IND vs ENG / પોપનો કેચ પકડતા જ રિષભ પંતે બનાવ્યો અનોખો રેકોર્ડ, ધોનીના આ ખાસ ક્લબમાં થઈ એન્ટ્રી

India vs England Leeds Test: ભારતના વિકેટકીપર રિષભ પંતના નામે એક મોટો રેકોર્ડ નોંધાઈ ગયો છે. રિષભ પંત વિકેટકીપર તરીકે 150 કેચ લેનાર ત્રીજો ભારતીય ખેલાડી બની ગયો. રવિવારે હેડિંગ્લે ખાતે ઇંગ્લેન્ડ સામેની પ્રથમ ટેસ્ટના ત્રીજા દિવસે તેણે આ સિદ્ધિ મેળવી. ફાસ્ટ બોલર પ્રસિદ્ધ કૃષ્ણાએ શરૂઆતમાં જ ઓલી પોપને આઉટ કરીને પેવેલિયન મોકલી દીધો. પોપના બેટની ધારથી લાગીને બોલ વિકેટકીપર રિષભ પંતના હાથમાં આવી ગયો. આ પછી, 27 વર્ષીય રિષભ પંતના નામે એક મોટો રેકોર્ડ નોંધાઈ ગયો. રિષભ પંત આ સિદ્ધિ મેળવનાર ભારતના ફક્ત ત્રીજા વિકેટકીપર છે.

આ પહેલા, ટેસ્ટ મેચોમાં ભારત માટે વિકેટકીપર તરીકે સૈયદ કિરમાણી (160 કેચ) અને એમએસ ધોની (256) ભારતીયોમાં પ્રથમ અને બીજા સ્થાને છે. રિષભ પંતના નામે કુલ 151 કેચ અને 15 સ્ટમ્પિંગ (166 શિકાર) છે. તે ઇતિહાસમાં ભારત માટે ત્રીજો સૌથી સફળ કીપર બની ગયો છે. ધોની આ લિસ્ટમાં ટોચ પર છે. જેમણે 256 કેચ અને 38 સ્ટમ્પિંગ કર્યા છે.

ઇંગ્લેન્ડે દિવસના પહેલા સત્રની શરૂઆત 209/3 થી કરી. ઓલી પોપ (100) અને હેરી બ્રુક (0) એ ઇનિંગની શરૂઆત કરી. પોપ અને બ્રુકે આક્રમક શરૂઆત કરી. પોપે કૃષ્ણાનો એક વાઇડ બોલ જોરથી સ્લેશ કર્યો, જે બેટની ધાર પર વાગ્યો અને સીધો રિષભ પંતના હાથમાં ગયો. પોપ 137 બોલમાં 14 ચોગ્ગાની મદદથી 106 રન બનાવ્યા બાદ આઉટ થયો.

આ પણ વાંચો: જસપ્રીત બુમરાહનો નવો કીર્તિમાન, 5 વિકેટ ચટકાવી કપિલ દેવના રેકોર્ડની કરી બરાબરી

આ પહેલા રિષભ પંતે બેટિંગમાં પણ શાનદાર પ્રદર્શન કર્યું હતું. તેણે 178 બોલમાં 134 રનની ઇનિંગ રમી જેમાં 12 ચોગ્ગા અને 6 છગ્ગાનો સમાવેશ થાય છે. આ પંતની ટેસ્ટ કારકિર્દીની સાતમી સદી હતી. પંત ભારત માટે સૌથી વધુ ટેસ્ટ સદી ફટકારનાર વિકેટકીપર બની ગયો છે. આ ઉપરાંત, તે ટેસ્ટમાં 3000 રન પૂર્ણ કરનાર સૌથી ઝડપી એશિયન વિકેટકીપર પણ બની ગયો.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ