ્રચાર માટે મર્જિંગ એપના ઉપયોગ પર પ્રતિબંધ મૂકે છે. કોંગ્રેસે સવાલ કર્યો કે, જો આ કંપનીની નીતિ છે તો પ્રચાર કરવા માટે રાજકારણીને આ પ્લેટફોર્મ કેમ આપવામાં આવ્યું છે. અથવા ભાજપ માટે તમારી કોઈ અલગ નીતિ છે?
વડાપ્રધાન નરેન્દ્ર મોદીએ દેશવાસીઓને પત્ર જાહેર કરીને વિકસિત ભારતને લઈને તેમની પ્રતિક્રિયા માંગી છે. સંદેશમાં કહેવામાં આવ્યું છે કે, વિકસિત ભારતના સંકલ્પને પૂર્ણ કરવા માટે તમારું સમર્થન અને તમારું સૂચન ખૂબ જ મહત્વપૂર્ણ છે. તેથી તમને આ યોજનાઓ વિશે તમારા મંતવ્યો આપવા વિનંતી છે. કોંગ્રેસનું કહેવું છે કે, 2047 સુધીમાં દેશનો વિકાસ કરવાનું સપનું દેખાડવું એ પણ ભાજપની રાજકીય ચાલ છે.
વધુ વાંચો: 'એમને શું ખબર પડે આપણો ઈતિહાસ', CAA મામલે જયશંકરે અમેરિકા સહિતના દેશોને દેખાડ્યું 'દર્પણ'
ભૂતપૂર્વ લોકસભા સાંસદ અને TMC નેતામહુઆ મોઇત્રાએ કહ્યું કે, આદર્શ આચાર સંહિતા લાગુ થયા પછી પણ ભાજપની આગેવાનીવાળી મોદી સરકાર કરદાતાઓના પૈસાનો ઉપયોગ કરીને પત્રો જાહેર કરી રહી છે. ચૂંટણીની જાહેરાત પછી વ્યક્તિને શરમજનક પ્રચાર સંદેશ મળે છે. તમને જણાવી દઈએ કે, ફેબ્રુઆરીમાં BJP અધ્યક્ષ જેપી નડ્ડાએ મોદીના વિકસિત ભારતની ખાતરી આપતી વીડિયો વાન ચલાવી હતી. તેના દ્વારા પણ ભાજપના ચૂંટણી ઢંઢેરાને લઈને લોકોના સૂચનો લેવામાં આવી રહ્યા છે.
VTV Gujarati Newsની તમામ અપડેટ સૌથી પહેલા મેળવવા માટે અમારી WhatsApp ચેનલ ફોલો કરો
