મુંબઈ / ટાઇગર શ્રોફ પર ફાયરિંગ કરનારા 3 આરોપીઓ ઘટના બાદ ભાગીને સુરત પહોંચ્યા, ક્રાઈમ બ્રાન્ચને કેવી રીતે મળી કડી

બોલીવૂડ એક્ટર ટાઇગર શ્રોફ પર ફાયરિંગ કેસના તાર સુરત સુધી પહોંચ્યાં છે. આરોપીઓ મુંબઈમાં ટાઈગર શ્રોફ પર ફાયરિંગ કરીને કેબ અને બાદમાં રિક્ષા મારફતે સુરત રેલવે સ્ટેશન પહોંચ્યા હતા. સુરત રેલ્વે સ્ટેશન ખાતે ભાગતા અને દોડીને ટ્રેન પકડતા સીસીટીવીમાં પણ કેદ થયા હતા અને રાજસ્થાન તરફ જતી ટ્રેનમાં બેસી ગયા હતા. મુંબઈ ક્રાઈમ બ્રાન્ચે સીસીટીવી ફૂટેજ તપાસી તાત્કાલિક કાર્યવાહી હાથ ધરી હતી. મુંબઈ ક્રાઈમ બ્રાન્ચ દ્વારા અપાયેલા ચોક્કસ ઇનપુટના આધારે ટ્રેનનું લોકેશન ટ્રેસ કરવામાં આવ્યું હતું.

રેલવે સ્ટેશનના CCTVમાં કેદ થયા હુમલાખોરો

મુંબઈ ક્રાઈમ બ્રાન્ચની ટીમે સુરત રેલવે સ્ટેશન પહોંચીને તપાસના ભાગરૂપે સીસીટીવી (CCTV) ફૂટેજની ચકાસણી કરી હતી. આ દરમિયાન અભિનેતા ટાઈગર શ્રોફ પર હુમલો કરનારા ત્રણેય શંકાસ્પદ હુમલાખોરો કેમેરામાં કેદ થયેલા જોવા મળ્યા હતા. હુમલાખોરો સુરતથી પસાર થતી પુણે-જયપુર ટ્રેનના સમયથી પહેલેથી જ વાકેફ હતા.

રાજસ્થાનના કોટામાંથી ધરપકડ

ટાઇગર શ્રોફની કાર પર ગોળીબાર કરનારા હુમલાખોરોને 15 કલાકમાં રાજસ્થાનના કોટા રેલવે સ્ટેશન પરથી પકડી લેવામાં આવ્યા. ટાઇગર પર રવિવારે મોડી રાત્રે 7 વાગ્યે હુમલો કરવામાં આવ્યો હતો.

આરોપીઓને કેટલી મળી હતી રકમ?

આરોપીઓને મોટી રકમ અને વિદેશમાં વસાહતનું વચન આપીને લાલચ આપવામાં આવી હતી. પોલીસ સૂત્રએ એમ પણ જણાવ્યું હતું કે ત્રણેયને કુલ ૫૦,૦૦૦ રૂપિયા મળ્યા હતા. પોલીસ હવે એ નક્કી કરવાનો પ્રયાસ કરી રહી છે કે પૈસા કોણે પૂરા પાડ્યા, હુમલો કોણે કર્યો અને શું અન્ય લોકો આ કાવતરામાં સામેલ હતા.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ