IND vs ENG / તેંડુલકર-એન્ડરસન ટ્રોફીમાં આ 3 ખેલાડીઓ થઈ શકે છે પ્લેઇંગ 11માંથી બહાર, એક નામ ચોંકાવનારું

India vs England Test Series: ભારતીય ક્રિકેટ ટીમમ હાલમાં ઇંગ્લેન્ડના પ્રવાસે છે, જ્યાં 20 જૂનથી ઇંગ્લેન્ડ સામે પાંચ ટેસ્ટ મેચની સીરીઝ રમવાની છે, જેની શરૂઆત હેડિંગ્લે ટેસ્ટથી થશે. આ સાથે જ ભારતીય ટેસ્ટ ક્રિકેટના નવા યુગની શરૂઆત થશે. રોહિત શર્મા, વિરાટ કોહલી અને રવિચંદ્રન અશ્વિન જેવા અનુભવી ખેલાડીઓએ ટેસ્ટમાંથી નિવૃત્તિ લીધા પછી આ પહેલી વાર હશે જ્યારે ભારતીય ટીમ આ ત્રણ ખેલાડીઓ વિના ઇંગ્લેન્ડનો પ્રવાસ કરી રહી છે. શુભમન ગિલના નેતૃત્વમાં અને ગૌતમ ગંભીરની કોચિંગ હેઠળ, આ યુવા ટીમ નવા વર્લ્ડ ટેસ્ટ ચેમ્પિયનશિપ (WTC) 2025-27 ચક્રમાં મજબૂત શરૂઆત કરવાનો પ્રયાસ કરશે. 18 સભ્યોની ટીમમાં ઘણા પ્રતિભાશાળી ખેલાડીઓનો સમાવેશ થાય છે, પરંતુ ઇંગ્લેન્ડની પરિસ્થિતિઓ અને ટીમ સંયોજનને ધ્યાનમાં રાખીને કેટલાક ખેલાડીઓને પ્લેઇંગ ઇલેવનમાંથી બહાર રહેવું પડી શકે છે. એવામાં ચાલો એ 3 ખેલાડીઓ વિશે જાણીએ કે જેમનું ઇંગ્લેન્ડમાં રમવું મુશ્કેલ દેખાઈ રહ્યું છે.

અભિમન્યુ ઈશ્વરને જોવી પડી શકે છે રાહ

ઘરેલુ ક્રિકેટ અને ઇન્ડિયા A માટે સતત સારું પ્રદર્શન કરનાર અભિમન્યુ ઈશ્વરનને ટેસ્ટ ટીમમાં સ્થાન મળવા છતાં ફરી એકવાર પ્લેઇંગ ઇલેવનમાંથી બહાર રાખવામાં આવી શકે છે. તાજેતરમાં, તેણે ઇંગ્લેન્ડ લાયન્સ સામે 80 રનની ઇનિંગ રમી હતી, જે ઇન્ડિયા A માટે તેની સાતમી અડધી સદી હતી. ટીમના ટોચના ક્રમમાં, યશસ્વી જયસ્વાલ અને કેએલ રાહુલ પ્રથમ બે ઓપનિંગ સ્લોટમાં લગભગ નિશ્ચિત છે. નંબર 3 માટે કરુણ નાયર અને સાઈ સુદર્શન વચ્ચે સ્પર્ધા છે, જ્યારે કેપ્ટન શુભમન ગિલ નંબર 4 પર રમશે. આ સ્થિતિમાં, ઈશ્વરન માટે કોઈ સ્લોટ ઉપલબ્ધ હોય તેવું લાગતું નથી.

ઇંગ્લેન્ડની પિચ અને રેકોર્ડ પર ભારે પડી શકે છે કુલદીપ યાદવ

13 ટેસ્ટમાં 56 વિકેટ લેનાર ડાબોડી સ્પિનર ​​કુલદીપ યાદવ ઇંગ્લેન્ડની સીમિંગ સ્થિતિમાં પ્લેઇંગ ઇલેવનમાંથી બહાર રહી શકે છે. ટીમમાં પ્રથમ સ્પિનર ​​તરીકે રવિન્દ્ર જાડેજાનું સ્થાન લગભગ નિશ્ચિત છે. જો જાડેજાને આરામ આપવામાં આવે તો, ભારત વોશિંગ્ટન સુંદરને પ્રાથમિકતા આપી શકે છે, જે એક સારો ઓલરાઉન્ડ વિકલ્પ છે. ઇતિહાસ દર્શાવે છે કે સેના દેશોમાં (દક્ષિણ આફ્રિકા, ઇંગ્લેન્ડ, ન્યુઝીલેન્ડ, ઓસ્ટ્રેલિયા), ભારત સામાન્ય રીતે ફક્ત એક જ સ્પિનર ​​સાથે રમે છે, જેનાથી કુલદીપની રમવાની સંભાવના ઘટી જાય છે.

બેકઅપની ભૂમિકામાં મર્યાદિત રહેશે ધ્રુવ જુરેલ

ઇંગ્લેન્ડ લાયન્સ સામે શાનદાર પ્રદર્શન કરનાર યુવા વિકેટકીપર-બેટ્સમેન ધ્રુવ જુરેલ (94 અને અણનમ 53) ને આ પ્રવાસમાં બેકઅપ કીપર તરીકે સામેલ કરવામાં આવ્યો છે. ઈજામાંથી વાપસી કરી રહેલા રિષભ પંત ટીમના વાઇસ-કેપ્ટન પણ છે અને તે 5મા નંબર પર રમશે. પંતની ગેરહાજરીમાં પણ, ભારત કેએલ રાહુલને વિકેટકીપિંગની જવાબદારીઓ આપી શકે છે. આ ઉપરાંત, ટીમમાં નીચલા ક્રમને મજબૂત બનાવવા માટે શાર્દુલ ઠાકુર અથવા નીતિશ રેડ્ડી જેવા ઓલરાઉન્ડરોને પ્રાથમિકતા આપવામાં આવે તેવી શક્યતા છે, જેનાથી સ્પેશિયાલિસ્ટ બેટ્સમેન તરીકે જુરેલની તકો મર્યાદિત થઈ શકે છે.

ઇંગ્લેન્ડ પ્રવાસ માટે 18 સભ્યોની ભારતીય ટીમ

શુભમન ગિલ (કેપ્ટન), યશસ્વી જયસ્વાલ, કેએલ રાહુલ, સાઈ સુદર્શન, રિષભ પંત (વાઈસ-કેપ્ટન/વિકેટકીપર), નીતિશ કુમાર રેડ્ડી, રવીન્દ્ર જાડેજા, ધ્રુવ જુરેલ (વિકેટકીપર), અભિમન્યુ ઇશ્વરન, શાર્દુલ ઠાકુર, જસપ્રીત બુમરાહ, મોહમ્મદ સિરાજ, પ્રસિદ્ધ કૃષ્ણા, કરુણ નાયર, વોશિંગ્ટન સુંદર, આકાશ દીપ, અર્શદીપ સિંહ, કુલદીપ યાદવ.

આ પણ વાંચો: ભારતીય ખેલાડીઓ પાસે ઇંગ્લેન્ડમાં 4 મહારેકોર્ડ બનાવવાની તક! બોલરોના છોડાવી દેશે છગ્ગા

ભારત અને ઇંગ્લેન્ડ વચ્ચેની ટેસ્ટ સીરીઝનું શિડયુલ

• પહેલી ટેસ્ટ: 20-24 જૂન, 2025 - હેડિંગ્લે, લીડ્સ
• બીજી ટેસ્ટ: 2-6 જુલાઈ, 2025 - એજબેસ્ટન, બર્મિંગહામ
• ત્રીજી ટેસ્ટ: 10-14 જુલાઈ, 2025 - લોર્ડ્સ, લંડન
• ચોથી ટેસ્ટ: 23-27 જુલાઈ, 2025 - ઓલ્ડ ટ્રેફોર્ડ, માન્ચેસ્ટર
• 5મી ટેસ્ટ: 31 જુલાઈ-4 ઓગસ્ટ, 2025 - ધ ઓવલ, લંડન

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ