ક્રિકેટ / શુભમન ગિલે ડંકો વગાડ્યો, તોડ્યો રિષભ પંતનો આ રેકોર્ડ, બન્યો નંબર 1 ખેલાડી

ભારતીય ટેસ્ટ ટીમના કેપ્ટન શુભમન ગિલે તેમના શાનદાર ફોર્મની સાથે વિશ્વ ટેસ્ટ ચેમ્પિયનશિપ (WTC)માં ઈતિહાસ રચ્યો છે. વેસ્ટઈન્ડિઝ સામે દિલ્હીના અરુણ જેટલી સ્ટેડિયમમાં રમાઈ રહેલી બીજી અને અંતિમ ટેસ્ટ મેચની પ્રથમ ઈનિંગમાં ગિલે એક મોટો રેકોર્ડ પોતાના નામે કર્યો છે. તેમણે 35 રનનો આંકડો પાર કરતાં જ WTCના ઈતિહાસમાં સૌથી વધુ રન બનાવનાર ભારતીય બેટ્સમેન બનવાનું ગૌરવ હાંસલ કર્યું.

આ સિદ્ધિ સાથે તેમણે વિકેટકીપર બેટ્સમેન ઋષભ પંતને પાછળ છોડી દીધા અને ભારત તરફથી આ ટૂર્નામેન્ટમાં રન બનાવવાની યાદીમાં ટોચનું સ્થાન મેળવ્યું. શુભમન ગિલનો WTCમાં રનનો આંકડો હવે 2,732 રનને પાર પહોંચી ગયો છે. આ સિદ્ધિ તેમણે 71 ઈનિંગ્સમાં હાંસલ કરી, જેની સાથે તેમણે ઋષભ પંતના 67 ઈનિંગ્સમાં બનાવેલા 2,731 રનના રેકોર્ડને તોડી દીધો. આ યાદીમાં ત્રીજા સ્થાને ભારતીય કેપ્ટન રોહિત શર્મા છે, જેમણે 69 ઈનિંગ્સમાં 2,716 રન બનાવ્યા છે.

તેમજ, દિગ્ગજ બેટ્સમેન વિરાટ કોહલી અને ઓલરાઉન્ડર રવિન્દ્ર જાડેજા અનુક્રમે ચોથા અને પાંચમા સ્થાને છે. ગિલનું શાનદાર ફોર્મ ઈંગ્લેન્ડ પ્રવાસથી શરૂ થયું હતું, જ્યાં તેમને ટેસ્ટ ટીમની કમાન સોંપવામાં આવી હતી. તેમણે ઈંગ્લેન્ડમાં રેકોર્ડતોડ રન બનાવ્યા હતા અને હવે વેસ્ટઈન્ડિઝ સામે પણ તેમનું આ ફોર્મ યથાવત્ રહ્યું છે. આ મેચ દરમિયાન ગિલે બીજો મહત્ત્વપૂર્ણ રેકોર્ડ પણ પોતાના નામે કર્યો. તેમણે કેપ્ટન તરીકે આંતરરાષ્ટ્રીય ક્રિકેટમાં 1,000 રન પૂર્ણ કર્યા. આ સાથે તેઓ ભારતના 12મા કેપ્ટન બન્યા, જેમણે આ આંકડો પાર કર્યો.

વધુમાં વાંચો: પોતાના પગ પર જ કુહાડો માર્યો! રોહિત શર્માએ 4 કરોડની કારનો કાચ તોડી નાખ્યો! જુઓ વીડિયો

આ યાદીમાં વિરાટ કોહલી ટોચ પર છે, જેમણે કેપ્ટન તરીકે 12,883 રન બનાવ્યા છે. ગિલે આ આંકડા સુધી પહોંચવા માટે હજુ લાંબી સફર કરવાની છે, પરંતુ તેમનું વર્તમાન ફોર્મ આશાસ્પદ છે. શુભમન ગિલની આ સિદ્ધિઓએ ભારતીય ક્રિકેટ ચાહકોમાં ઉત્સાહ ભર્યો છે. યુવા બેટ્સમેન તરીકે તેમની પ્રતિભા અને નેતૃત્વની ક્ષમતાએ ટીમ ઈન્ડિયાને નવી ઊંચાઈઓ પર લઈ જવાની આશા જગાવી છે. દિલ્હી ટેસ્ટમાં તેમનું પ્રદર્શન ભારતની જીતમાં મહત્ત્વની ભૂમિકા ભજવી શકે છે. ગિલની આ ઉપલબ્ધિ ભારતીય ટેસ્ટ ક્રિકેટના ઉજ્જવળ ભવિષ્યનો સંકેત આપે છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ