ન્યાયિક / પત્નીની ઉંમર 15 વર્ષથી વધુ હોય તો રેપનો કેસ ન બને- સુપ્રીમ કોર્ટનો ચુકાદો, આરોપી પતિનો છૂટકારો

• સગીર પત્ની સાથે સેક્સ પર સુપ્રીમનો મોટો ચુકાદો
• સગીરાની ઉંમર 15 વર્ષથી વધુ હોય તો રેપ નહીં
• કોર્ટે સગીર પત્ની સાથે રેપના આરોપીને છોડી મૂક્યો 

સુપ્રીમ કોર્ટે સગીર પત્ની સાથે રેપના આરોપીને રેપના આરોપમાંથી મુક્ત કર્યો છે. જસ્ટિસ બી.આર.ગવઈ અને સંજય કરોલની બેન્ચે કહ્યું કે, જો પત્નીની ઉંમર 15 વર્ષથી વધુ હોય તો આવા કેસમાં રેપનો કોઈ આરોપ બનતો નથી અને આરોપી જામીન મેળવવા માટે પાત્ર છે. પત્ની સાથે રેપના ગુનામાં પતિને હાઈકોર્ટે દોષી ઠેરવ્યો હતો અને હાઈકોર્ટના આ ચુકાદા સામે આરોપીએ સુપ્રીમમાં અરજી કરીને પોતાની સામેનો કેસ રદ કરવાની અપીલ કરી હતી. 

કલમ 375ને આધારે સુપ્રીમે આરોપીને છોડી મૂક્યો 
સુપ્રીમ કોર્ટે બંને પક્ષોની દલીલો સાંભળી હતી અને આ કેસમાં આઈપીસીની કલમ 375 ના અપવાદ 2 પર આધાર રાખ્યો હતો. આ અંતર્ગત જો પત્નીની ઉંમર 15 વર્ષથી વધુ હોય અથવા સગીર પત્ની સાથે સેક્સ માણવાના કિસ્સામાં પતિ પર બળાત્કારનો આરોપ નથી. આમાં પતિને બળાત્કારના કેસમાં અપવાદની શ્રેણીમાં રાખવામાં આવ્યો હતો. આ આધારે પતિને નિર્દોષ છોડી મૂકવામાં આવ્યો હતો.

શું છે વૈવાહિત રેપની વ્યાખ્યા 
બળાત્કારની પરિભાષામાં એવી જોગવાઇ કરવામાં આવી છે કે, જો પત્નીની ઉંમર 15 વર્ષથી વધુ હોય તો વૈવાહિક બળાત્કારમાં પતિને અપવાદમાં રાખવામાં આવ્યો છે. એટલે કે પતિ સામે બળાત્કારનો કેસ દાખલ કરી શકાય નહીં.

કયા કિસ્સામાં સુપ્રીમે રેપનો કેસ રદ કર્યો 
સુપ્રીમ કોર્ટે કહ્યું કે, હાલના કેસમાં પત્નીની ઉંમર 15 વર્ષથી વધુ હતી જ્યારે પતિ અને પત્ની વચ્ચે સંબંધ બંધાયો હતો. આવી સ્થિતિમાં, બળાત્કારનો કોઈ કેસ નહીં હોય. તેમજ યુવતીએ સોગંદનામું આપ્યું છે કે, તેણે પોતાના પતિ સાથે જાતે લગ્ન કર્યા હતા અને તેમની વચ્ચે સંમતિથી સંબંધ હતા અને તેમને એક સંતાન પણ છે. કોર્ટે એમ પણ કહ્યું હતું કે, એકલા કરારના ઉલ્લંઘનથી છેતરપિંડીનો ગુનાહિત કેસ ન થઈ શકે. આ માટે કેસમાં શરૂઆતથી જ ખોટા ઇરાદાને સાબિત કરવો જરૂરી છે. વચન પૂરું કરવામાં નિષ્ફળતાના માત્ર આક્ષેપો ફોજદારી કાર્યવાહી શરૂ કરવા માટે પૂરતા નહીં હોય.