ગાંધીનગર / ખેતરોમાં વીજપોલના વળતર મુદ્દે સરકારે શરૂ કરી વિચારણા,કાલની કેબિનેટમાં થઈ શકે ચર્ચા

રાજ્યમાં ખેતીની જમીનમાં વીજપોલ ઉભા કરવાની કામગીરીને લઈને છેલ્લા કેટલાક સમયથી ખેડૂતોમાં અસંતોષ જોવા મળી રહ્યો છે. ખાસ કરીને મોરબી જિલ્લાના જેતપર સહિત વિવિધ વિસ્તારોમાં ખેડૂતો દ્વારા ઉઠાવવામાં આવેલા વિરોધને ધ્યાનમાં રાખીને રાજ્ય સરકાર હવે મહત્વપૂર્ણ નિર્ણય તરફ આગળ વધી રહી હોવાનું સૂત્રો પાસેથી જાણવા મળે છે.

ખેતરોમાં વીજપોલના વળતર મુદ્દે રાજ્ય સરકારે શરૂ કરી વિચારણા

મળતી માહિતી મુજબ, ખેતીની જમીનમાં વીજપોલ સ્થાપિત થતાં ખેડૂતોને થતી અસુવિધા અને નુકસાનને ધ્યાનમાં રાખીને સરકાર વળતરની નવી નીતિ જાહેર કરવાની દિશામાં વિચારણા કરી રહી છે. આ મુદ્દે આવતીકાલે યોજાનારી રાજ્ય કેબિનેટ બેઠકમાં વિસ્તૃત ચર્ચા થઈ શકે છે.

વિભાગો પાસેથી અભિપ્રાય મેળવવાની પ્રક્રિયા ચાલુ

સરકાર દ્વારા હાલ વિવિધ વિભાગો પાસેથી અભિપ્રાય મેળવવાની પ્રક્રિયા ચાલી રહી હોવાનું જાણવા મળે છે. કેબિનેટ બેઠકમાં ચર્ચા અને વિચારણા બાદ વીજપોલના વળતર માટે સ્પષ્ટ માર્ગદર્શિકા અથવા નવી પોલિસીની જાહેરાત કરવામાં આવે તેવી શક્યતા છે.

આ પણ વાંચોઃ નવસારીમાં 3.7 ઈંચ વરસાદથી ઘરોમાં ઘુસ્યા પાણી, પેટલાદમાં 2 કલાકમાં 3 ઈંચ, કાલે ભારે વરસાદની આગાહી

ખેડૂતોના વિરોધના મુદ્દા પર પણ કેબિનેટ બેઠકમાં ચર્ચા થઈ શકે

સૂત્રોના જણાવ્યા અનુસાર, મોરબીના જેતપરમાં ખેડૂતોના વિરોધના મુદ્દા પર પણ કેબિનેટ બેઠકમાં ચર્ચા થઈ શકે છે. ખેડૂતોને યોગ્ય વળતર મળે અને વિકાસકાર્યો પણ સમયસર પૂર્ણ થઈ શકે તે માટે સંતુલિત નીતિ ઘડવાનો સરકારનો પ્રયાસ હોવાનું માનવામાં આવી રહ્યું છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ