ગાંધીનગર / અંબાજી મોહનથાળ વિવાદ: અક્ષયપાત્રને અપાઈ શકે છે પ્રસાદ બનાવવાનો કોન્ટ્રાક્ટ, જાણો શું છે સરકારની તૈયારી

• અંબાજી પ્રસાદ કોન્ટ્રાક્ટ મામલે ઋષિકેશ પટેલેનું નિવેદન
• 'અત્યારે પ્રસાદની વ્યવસ્થા મંદિર પ્રશાસન દ્વારા કરવામાં આવી છે'
• 'અક્ષયપાત્ર એજન્સીને આપવાની આપણી વિચારણા છે'

Ambaji Prasad controversy : ગાંધીનગર ખાતે મુખ્યમંત્રી ભૂપેન્દ્ર પટેલના અધ્યક્ષસ્થાને રાજ્ય મંત્રી મંડળની કેબિનેટ બેઠક યોજાઈ હતી. આ બેઠકમાં લેવાયેલા કેટલાક મહત્વના નિર્ણયો અંગે પ્રવક્તા મંત્રી ઋષિકેશ પટેલે માહિતી આપી હતી. જે દરમિયાન તેમણે અંબાજી મંદિરમાં પ્રસાદમાં ભેળસેળ યુક્ત ઘી મામલે કાર્યવાહીને લઈ પણ વાત કરી હતી. અંબાજી પ્રસાદ કોન્ટ્રાક્ટ મામલે પ્રવકતા મંત્રી ઋષિકેશ પટેલે કહ્યું કે, અત્યારે પ્રસાદની વ્યવસ્થા મંદિર પ્રશાસન દ્વારા કરવામાં આવી છે, તેમજ અક્ષયપાત્રને આપવાની આપણી વિચારણા છે.

'એજન્સીને બ્લેક લિસ્ટ કરી છે'
ઘીના સેમ્પલ ફેઈલ મામલે પ્રવક્તા મંત્રી ઋષિકેશ પટેલ જણાવ્યું કે, 28 તારીખે આપણે 180 ડબ્બા ઘીના સિઝ કર્યા હતા, તેમજ 120 ડબ્બા તેણે ક્યાં વાપર્યા તે તપાસનો વિષય છે. અત્યારે તે એજન્સીને બ્લેક લિસ્ટ કરી છે તેમજ FIRની કાર્યવાહી તેમજ અન્ય કાર્યવાહી ચાલુ છે, જે પણ પગલા લેવાના થાય તેની સામે લઈશું જે ચાહે એજન્સી હોય કે, નીલકંઠ ટ્રેડર્સ હોય.    

'અક્ષયપાત્રને આપવાની વિચારણા'
પ્રવક્તા મંત્રીએ જણાવ્યું કે, FDCA દ્વારા રૂટીન તપાસ કરવામાં આવી હતી, ઘીના સેમ્પલ બરોબર ન હોવાથી ઘી ના ડબ્બા સીઝ કરવામાં આવ્યા હતા. સેંપલ ફેઈલ થતા ડબ્બા કબજે કરી કોન્ટ્રાક્ટરને નોટીસ અપાઈ. મોહિની કેટરર્સનો 12 મહિનાનો કોન્ટ્રાક્ટ હતો અને મોહિની કેટરર્સનો કોન્ટ્રાક્ટ ઓર્ડર રીન્યુ કરવામાં આવ્યો નથી. મંદિરમાં પ્રસાદનો કોન્ટ્રકટ અક્ષયપાત્ર એજન્સીને આપવામાં વિચાર ચાલી રહ્યો છે.